Саха сирэ уонна Санкт-Петербург: бииргэ үлэлээһин сайдар

Тэрээһин саҕаланыан иннинэ делегация чилиэннэригэр Смольнай историческай дьиэтин көрдөрдүлэр. Ыалдьыттар ордук В.И.Ленин үлэлээбит кабинетын кэрэхсээтилэр.
Мунньах кэмигэр Санкт-Петербург Бырабыыталыстыбатын уонна СӨ Бырабыыталыс­тыбатын икки ардыларыгар бииргэ үлэлээһин туһунан 2012 с. сэтинньи 27 к. илии баттаммыт Сөбүлэһиини олоххо киллэрии барыллааһын түмүктэрин таһаардылар.
Санкт-Петербург күбү­рү­нээтэрэ Георгий Полтавченко эҕэрдэ тылыгар кэнники сылларга Санкт-Петербург уонна Саха сирин икки ардыларыгар бииргэ үлэлээһин күүһүрэн иһэрин, 2015 сылы кытта тэҥнээтэххэ, 2016 сылга табаар эргиирэ 3 төгүл улааппыта ону бигэргэтэрин эттэ.

Салгыы кини Арктиканы баһылааһын федеральнай бырагырааматын олоххо киллэрии чэрчитинэн бииргэ үлэлээһиҥҥэ Санкт-Петербург научнай, үөрэҕин тэрилтэлэрин, кадрдарын уонна оҥорон таһаарар кыаҕа күүс-көмө буолуоҕун бэлиэтээтэ.
Саха Өрөспүүбүлүкэтин Баһылыга Егор Борисов быйыл Саха сирэ Россия судаарыстыбатын састаабыгар киириитин 385 сыла бэлиэтэнэрин, регион историческай сайдыытыгар, хотугу кыраайы баһылааһыҥҥа, үөрэх, наука, култуура сайдыытыгар, алмаас бырамыысыланнаһын үөскэтиигэ Санкт-Петербург ураты оруоллааҕын санатта.
Ил Дархан өрөспүүбүлүкэ социальнай-экономическай сайдыытын бастакы суолталаах бырайыактарыгар тохтоото уонна Арктикаҕа бырайыактары олоххо киллэриигэ өрөспүүбүлүкэ Санкт-Петербуру кытта бииргэ үлэлииргэ бэлэмин бэлиэтээтэ.
СӨ тас сибээстэргэ Департаменын салайааччыта Владимир Васильев өрүттэр бырабыыталыстыбаларын икки ардыларыгар 2012 сылга түһэрсиллибит бииргэ үлэлээһин туһунан Сөбүлэһиини олоххо киллэрии 2017 с. түмүктэрин туһунан кэпсээтэ.
Владимир Васильев Санкт-Петербург мэлдьи да өрөс­пүүбүлүкэҕэ кадрдары үүннэрэр кыһанан буоларын, Саха сирин кэлимсэ чинчийиигэ, Арктика сайдыытыгар, Хотугу муора суолун чөлүгэр түһэриигэ, хостуур уонна геологическай чинчийии салааларыгар научнай сибээстэри сайыннарыы ураты суолталааҕын эттэ.
Кини, чуолаан, импорт солбуллуутугар бииргэ үлэ­лээһиҥҥэ болҕомтону тарта.
Санкт-Петербург предпринимательствоны уонна потребительскай ырыынагы сайыннарыыга Кэмитиэтин бэрэссэдээтэлэ Эльгиз Качаев Саха сирин тэрилтэлэрин бородууксуйатын таһаарыыга предпринимателлэр икки ардыларыгар сибээстэри олохтуур наадалааҕын бэлиэтээтэ.
Санкт-Петербург бырамыысыланнас политикатыгар уонна инновацияларга Кэмитиэтин бэрэссэдээтэлэ Максим Мейксин үрдүк технологиялар, судноны тутуу, радиоэлектроника, эми оҥоруу, ас-үөл бырамыысыланнаһын салааларыгар бииргэ үлэлээһин сайдыан сөбүн эттэ.

Саха сирин култуураҕа уонна духуобунай сайдыыга миниистирэ Владимир Тихонов култуура эйгэтигэр бииргэ үлэлээһин сүрүн туһаайыыларыгар сиһилии тохтоото. Кини бу сылларга Саха сирин артыыстара Санкт-Петербург аан дойдуга биллэр театральнай уонна кэнсиэрдиир былаһааккаларыгар култуура уонна искусство ситиһиилэрин көрдөрөр кыахтанан, профессиональнай, толорор маастарыстыбалара балайда үрдээбитин эттэ.
Салгыы ыччат политикатыгар бииргэ үлэлээһин боппуруостара таарылыннылар, чуолаан, устудьуоннар тутар этэрээттэрин атастаһыы, Саха сириттэн волонтердар аан дойду футболга чемпионатын ыытыыга кыттыылара былааннанар.
СӨ үөрэҕин уонна наукатын миниистирин бастакы солбуйааччы Михаил Присяжнай Санкт-Петербург 40 үрдүк үөрэҕин тэрилтэтигэр Саха сириттэн 1,5 тыһ. тахса устудьуон үөрэнэрин, өрөспүүбүлүкэ экономикатын уонна социальнай эйгэтин үрдүк бэлэмнээх кадрдарынан хааччыйыыга анаан тус сыаллаах контрагынан үөрэтии салҕанарын иһитиннэрдэ.
Көрсүһүү чэрчитинэн Санкт-Петербург Адмиралтейскай оройуонун Администрациятын уонна СӨ “Жатай” Куораттааҕы уокуругун Администрациятын икки ардыларыгар эргиэҥҥэ-экономикаҕа, наукаҕа-техникаҕа, үөрэххэ, социальнай уонна култуура эйгэлэригэр бииргэ үлэлээһин туһунан Сөбүлэһиигэ илии баттанна. Докумуоҥҥа Санкт-Петербург Адмиралтейскай оройуонун администрациятын баһылыга Светлана Жукова уонна “Жатай” куорат уокуругун баһылыга Анатолий Кистенев илии баттаатылар.

Көрсүһүү түмүгэр Саха Өрөспүүбүлүкэтин Баһылыга Егор Борисов Санкт-Петербург күбүрүнээтэрэ Георгий Полтавченкоҕа “Саха сирэ Россияны кытта 385 сыл” өйдөбүнньүк бэлиэни туттарда.