Хаарчаана — доҕордоһуу бэлиэтэ

Хаарчаана 2016 сыл сэтинньи 30 күнүгэр “Орто дойду” зоопаркаҕа төрөөбүтэ. Кини ийэтэ Колымана 2012 с. Саха сирин Аллараа Халыма оройуонугар Эһэлэр арыыларын архипелагар булуллубута. Эһэ дьиэ кэргэнин үөскэтиигэ анаан Ленинград зоопаркатын кытта дуогабар түһэрсиллибитэ итиэннэ 2012 сыл ахсынньытыгар Саха сирин зоопаркатыгар Ломоносов диэн эһэ оҕотун ыыппыттара. Хаарчаана – Колымана уонна Ломоносов бастакы оҕолоро. Бу Саха сиригэр үрүҥ эһэ хааччахха төрөөбүт бастакы түгэнэ буолар. «Орто дойду» уонна Ленинград зоопаркатын икки ардыларыгар сөбүлэһии быһыытынан, тыһы эһэ оҕотун хотугу киин куоракка ыыттылар.
Бу үөрүүлээх сиэргэ-туомҥа Саха сирин Баһылыга Егор Борисов, Санкт-Петербург күбүрүнээтэрэ Георгий Полтавченко, СӨ бастакы Президенэ, СӨ Судаарыстыбаннай сүбэһитэ Михаил Николаев, Ил Түмэн Бэрэссэдээтэлин бастакы солбуйааччы Анатолий Добрянцев, Ил Түмэн судаарыстыбаннай тутууга уонна сокуону оҥорууга сис кэмитиэтин бэрэссэдээтэлэ Алексей Еремеев, сир сыһыаннаһыыларыгар, айылҕа баайыгар уонна экологияҕа сис кэмитиэт бэрэссэдээтэлэ Владимир Прокопьев, Ил Түмэн Хоту сир төрүт олохтоох аҕыйах ахсааннаах норуоттарын боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева, норуот депутаттара Василий Власов, Александр Кошуков, Сергей Ларионов кытыннылар.

Саха сирин Баһылыга Егор Борисов санаппытынан, бу бэлиэ түгэн РФ-ҕа Экология сылыгар буолар. «Биһиги бүгүн ыраах Саха сириттэн сиэн кыыһы эбээтигэр төннөрөбүт. Хаарчаана – Саха сирин уонна Санкт-Петербург икки ардыларыгар сибээс бэлиэтэ, биһиги уопсай үлэбит түмүгэ», — диэтэ Ил Дархан уонна бу дьикти харамай Санкт-Петербург олохтоохторун уонна ыалдьыттарын үөрдэригэр баҕарда.
Егор Борисов Хаарчаана төрдүн-ууһун туһунан сертификаты уонна ийэтин Колымананы кытта түспүт хаартыскатын Георгий Полтавченкоҕа туттарда.
Георгий Полтавченко бу түгэн Санкт-Петербург уонна Саха сирин икки ардыларыгар доҕордоһууну бигэргэтэрин бэлиэтээтэ уонна Хаарчаана эбэтэ Услада – Ленинград зоопаркатын киэн туттуута буоларын эттэ. Кини быйыл сэтинньи 19 күнүгэр үбүлүөйдээх 30 сылын туолбут. Услада 10 төгүл оҕоломмут, 16 эһэчээҥҥэ олоҕу бэлэхтээбит, олор аан дойду араас зоопаркаларынан тарҕаммыттар.
Георгий Полтавченко Санкт-Петербург бары олохтоохторун, бастатан туран, оҕолор ааттарыттан Егор Борисовка, Саха сирин дьонугар бэртээхэй бэлэхтэрин иһин махтанна. «Кэнэҕэс да биһиги эйэлээх халлаан анныгар доҕордоһо, маннык үтүө бэлэхтэри атастаһа туруоҕуҥ, кылаабынайа – биһиги бары бииргэбит, биһиги – биир сомоҕо, аан дойдуга саамай бастыҥ дойду буоларбытын өйдүөххэйиҥ”, — диэтэ Георгий Полтавченко.
Саха сирин Баһылыга Егор Борисов уонна Санкт-Петербург күбүрүнээтэрэ Георгий Полтавченко тэҥҥэ быыс ааны аһан Хаарчаананы арҕаҕыттан дьон көрүүтүгэр таһаардылар.
Мантан инньэ Саха сириттэн кэлбит үрүҥ эһэ оҕото Ленинград зоопаркатын олохтооҕо буолла.
Салгыы Россия этнографическай музейыгар “Саха Өрөспүүбүлүкэтин барҕа баайа” быыстапка аһылынна.

Бэлэмнээтэ Елена БАИШЕВА.

Василий КОНОНОВ хаартыскаҕа түһэриилэрэ.