Оскуола ыскамыайкатыттан бэлэмниир соруктаахтар

Бу тэрээһин ХИФУ Мииринэйдээҕи Политехническай институтун уонна “Таас-Юрях Нефтегазодобыча” ХЭТ икки ардыларыгар бииргэ үлэлээһин чэрчитинэн ыытылынна. “Роснефть” хампаанньаҕа “Оскуола – ВУЗ – тэрилтэ” үөрэхтээһин быстыбат тиһигэ үлэлиир, ол эбэтэр кэнэҕэски исписэлиистэри оскуола ыскамыайкатыттан бэлэмнииллэр. Номнуо 2015 сылга институту кытта ньиэби, гааһы хостуур тэрилтэҕэ анаан кадрдары бэлэмнээһиҥҥэ, научнай-чинчийэр уонна бырайыактыыр үлэлэри ыытыыга, научнай-чинчийэр литератураны таһаарыыга, университет наукаҕа-методикаҕа уонна материальнай-техническэй базатын хаҥатыыга, сайыннарыыга бииргэ үлэлиир туһунан сөбүлэһии түһэрсиллибит.
Алтынньы 14 к. институкка сылдьыбыт үөрэнээччилэрдээх оскуолалар эмиэ ньиэп, гаас тэрилтэтин кытта бииргэ үлэлииллэр. Саха сиригэр 2015 сылтан “Роснефть” аатынан идэтийбит 3 кылаас баар: 2 кылаас Ленскэйгэ аһыллыбыт, 1 – Мииринэйгэ.

Оҕолор МПТИ лабораторияларыгар кэрэхсэбиллээх экскурсияҕа сырыттылар. Кинилэри 4 хамаандаҕа хайытан баран, интэриэһинэй сорудахтардаах маршрут лиистэрин туттардылар. Сорудахтарын ситиһиилээхтик толорбут хамаандаларга туһааннаах баллар туруоруллан истилэр. Бу кэрэхсэбиллээх квест-экскурсия (квест – компьютерынан оонньуу. – Аапт.) түмүгэр “Мазут” хамаанда кыайыылааҕынан таҕыста. Таас Үрэх орто оскуолатыттан бу хамаандаҕа 11-с кылаас үөрэнээччитэ Юлия Баишева кытынна.
Тэрээһиҥҥэ Мииринэйдээҕи политехни­ческай институт директора Евгений Эдуардович Соловьев эҕэрдэ тылы эттэ. Салгыы директор ситиһиилээхтик үөрэнэр устудьуоннарга корпоративнай истипиэндьийэлэри аныыр туһунан сертификаттары туттартаата.
Таас Үрэх оскуолатын 9-с кылааһын үөрэнээччитэ Юлия Иванова маннык кэпсиир: “Мин бу тэрээһини олус сөбүлээтим. Ол курдук олус сонуннук – квест быһыытынан буо­лан ааста. Үрдүк таһымҥа тэрийбиттэр: биһигини көрүстүлэр, кофе-брейк тэрий­дилэр, университет туһунан киинэни көрдөр­дүлэр.
Биһигини 4-с курс студентката салайан, “Индира хамаандата” диэн ааттаах этибит. Бу күрэххэ киһи этэ таһаарар тогун бэрэбиэркэлээтибит, оонньуу ыыттыбыт, биһиэхэ ньиэп хайдах сүүрэрин көрдөрдүлэр. Ордук психолог кабинетын өйдөөн хааллым”.
Нестор Евсеев, 9-с кылаас үөрэнээччитэ: “Мин институт саҥа куорпуһун олус сөбүлээ­тим. Бары кабинеттар саҥа техниканан хаач­чыл­лыбыттар. Дьиэ олус тупсаҕай, кырасыабай.
Квест олус кэрэхсэбиллээх буолла, араас оонньууга кытынныбыт. Биһиги манна Мииринэй куорат 26-с нүөмэрдээх оскуолатын үөрэнээччилэрин кытта билсэн, саҥа доҕоттордоннубут. Арай бүтэһик миэстэлэммиппититтэн хомойдубут. Бу сырыыбыт кэнэҕэски идэбитин таларбытыгар туһалаах буолуоҕа дии саныыбын”, — диэн үллэһиннэ.

Оксана СЛЕПЦОВА,
Таас Үрэх с.