Парламентарийдар Мариинскай дыбарыаска көрүстүлэр

Саха сирин народнай депутаттарыгар анаан Мариинскай дыбарыаска — Санкт-Петербург Сокуону оҥорор мунньаҕын офи­циальнай резиденциятыгар экскурсия тэрийдилэр.
Ыалдьыттар парламент иһитиннэрэр-сырдатар киинигэр сырыттылар. Петербург парламена атаҕар туруутун историятыгар анаммыт мусуой экспозициятыгар сэдэх экспонаттар: куорат Конституциятын дьиҥнээх докумуона — Санкт-Петербург Устааба, герой-куорат судаарыстыбаннай наҕараадалара: Кыһыл Знамя уордьана, Октябрьскай өрөбөлүүссүйэ уордьана, “Золотая Звезда Героя» мэтээл, икки Ленин уордьана уо.д.а. үгүс харалла сыталлар.

Мариинскай дыбарыас Кы­һыл саалатыгар буолбут тэрээһиҥҥэ СӨ Ил Түмэнин Бэрэссэдээтэлэ Александр Жирков, Ил Түмэн Бэрэссэдээтэлин бастакы солбуйааччыта Анатолий Добрянцев, парламент судаарыстыбаннай тутууга уонна сокуону оҥорууга сис кэмитиэтин бэрэссэдээтэлэ Алексей Еремеев, сир сыһыаннаһыыларыгар, айылҕа баайыгар уонна эколо­гияҕа сис кэмитиэт бэрэссэдээтэлэ Владимир Прокопьев, Хоту сир төрүт олохтоох аҕыйах ахсааннаах норуоттарын боппуруостарыгар уонна Арктика дьыа­лаларыгар сис кэмитиэтин бэрэссэдээтэлэ Елена Голомарева, өрөспүүбүлүкэ народнай депутаттара Василий Власов, Александр Кошуков кытыннылар.
Санкт-Петербург парламеныттан бэрэстэбиитэллэр – Сокуону оҥорор Мунньах Бэрэссэдээтэлэ Вячеслав Макаров, Бэрэссэдээтэл солбуйааччыта Анатолий Дроздов, Сокуону оҥорор Мунньах редакциялыыр хамыыһыйатын бэрэссэдээтэлэ Сергей Купченко, Аппараат салайааччыта Михаил Субботин.

Ыспыраапка

Мариинскай дыбарыас — Николай I кыыһын Улуу княгиня Марии Николаевна дьиэ кэргэнигэр анаан 1845 сылга тутуллубут архитектура уонна история уһулуччулаах пааматынньыга. 1885 сыл олунньу 11 к. дыбарыаһы Россия судаарыстыбаннаһын киинин быһыытынан үөрүүлээх быһыыга-майгыга сибэтии гыммыттар итиэннэ онно судаарыстыбаннай уорганнар: Судаарыстыбаннай Сэбиэт, Миниистирдэр кабинеттара, кэлин Бириэмэннэй Бырабыыталыстыба, Ленсовет, Петросовет олохсуйа сылдьыбыттар. 1945 сылтан ыла Мариинскай дыбарыас куорат бэрэстэбиитэллээх былааһын резиденциятынан буолар. 1994 сылтан манна Санкт-Петербург Сокуону оҥорор Мунньаҕын депутаттара үлэлииллэр.

Парламентарийдар Саха Өрөспүүбүлүкэтин уонна Санкт-Петербург былааһын сокуону оҥорор уорганнара бииргэ үлэлээһин туһунан 2015 с. ахсынньы 15 к. илии баттаммыт Сөбүлэһии чэрчитинэн үлэ сүрүн хайысхаларын дьүүллэстилэр.
Санкт-Петербург Сокуону оҥорор Мунньаҕын Бэрэссэдээтэлэ Вячеслав Макаров көрсүһүү кыттыылаахтарын эҕэрдэлээн туран, регион парламенын үлэтигэр бастакы суолталаах хайысхаларга тохтоото. Кини бииргэ үлэлээһин туһунан Сөбүлэһиини олоххо киллэрии түмүгэр Санкт-Петербург уонна Саха сирин сокуону оҥорор уорганнарын икки ардыларыгар сыһыаннар балайда бөҕөргөөбүттэрин бэлиэтээтэ.
«Ити докумуон төрүтүгэр сокуону оҥорууга бииргэ үлэлээһин акылаата ууруллубута. Регионнар икки ардыларыгар бигэ сибээстэр дойду политическай да, социальнай-экономическай да өттүнэн сайдыытын суолталаах бэлиэтинэн буолаллар. Россия Федерациятын субъектара бииргэ үлэлээһиннэрин бөҕөргөтүү кинилэр хас биирдиилэрин кыахтарын муҥутуур толору олоххо киллэриигэ көмөлөһөр аналлаах”, — диэтэ Санкт-Петербург парламенын спикерэ.
Вячеслав Макаров Саха сирин уонна Санкт-Петербург икки ардыларыгар хардарыта үлэлээһини салгыы дириҥэтии регионнар олохтоохторун интэриэстэригэр эппиэттииригэр эрэнэрин биллэрдэ.
«Петербург олохтоохторо Саха Өрөспүүбүлүкэтин Күн­нэрин чэрчилэринэн ыытыллар тэрээһиннэри улаханнык кэрэхсээбиттэрин бары көрдүбүт”, — диэн бэлиэтээтэ Хотугу киин куорат бэрэссэдээтэлэ.

СӨ Судаарыстыбаннай Мунньаҕын (Ил Түмэнин) Бэрэссэдээтэлэ Александр Жирков Саха сирэ уонна Санкт-Петербург өрдөөҕүттэн бигэ сибээстэри тутуһалларыгар болҕомтону туһаайда.
«Историяҕа киирбитинэн, чуолаан Нева үрдүгэр куоракка дойду регионнарын салайыы олуктара ууруллубуттара, ол курдук, XVII үйэттэн саҕалаан олохтоох саха бас-көс дьоно, XIX үйэ бүтүүтүгэр – ХХ үйэ саҕаланыытыгар саха интеллигенциятын бэрэстэбиитэллэрэ Россия империятыгар регионнары салайыы тиһигин олохсутууга эрчимнээхтик кыттыбыттара. Ити сибээстэр 1917 сыллааҕы Өктөөп өрөбөлүүссүйэтин кэнниттэн эмиэ салҕаммыттара. Ленинград биһиги өрөспүүбүлүкэбитигэр кадрдары үүннэрэр кыһанан буолбута. Санкт-Петербург өрөспүүбүлүкэ сайдыытыгар ыйааһыннаах кылаатын салгыы киллэрэр», — диэтэ Александр Жирков.
Ил Түмэн спикерэ бэлиэтээбитинэн, Саха Өрөспүүбүлүкэтин Судаарыстыбаннай Мунньаҕын (Ил Түмэн) уонна Санкт-Петербург Сокуону оҥорор Мунньаҕын икки ардыларыгар 2005 сыл ахсынньы 8 к. бииргэ үлэлээһин туһунан Сөбүлэһиигэ илии баттаныаҕыттан сокуону айан оҥорууга уопуту атастаһыы сыллата күүһүрэр. Парламеннар икки ардыларыгар бииргэ үлэлиир туһунан Сөбүлэһии 2015 сыл ахсынньы 15 к. түһэрсиллибитэ. Итинэн сибээстээн сокуону таһаарыыга бииргэ үлэлээһини кэҥэтиигэ уонна чопчулааһыҥҥа саҥа кыах­тар үөскээтилэр.
СӨ Ил Түмэнин Бэрэссэдээтэлэ Александр Жирков Санкт-Петербург Сокуону оҥорор Мунньаҕын Бэрэссэдээтэлэ Вячеслав Макаровка  «Саха сирэ Россияны кытта 385 сыл» өйдөбүнньүк бэлиэни туттарда.
Депутаттар бииргэ үлэ­лээһин кэскиллэрин дьүүл­лэһии кэмигэр регионнар кыттыгас бырайыактарын олоххо киллэриигэ уонна сокуону көҕүлээһиннэри хамсатыыга хардарыта үлэлээһин боппуруостарыгар тохтоотулар.
Өрөспүүбүлүкэ народнай депутаттара Санкт-Петербург парламентарийдарын Саха сиригэр официальнайдык кэлэ сылдьалларыгар ыҥырдылар.

Бэлэмнээтэ Елена БАИШЕВА.