11 декабря 2017 в 13:39

Күлүмнүүр өйдөбүлэ — Санкт-Петербург килбэйэр киинигэр

Санкт-Петербурга Саха сирин күннэрин чэрчитинэн Ил Түмэн Бэрэссэдээтэлэ Александр Жирков баһылыктаах өрөспүүбүлүкэ народнай депутаттара «Бродячая собака» литературнай-артистическай кулуупка сырыттылар. Бу саха дьонугар бэлиэ миэстэ Саха сирин уһулуччулаах общественнай, политическай деятелэ, XIX үйэ бүтүүтүгэр – XX үйэ саҥатыгар либеральнай-демократическай интеллигенция лидерэ, сырдатааччы Василий Васильевич Никифоров – Күлүмнүүр аатын кытта сибээстээх.

Ил Түмэн спикерэ Александр Жирков көҕүлээһининэн Санкт-Петербург номоххо киирбит миэстэтигэр Василий Васильевич Никифоров – Күлүмнүүр аата үйэтитиллибитэ. Ол курдук, 2016 с. сэтинньи 8 к. арт-кулуупка сылдьыбыт биллиилээх дьоҥҥо анаммыт хартыына галереятыгар Күлүмнүүр мэтириэтин туттарыы сиэрэ-туома ыытыллыбыта.
Тэрээһиҥҥэ Ил Түмэн Бэрэссэдээтэлин бастакы солбуйааччыта Анатолий Добрянцев, сис кэмитиэттэр бэрэссэдээтэллэрэ Алексей Еремеев, Владимир Прокопьев, Елена Голомарева, норуот депутата Александр Кошуков, уо.д.а. кытыннылар.
Ыалдьыттарга арт-кафе директора Евгения Аристова кулууп историятын кэпсээтэ. Бу ХХ үйэ саҥатыгар култуура киинигэр театр туруоруулара, поэзия уонна музыка киэһэлэрэ, поэттары, суруйааччылары, артыыстары уо.д.а. чиэстээһин буолаллара. “Үрүҥ көмүс үйэ” уһулуччулаах бэрэстэбиитэллэрэ: Анна Ахматова, Осип Мандельштам, Николай Гумилев, Владимир Маяковскай, Константин Станиславскай, Владимир Немирович-Данченко, о.д.а. сылдьаллара. «Бродячая собака» саҥа үйэтэ 2000 сылга саҕаламмыта.

Ил Түмэн Бэрэссэдээтэлэ Александр Жирков, мустубут дьону эҕэрдэлииригэр, Василий Васильевич Никифоров – Күлүмнүүр 1913 сылга Саха сирин делегациятын састаабыгар Санкт-Петербурга Романовтар Дьиэлэрэ 300 сылыгар анаммыт тэрээһиннэргэ кыттыбытын санатта.
“Кини судаарыстыбаннай дьыалаларын таһынан, Петербург публикатыгар саха тылынан драматическай айымньыны билиһиннэрэр кичэмэ санаалааҕа. Адвокат, кэнники А.Ф.Керенскай Бырабыыталыстыбатыгар юстиция миниистиринэн буолбут Александр Сергеевич Заруднай ыҥырыытынан кини «Бродячая собака» кафеҕа сылдьыбыта уонна онно бэйэтин «Манчаары» пьесатын аахпыта. Пьесаны манна иһитиннэриитин түмүгэр Василий Никифоров «Манчаары» пьеса нууччалыы тылбааһын туруорууга цензура көҥүлүн ылары ситиспитэ. Бу пьеса саха драматургиятын историятыгар бастакы айымньынан буолбута», — диэтэ Ил Түмэн спикерэ.
Александр Жирков салгыы биэчэр кыттыылаахтара бу бэлиэ миэстэҕэ уһулуччулаах дьоҥҥо ытыктабылы биллэрэллэрин бэлиэтээтэ.
Саха сирин парламенын Бэрэссэдээтэлэ арт-кафе директора Евгения Аристоваҕа бииргэ үлэлээһинин иһин махталы биллэрдэ уонна Күлүмнүүр төрүттээбит саха тылынан бастакы хаһыат, сурунаал историятын туһунан кинигэни бэлэхтээтэ.