«Олорон эрэн оонньуур сүүрэ сылдьардааҕар ыарахан эбит”

Адаптивнай спорт көрүҥнэригэр күрэхтэһиилэр Амма улууһун Бөтүҥ нэһилиэгэр саҥа спорткомплекса хото бараллар. Мин чуолаан олорон эрэ волейболу бэрт сэҥээрэн көрдүм.

Сунтаар уонна Уус-Алдан хамаандата бэрт тыҥааһыннаахтык кииристэ. Сунтаардар ыалдьааччылара да “арасаа” бытыылкатыгар Амма тааһын уктан олорон, бэрт эрчимнээхтик сахсыйталаан, ыһыытаан-хаһыытаан хамаандаларыгар күүстээхтик көмөлөстүлэр. Сунтаар хамаандата бэрт эрчимнээхтик икки баартыйанан инники таҕыста. Оттон Уус-Алдан хамаандатыгар биир эрэ киһи илиитин өрө уунарын, ыһыытыырын-хаһыытырын таба көрөн, чуо тиийэн кэпсэттим. Онтум хамаанда суоппара Петр Сысолятин эбит. Иккиэлэспиччэ, хамаандабытыгар өссө күүскэ ыалдьан, ирэ-хоро кэпсэтэн тарҕастыбыт.

Петр Сысолятин, Уус-Алдан хамаандатын ыалдьааччыта: «Олорон эрэн волейбол көрөргө үчүгэй баҕайы, интэриэһинэй эбит. Ити көрдөххө судургу курдук эрээри, олорон эрэн оонньуур сүүрэ сылдьардааҕар ыарахан эбит дии санаатым. Хамаандабын күөдьүтэн, хаһыытаан күөмэйин бүтэ сыста. Муҥ саатар кыайтаран иһэрбит кыһыыта бэрт. Саатар биир баартыйаны ылбыт киһи. Ол да буоллар санаабытын  түһэрбэппит. Сунтаар хамаандата дьарыктааҕа биллэр. Биһиги хамаанда араас нэһилиэктэртэн хомуллан кэлбитэ. Өссө күүскэ эрчилиннэхпитинэ, инникитин үчүгэйдик оонньууһуктар диэн эрэлим улахан.

Саха сирин ахсыс спортивнай оонньуулара биһиэхэ буолуохтаах. Бэҕэһээ оонньуулар арыллыыларын көрөн сөҕүөн-сөхтүм! Оһуобай. Хаһан да итинник үчүгэй туруорууну көрө иликпин. Төһө да токуччу тоҥнорбун хам хараҕаланан олорон көрдүм. “Амма Олимп” тобус-толору киһи.

Биһиги улууспут, нэһилиэктэрбит салалтата кэлэн, көрөн бардылар. Онон Уус-Алдаҥҥа буолуохтаах оонньуулар эмиэ үрдүк таһымнаахтык ыытыллыахтара диэн эрэнэбин”.

Биһиги өрөспүүбүлүкэҕэ спорт адаптивнай көрүҥнэрэ кэнники кэмҥэ киэҥ биһирэбили ылаллар. Доруобуйаларыгар хааччахтаах дьон спортан туора турбатыгар, олоҕу кытта тэҥҥэ хардыылыырыгар оруола улахан. Бу бөҕөх санаалаах буолуу үтүө холобура буолар.

Ирина Ханды