303
11 декабря 2017 в 13:40
Сотору Федерация Сэбиэтигэр — Саха Өрөспүүбүлүкэтин күннэрэ
Ил Түмэн пресс-сулууспата иһитиннэрбитинэн, Саха Өрөспүүбүлүкэтин Судаарыстыбаннай Мунньаҕын (Ил Түмэн) Бэрэссэдээтэлэ Александр Жирков ахсынньы 6 к. Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар Кэмитиэтин Федерация Сэбиэтигэр Саха Өрөспүүбүлүкэтин Күннэрин ыытыыга аналлаах түмүктүүр мунньаҕар кыттыыны ылла. Көрсүһүүнү кэмитиэт бэрэссэдээтэлэ Олег Мельниченко ыытта.
Мунньахха итини тэҥэ ФС федеративнай тутулга, регион политикатыгар, олохтоох салайыныыга уонна Хоту сир дьыалаларыгар Кэмитиэтин бэрэссэдээтэлин солбуйааччы Александр Акимов, СӨ экономикаҕа миниистирин солбуйааччы Тарас Попов, СӨ тырааныспарга уонна суол хаһаайыстыбатыгар миниистирин солбуйааччы Александра Рофе, Ил Түмэн аппараатын салайааччы солбуйааччыта Александр Зыков бааллар.
Мунньах кыттыылаахтара ахсынньы 13-15 күннэригэр Федерация Сэбиэтигэр Саха сирин күннэрин ыытыыга бэлэмнэниини уонна ФС туһааннаах кэмитиэттэрин быһаарыыларын барылларын дьүүллэстилэр. Итини сэргэ Саха Өрөспүүбүлүкэтин социальнай-экономическай сайдыытын туһунан Федерация Сэбиэтин уурааҕын барылын бэлэмнээһин хаамыытын туһунан иһитиннэрилиннэ.
Санатар буоллахха, быйыл ахсынньы 13-15 кк. Москваҕа Федерация Сэбиэтигэр Саха Өрөспүүбүлүкэтин күннэрин ыытыы чэрчитинэн алта кэмитиэт киэҥ ыҥырыылаах мунньахтара тэриллэр. Ити мунньахтарга Арктика зонатын сайдыытын туһунан сокуону оҥоруу, нолуок сокуоннарын тупсарыы, Саха сирин социальнай сайдыытын, агропромышленнай комплекс уонна айылҕаны сөптөөхтүк туһаныы, регион сайдыытыгар наука оруолун үрдэтии уо.д.а. боппуруостар көрүллүөхтэрэ. Ахсынньы 14 к. СӨ Конституционнай суутун уонна судаарыстыбаннай былааһын уорганнарын бэрэстэбиитэллэрэ кыттыыларынан Федерация Сэбиэтин конституционнай сокуоннары оҥорууга уонна судаарыстыбаннай тутууга Кэмитиэтин “төгүрүк остуола” буолуоҕа. Ахсынньы 15 күнүгэр “Россия Федерациятын субъегын чааһа” тэриллиэҕэ.
Ахсынньы 6 к. Саха сирин парламенын спикерэ Александр Жирков өрөспүүбүлүкэ народнай депутаттара Санкт-Петербург Сокуону оҥорор Мунньаҕын депутаттарын кытта көрсүһүүлэригэр кытта Санкт-Петербурга көттө.
