782
15 января 2016 в 13:19
Сыл түмүктэннэ – сыл үүнэр
Ил Түмэн хайа баҕарар сис кэмитиэтин уонна онно киирэр хас биирдии чилиэнин – норуот дьокутаатын үлэлэрэ-хамнастара сокуоннар барыллара төһө чиҥник ырытыллан оҥоһуллубуттарынан, ол сыралара парламент сиидэлээһинин ааһан, олоххо төһө ситиһиилээхтик үлэлииллэринэн, туһанылла сылдьалларынан сыаналанар. Онтон атына барыта ойоҕос, көмө, аһымал суолталаах.
Парламент сир сыһыаннаһыытыгар, айылҕа ресурсаларыгар уонна экологияҕа сис кэмитиэтэ ааспыт сылы түбүктээхтик үлэлээн аһарда. Кэмитиэт иннигэр, аатыгар да этиллэ сылдьарынан, хаһан баҕарар араас дьиэктээх боппуруостар уонна проблемалар күөрэйэн туран кэлиэхтэрин сөп. Кэмитиэт бэрэссэдээтэлэ Владимир Прокопьев бу түмүктэммит сылга ыыппыт үлэтиттэн уонна инники саҥа соруктарыттан кылгастык быһа тардан кэпсиир.
— Кэмитиэт 2015 сылга 15 сокуон барылын оҥорон, парламент көрүүтүгэр киллэрбитэ. Мантан 13 барыл парламент бүттүүн дьүүллэһиитин ааһан, сокуон быһыытынан ылыллан турар. Сүрүн-сүрүннэриттэн ааттаталаатахха, бырабыыталыстыба сокуону көҕүлээһининэн, Саха Өрөспүүбүлүкэтин Сирин кодексыгар уларытыылар киллэрилиннилэр. Тулалыыр эйгэни харыстааһын туһунан (сокуону көҕүлээччилэр В.Прокопьев, А.Добрянцев, И.Васильев, А.Атласова, Е.Голомарева, П.Аммосов, Ю.Николаев), ураты харыстанар айылҕа сирдэрин-уоттарын туһунан, нэһилиэнньэни уонна сири-уоту айылҕа уонна техногеннай хараактырдаах ыксаллаах быһыыттан-майгыттан көмүскээһин туһунан (көҕүлээччилэр В.Прокопьев, О.Балабкина) сокуоннарга эмиэ итинник уларытыылар киллэриллэн биэрдилэр.
«Булт уонна булт ресурсаларын харыстааһын туһунан» (сокуону көҕүлээччилэр Е.Голомарева, В.Губарев, В.Членов, И.Андреев, А.Слепцов, Ю.Садовников, С.Павлов, В.Станиловскай. П.Юмшанов, М.Габышев) уонна «Сир аннын туһунан» (көҕүлээччилэр О.Балабкина. В.Прокопьев) СӨ сокуоннарыгар бу олох ааспыт сыл тиһэх ыйыгар уларытыылар киллэриллэн бэрилиннилэр.
Кэмитиэт бэлэмнээһининэн, «Восточнай» космодромтан ыытыллар космическай аракыаталар өрөспүүбүлүкэ сиригэр-уотугар тохтор тобохторо тулалыыр эйгэҕэ дьайыларын сыаналааһын матырыйаалларыгар олоҕуран ыытыллыбыт парламент истиилэрин сүбэлэрин туһунан Ил Түмэн уурааҕа ылыллыбыта. Уопсайа кэмитиэт бэлэмнээһининэн парламент уонтан тахса уурааҕа ылылынна.
Билиҥҥитэ сис кэмитиэт көрүүтүгэр Ил Түмэн икки уурааҕын барыла баар. «РФ Сирин кодексын 28 уонна 30.1 ыстатыйаларыгар уларытыылары киллэрии туһунан» федеральнай сокуон барылын Судаарыстыбаннай Дуумаҕа киллэриигэ СӨ Судаарыстыбаннай Мунньаҕа (Ил Түмэнэ) сокуону көҕүлээһинин туһунан» уонна «РФ Сирин кодексыгар уларытыылары киллэрии туһунан» федеральнай сокуон барылын Судаарыстыбаннай Дуумаҕа киллэриигэ СӨ Судаарыстыбаннай Мунньаҕа (Ил Түмэнэ) сокуону көҕүлээһинин туһунан» уураахтар ылыллыахтаахтар.
Дальнай Восток эрэгийиэнигэр гражданнарга босхо гектар сири биэрии туһунан боппуруоска Ил Түмэн икки уурааҕа таҕыста. Ил Түмэн хамыыһыйата тэриллибитэ. Судаарыстыбаннай Дууманы кытта үлэ барыаҕа. Эрдэттэн тугу эмэ быһаччы этэн кэбиһэр табыллыбат. Үлэлиэхпит.
Мииринэй улууһугар хвостохранилище кумаҕа сууллубут боппуруоһугар оробуочай мунньахтар тэрилиннилэр. 5 «төгүрүк остуол» тэриллэн ыытылынна. Нам улууһугар сири туһаныы, Хаҥаласка ураты харыстанар сирдэр кыраныыссаларын тустарынан боппуруостарга, Амма өрүс экологиятыгар кэпсэтии тура сырытта.
Тус бэйэм РФ Судаарыстыбаннай Дууматын алта мунньаҕар кытынным, үстэ тыл эттим. Кэмитиэт бу үүммүт сылга бэйэтэ ылыммыт былаанын кытаанахтык тутуһан үлэлиэҕэ. Ол онтон сорох-сорохторун ааттаталаатахха, Ил Түмэн Судаарыстыбаннай Дуумаҕа өссө эрдэ киллэрбит «Сир аннын туһунан» федеральнай сокуоҥҥа сокуону көҕүлээһинин туһунан туруорбут боппуруоһугар салгыы үлэ ыытыллыаҕа. Эмиэ ол курдук, Дальнай Востоктааҕы уонна Забайкальетааҕы парламент ассоциациятын үлэтигэр кыттыыны ылыахпыт. Ньурба улууһун Марха өрүһүн экологиятын боппуруоһугар парламент истиитин ыытарга былаанныыбыт.
Былаан да, үлэ да элбэх. Ол биһигини чаҕыппат, төттөрүтүн үөрдэр. Бүттүүммүт сыралаах үлэтиттэн эрэ, өрөспүүбүлүкэбит уонна дойдубут туохха да туура тэптэрбэт бөҕө тирэхтэниэҕэ.
Прокопий ИВАНОВ суруйда.