Оонньуулар тыҥааһыннаахтык саҕаланнылар

От ыйын 3 күнүгэр Амма туоната үгүс ыалдьыты көрүстэ. Өлүөнэ эбэни уҥуордааччы бары кэриэтэ Амма диэки субуруйдулар. Этэргэ дылы, суол быыла хаптайбат. Аммаҕа айаннаан киирээти кытта дьон-сэргэ, массыына тоҕуоруспута, дьэрэкээн баннердар киһи хараҕар тута быраҕылыннылар. Улуус-улуус бэрэстэбиитэлэ бэйэтин спортивнай форматын кэтэ сылдьара олус үчүгэйдик көстөр. Олохтоох нэһилиэнньэ күө-дьаа буолан, сэргэхсийэн олороро биллэр. Ордук ыччат, оҕо аймах үөрүүтэ-көтүүтэ үгүс – сүүрүү-көтүү, оонньуу-көр ырааппыт.

Уопсайа оонньууларга быһа холоон 2500 тыһ спортсмен 16 көрүҥҥэ күрэс былдьаһар. Билиҥҥи туругунан 33 хамаандаттан 2231 спортсмен мандатнай хамыыһыйаны аастылар. 250 судьуйа оонньуулары дьүүллүүр.

Аммаҕа Саха сирин сэттис спортивнай оонньуулара бэрт тыҥааһыннаахтык саҕаланнылар. Бастакы күн хас да көрүҥҥэ күрэхтэһиилэр буол­лулар. Волейбол киирсиитэ, бэл, эчэйиилээх буолла. Ыалдьааччылар омуннарыгар ититэр систиэмэни хаххалыыр тутууга ыттан тахсан бэйэлэрин хамаандаларын күүртүлэр. Ол тутуу ыйааһын­нарын уйбакка сууллан түһэн Амма волейболист кыргыттарын эчэттэ. Дьолго, спортивнай оонньуулары араҥаччылыыр медицинскэй сулууспа тута кэлэн быһылааҥҥа түбэспит спортсменнарга суһал көмөнү оҥордо. Билиҥҥи туругунан дэҥнэммит спортсменнар туруктара этэҥҥэ, сорохтор оонньууларга кытыннылар.

Төһө да күһүҥҥүлүү сөрүүн күн турдар, дьон-сэргэ өрө күүрэн, үөрэн-көтөн сылдьарыттан көрдөххө, Амма сиригэр маннык киэҥ далааһыннаах тэрээһин буолбатаҕа быданнаабыт. Амма улууһун баһылыга Николай Архипов этэринэн, 1987 сыллаахха Манчаары оонньуулара буолбут. «Бу оонньуулары кэтэспиппит ыраатта. Улахан эбийиэктэр олоххо киирдилэр. Саамай үөрэрим диэн, олохтоох нэһилиэнньэ туох баар ыытыллар субуотунньуктарга, тэрээһин үлэтигэр көхтөөхтүк кыттыбыта буолар. Кылгас кэм иһигэр бары күргүөм үлэлээн Аммабыт нэһилиэктэрэ биллэ тубустулар. Онон бу курдук тэтиммитин ыһыктыбакка үлэлээтэхпитинэ Аммабыт олус түргэнник сайдыаҕа диэн эрэнэбин», — диэн баһылык үөрүүтүн үллэстэр.
Нэһилиэктэр салайааччылара уонна олохтоохтор этэллэринэн, саамай кылаабынайа, үлэ кэнниттэн талбыт спортивнай саалаҕа тиийэн дьарыктаныахха сөп. Бу ыччаты, олохтоохтору спорт бары көрүҥэр, чөл олоххо сыһыарарга суолтата улахан.
Оонньууларынан сибээстээн Амма нэһилиэктэригэр араас хабааннаах култуурунай тэрээһиннэр эмиэ буолаллар. 50-чэ дьону сааратар тэрээһин олохтоохтору, ыалдьыттары көһүтэр. Оонньуу арыллыыта уонна сабыллыыта ураты сөҕүмэр, олус сэргэх буолара күүтүллэр.

Ирина Ханды Дьокуускай-Амма