Федерация Сэбиэтигэр Саха Өрөспүүбүлүкэтин күннэрэ саҕаланнылар

Ахсынньы 13 күнүгэр Федерация Сэбиэтин бюджекка уонна үп рыногар кэмитиэтин киэҥ ыҥырыылаах мунньаҕар Саха Өрөспүүбүлүкэтин холобуругар нолуок сокуоннарын тупсарыы боппуруостарын көрдүлэр.
Ахсынньы 14 күнүгэр федеративнай тутулга, регион политикатыгар, олохтоох салайыныыга кэмитиэт мунньаҕар Арк­тика зонатын сайыннарыыга уонна Саха Өрөспүүбүлүкэтигэр инфраструктураҕа хааччахтааһыны туоратыыга сокуоннары тупсарыы боппуруоһун дьүүллэһиэхтэрэ.
Аграрнай, ас-үөл политикатыгар уонна айылҕаны туһаныы кэмитиэтигэр Саха сирин агропромышленнай комплексын сайдыытын уонна айылҕа ресурсатын табыгастаахтык туһаныыны хааччыйыы боппуруостарын ырытыһыахтара.
Бу күн социальнай политика кэмитиэтигэр Саха сирин социальнай сайдыытын боппуруоһун кэпсэтиэхтэрэ. Экономика политикатыгар кэмитиэккэ экономика тэтимнээхтик сайдыытын харгыстыыр инфрастуктура хааччаҕын туоратыыны дьүүллэһиэхтэрэ.
Наука, үөрэх уонна култуура кэмитиэтигэр Саха сирин сайдыытыгар наука оруолун ырытыахтара.
Ил Түмэн дьокутааттара, СӨ Конституционнай суутун бэрэстэбиитэллэрэ, Бырабыыталыстыба чилиэннэрэ конституционнай сокуоннарга уонна судаарыстыбаннай тутулга кэмитиэт “төгүрүк остуолугар” кыттыахтара.
Ахсынньы 15 күнүгэр Федерация Сэбиэтин Бэрэссэдээтэлэ Валентина Матвиенко Ил Дархан Егор Борисовы уонна Ил Түмэн Бэрэссэдээтэлэ Александр Жиркову, сенатордар Александр Акимовы, Вячеслав Штырову кытары көрсүөҕэ.
Валентина Матвиенко, Егор Борисов, Александр Жирков Федерация Сэбиэтин дьиэтигэр Саха Өрөспүүбүлүкэтин билиһиннэрэр быыстапканы көрүөхтэрэ.
Ахсынньы 15 күнүгэр Федерация Сэбиэтин пленарнай мунньаҕар «Россия Федерациятын субъегын чааһа» буолуоҕа. Ил Түмэн спикерэ Александр Жирков Саха Өрөспүүбүлүкэтин социальнай-экономическай сайдыытын сокуонунан хааччыйыы тирээн турар проблемаларын туһунан дакылааты оҥоруоҕа.
Москваҕа «Экспоцентр» Киин быыстапкалыыр комплекска Саха Өрөспүүбүлүкэтин Ил Түмэнэ Башкортостан Курултайын, Краснодарскай, Красноярскай кыраайдар, Иркутскай уобалас парламеннарын кытары бииргэ үлэлэһиигэ сөбүлэһии түһэрсиэҕэ.
Бу күн Ил Түмэн делегацията Москваҕа Саха сирин күннэрин аһыллыытыгар кыттыыны ылыаҕа.
Ахсынньы 16 күнүгэр өрөспүүбүлүкэ дьокутааттара Максим Аммосов уонна репрессия сиэртибэлэрин пааматынньыктарыгар “Коммунаркаҕа», Өксөкүлээх Өлөксөй уҥуоҕар сибэкки уонна венок ууруохтара.