Аммаҕа оонньуулар 6 күн ыытыллыахтара

Быйыл Аммаҕа буолар Саха сирин норуоттарын VII оонньууларын аһыы сиэригэр-туомугар 2500 киһи кыттыаҕа. Ыалдьытымсах Амма сирэ өрөспүүбүлүкэ олохтоохторун эрэ буолбакка, Россия регионнарыттан кэлбит ыалдьыттары көрүстэ.

От ыйын 3-8 күннэригэр Амма улууһугар өрөспүүбүлүкэ сүрүн спортивнай форума – Саха сирин норуоттарын VII Спортивнай оонньуулара ыытыллаллар. Манна 2734 спортсмен уонна тренер, Саха сирин араас оройуоннарыттан 15 тыһ. киһи кыттыаҕа. Спортсменнар спорт 16 көрүҥэр илин-кэлин түсүһүөхтэрэ: боксаҕа, көҥүл тустууга, чэпчэки атлетикаҕа, остуол тенниһигэр, баскетболга, волейболга, буулдьанан ытыыга, спортиҥҥа, оҕунан ытыыга, саахымакка, дуобакка, мини-футболга, чэпчэки атлетикаҕа (адаптивнай спорт), олорон эрэ волейболга (адаптивнай спорт), пляжнай волейболга, аэробикаҕа.
Амма улууһун баһылыга Николай Архипов иһитиннэрбитинэн, Оонньууларга Амма спортсмена кыайдаҕына, муниципалитет киниэхэ бириис быһыытынан сир учаастагын аныырга бэлэм. Кини салгыы бэлиэтээбитинэн, күрэхтэһиилэри аһыыга уонна сабыыга билиэттэр нэһилиэнньэ чэпчэтиилэринэн туһанар араҥатыгар босхо буолуохтара.
Саха сирин норуоттарын спортивнай оонньуулара түөрт сылга биирдэ өрөспүүбүлүкэ араас улуустарыгар ыытыллаллар.
Бэлиэтээтэххэ, оонньуулары ыытыы – бу оройуон социальнай-экономическай сайдыытыгар улахан тэтими эбэр түгэн. Ол курдук быйылгы күрэхтэһиилэр хаһаайыннара Амма улууһугар Оонньуулары көрсө спорт адаптивнай көрүҥнэригэр элбэх функциялаах спорт саалата, Бөтүҥҥэ 220 миэстэлээх оскуола, Чапчылҕаҥҥа спорт саалата тутулуннулар, суоллар, күрэхтэһиилэр кыттыылаахтара олоруохтаах үөрэх уонна социальнай эйгэ объектара өрөмүөннэннилэр. Нэһилиэнньэлээх пууннары тупсарыыга улахан үлэ ыытылынна. Оройуоҥҥа 2500-тэн тахса мас, 300 тыһ. кэриҥэ сибэкки олордулунна. “Амма” трассатыгар өрөмүөн үлэтэ барар. Бэдэрээтчиттэр этэллэринэн, 2019 сылга былааннаммыт барыта толоруллуоҕа.
2022 сылга – Саха АССР тэрилли­битэ 100 сылыгар Саха Өрөспүүбү­лүкэтин норуоттарын спортивнай оонньууларын Уус-Алдан улууһа ыытыаҕа.
Улуус баһылыга Николай Архипов СИА корреспонденыгар бу курдук кэпсээтэ: «Аһыллыы кэрэхсэбиллээх буолуоҕа – манна комбайыннар да, сылгы үөрэ да, Бриллиантовай циркэ артыыстара кыттыахтара. Бу оонньуулар сүрүн ис хоһооннорунан номоххо киирбит тустуук Николай Захаров – Сахаачча өйдөбүлэ буолар. Биһиги киниэхэ бу оонньуулары аныыбыт, ол курдук ааспыт сылга төрөөбүтэ 70 сылын бэлиэтээбиппит. Оонньуулар ааспыт сылга буолуохтаах этилэр. Ол эрээри алдьатыылаах халаан уутуттан сылтаан көһөрүллүбүттэрэ».
От ыйын 3 күнүгэр Аммаҕа сарсыардаттан ыла Амма сирэ киэн туттар аатырбыт бөҕөһүн аатын үйэтитиигэ култуура тэрээһиннэрэ буоллулар — музей-дьиэ, Оҕо спортивнай оскуолатыгар спорка албан аат музейа аһылыннылар, кинигэ уонна киинэ сүрэхтэниитэ буолан ааста.
Оонньуулары үөрүүлээх бы­һыыга-майгыга аһыы от ыйын 4 күнүгэр ыытыллар. Архипов этэринэн, манна кырата 15 тыһ. киһи кэлэрэ күүтүллэр. Спорт бырааһынньыгар соҕотох мэһэйинэн күн-дьыл сөрүүнэ буолар, онон Амма ыраас уутугар сөтүөлүөн баҕалаах дьон туттуналлар.
«Биһиги Аммаҕа, Бөтүҥҥэ уонна Промкомбинакка анал сөтүөлүүр сирдэри бэлэмнээбиппит. Ол эрээри билигин онно кураанах», — диэтэ баһылык. Бу күннэргэ сөрүүн күннэр туруохтара — +16-18 кыраадыс. Ити эрээри өрөбүл күннэргэ салгын температурата +30 диэри үрдүүрэ күүтүллэр.
Волейбол матчын кэмигэр күүтүл­­лүбэтэх түгэн буолбутун үрдү­нэн, аммалар үтүөҕэ итиэннэ барыта былаанынан барарыгар эрэнэллэр.
«Спортсменнар туруктара ама, 9 киһи балыыһаҕа киирбитэ. Барыларын доруобуйаларын чинчийдилэр. Быраастары кытта кэпсэттибит, кинилэр эчэйиилэрэ кыра, тостуу суох. Ол да буоллар, спортсменка Светлана Муратованы санрейсынан Дьокуускайга ыыппыттара», — диэн СИА-ҕа Николай Архипов кэпсээтэ.