Дьон-сэргэ итинник быһаарыныыны кэтэспитэ

Ыам ыйын 21 күнүгэр Усуйаана улууһугар Депутатскайга улуус социальнай-экономическай сайдыытыгар туһуламмыт мунньахха өрөспүүбүлүкэ Ил Дархана Айсен Николаев «О стандартах структуры и параметров минимальной сети объектов социальной инфраструктуры Республика Саха (Якутия)» диэн 202 №-дээх уурааҕы тохтотор туһунан сүбэлээһини бырабыыталыстыбаҕа оҥордо.

Биллэрин курдук, ити уураах тула үгүс санаа атастаһыыта барбыта, дьон улаханнык аймаммыта. Санатар эбит буоллахха, ити уурааҕы Евгений Чекин бэрэссэдээтэллээх бырабыыталыстыба урукку састааба 2018 сыл бэс ыйын 25 күнүгэр ылынан турар.

Ил Дархан сорох министерстволар ситэ быһаарар үлэни ыыппатахтарын, сорох общественнай тэрилтэлэр, политическай партиялар нэһилиэнньэҕэ сыыһа өйдөбүлү тириэрдэллэрин түмүгэр айманыы тахсыбытын бэлиэтээтэ.

— 202 №-дээх уураах сүбэлээһин характердааҕынан, өрөспүүбүлүкэ бырабыыталыстыбатын бэрэссэдээтэлигэр Владимир Солодовка тохтоторугар сүбэлиэм. Ол оннугар 2019 сыл балаҕан ыйын 1 күнүгэр диэри бырабыыталыстыба саҥа уурааҕа ылыллыаҕа. Онно хас биирдии улууска чуолкай уонна сөбүлэһиллибит быһаарыылар баар буолуохтара. Саҥа уураахха штаты сарбыйыы туһунан буолбакка, бюджет эйгэтин салайыы ситимин ситэрии туһунан этиллиэҕэ, – диэн ол мунньахха Айсен Николаев санаатын үллэстибитэ.

Ил Дархан өрөспүүбүлүкэ бырабыыталыстыбата салгыы бюджет эйгэтин ситэрэн-хоторон биэриигэ үлэлэһиэҕин туһунан бэлиэтиир. Бу үлэ көдьүүстээх буоларын туһугар уонна Саха сирин хас биирдии олохтооҕо көмүскэллээҕин, холкутук олорорун билинэрин курдук гына, гражданскай обществоны кытта ыкса ситимнээхтик ыытыллыаҕын туһунан ыйар.

— Туһата кыра бюджет тэрилтэлэрин, салайар персоналлары аччатыы политикатын ыытарбытын кистээбэппин. Тоҕо диэтэр, ити кэм ирдэбилэ. Ити барыта хас биирдии бюджет солкуобайа көдьүүстээхтик ороскуоттанарын уонна өрөспүүбүлүкэ олохтоохторугар туһаны аҕаларын туһуттан оҥоһуллар, – диэн Ил Дархан Айсен Николаев эттэ.

Кистэл буолбатах, дьон-сэргэ өрөспүүбүлүкэ аҕа баһылыгыттан итинник этии оҥоһулларын сэмээр кэтэспитэ. Ил Дархан итинник сөптөөх быһаарыныы ылыммытыттан норуот астыммыта саарбаҕа суох.

Людмила НОГОВИЦЫНА