2017 сылга пенсия ситимигэр туох уларыйыылар буолуохтарай?

Социальнай төлөбүрдэр уонна пенсия үрдүөхтэрэ

Биллэрин курдук, ааспыт 2016 сылга пенсияҕа индексация оҥоһуллубатаҕа. Быйылгы сылга урукку бэрээдэгинэн пенсияны индексациялааһын төннүөҕэ. Ол курдук, страховой пенсия инфляция таһымыттан көрөн үрдэтиллиэҕэ. Оттон судаарыстыбаннай пенсияларга (социальнай пенсияны киллэрэн туран) олох олоруу алын кээмэйэ үрдүүрүттэн көрөн, индексация оҥоһуллуоҕа.
Онон олунньу 1 күнүттэн үлэлээбэт пенсионердарга страховой пенсиялара 2016 сыллааҕы инфляция таһымыгар тэҥнэниллэн улаатыаҕа. Оттон муус устар 1 күнүттэн судаарыстыбаннай пенсиянан хааччыйыыга, социальнай пенсияларга, үлэлиир буоллун, үлэлээбэт буоллун, пенсионер олох олоруутун алын кээмэйэ үрдүүрүттэн көрүллэн, индексация оҥоһуллуоҕа.
Итилэри таһынан олунньу 1 күнүттэн федеральнай чэпчэтиинэн туһанааччыларга ый ахсын төлөнөр эбии төлөбүрдэрин кээмэйэ улаатыаҕа.
Атырдьах ыйыгар ааспыт 2016 сылга үлэлээбит пенсионердар страховой пенсиялара үрдүөҕэ. Ол курдук, саамай улахан үрдээһин үс пенсионнай баал харчынан эквиваленыгар тэҥнэһиэҕэ.

Тохсунньу 28 күнүгэр диэри

Биллэрин курдук, бу ыйга пенсионердар 5 тыһ. солк. биир кэмнээх эбии төлөбүрү ыла сылдьаллар. Ити эбии төлөбүрү Российскай Федерацияҕа олорор бары пенсионердар ылаллар. Маны ыларга пенсионнай фондаҕа кэлэн сайабылыанньа биэрэр наадата суох.
Пенсионердарга бу эбии төлөбүрү тохсунньу 13 күнүттэн саҕалаан тохсунньу 28 күнүгэр почтальоннар тиэрдэн биэриэхтэрэ. «Россия почтатын» нөҥүө пенсияларын ылбат дьоҥҥо син биир ити болдьох иһинэн эбии төлөбүр төлөнүөхтээх.
Бу сыалга көрүллүбүт 221,7 млрд солк. 2017 сыллааҕы Пенсионнай фонда бюджетыгар угуллубутун туһунан ааҕааччыларга санатабын.

Пенсияны анааһыҥҥа

Биллэрин курдук, 2015 сылга страховой уонна мунньуллар пенсиялар тустарынан саҥа сокуоннар олоххо киирбиттэрэ. Урукку да өттүгэр пенсияны ааҕыыга үлэ ыстааһа уонна орто хамнас учуоттаныллаллар этэ. Ол эрээри дьон-сэргэ өттүттэн мунаарыы элбэҕэ. Саҥа сокуоҥҥа олоҕуран, билигин пенсияны баалга таһаарыллар. Сокуоҥҥа баал буолбакка, пенсия коэффициена диэн этиллэр. Коэффициент (баал) төһө буолара хамнаскыттан, үлэ ыстааһыттан, пенсияҕа тахсар сааскыттан уонна пенсия мунньуллар чааһыгар угуллубут сууматтан тутулуктаах. Ити уларыйыы киһи пенсияҕа хапытаалын билэ-көрө, үөрэтэ сылдьарыгар туһаайыллыбыт ньыма буолар.

Саҥа сокуоннар

2012 сыллаахха Российскай Федерация бырабыыталыстыбатын дойду үлэлээх буолууга уонна социальнай харысхалга министерствота 2030 сылга диэри пенсия ситимин сайдыытын саІа стратегиятын бигэргэппитэ. Ити стратегия чэрчитинэн үөһэ эппит сокуоннарым ылыллыбыттара.
Үлэһит хамнаһа олох олоруу алын кээмэйиттэн намыґаҕа суох эрэ буоллаҕына, баал ааҕыллар. Ол курдук, ыстаапка аҥаарыгар үлэлиир эбэтэр кэмбиэргэ хамнастарын ыла сылдьар дьон пенсияҕа хапытаалларын кыайан хаҥатынар кыахтара суох. Дьон-сэргэ итини өйдүөхтээх.
Урукку өттүгэр пенсияҕа тахсарга биэс сыллаах страховой ыстаас ирдэнэрэ. Билигин сокуонунан 15 сыл диэн быһыллыбыта. Ити уон биэс сыл кэнниттэн биирдэ ирдэниллиэҕэ. Уларыйыы сыыйа олоххо киирэр. 2015 сылга саҥа сокуон олоххо киирэригэр, киһи пенсияҕа тахсарыгар алта сыл ирдэнэрэ. 2016 сылга — сэттэ сыл буолла. Ити курдук, биирдии сыл эбиллэн иһэр. Эмискэ 15 сыллаах ыстаас ирдэннэҕинэ, дьоҥҥо улахан охсуу буолара өйдөнөр. Онон ирдэниллэр страховой ыстаас сыыйа үрдэтиллэр.
Ол курдук, 2017 сылга страховой пенсияны аҕыс сылтан итэҕэһэ суох үлэ ыстаастаах уонна 11,4 пенсионнай бааллаах киһи ылар бырааптанар.
Үүммүт сылга үлэһит муҥутаан 8,26 пенсионнай баалы ылыан сөптөөх.
Бу сылга мунньуллар пенсия ааҕыллыбыт кэнниттэн төлөбүрү кэтэһии болдьоҕо 240 ыйга тэҥнэһэр. Пенсия ити көрүҥэ, этэргэ дылы, киґи сир үрдүгэр баарын тухары төлөнөр.
Пенсионер
ахсаана

Билигин киһи дьиэтиттэн тахсыбакка эрэ, Россия Пенсионнай Фондатын сайтыгар киирэн, тус (личнэй) кабинетын арыйан, пенсия хайа баҕарар көрүҥүн анатарга сайабылыанньа биэриэн сөп.
Быйылгы 2017 сыл устата Российскай Федерацияҕа пенсионер ахсаана 43,3 мөлүйүөнтэн саҕалаан 43,9 мөлүйүөҥҥэ диэри тиийиэҕин туһунан барыллааһын баар. Бу сылга Россияҕа уруккутун курдук пенсия сүрүн көрүҥүнэн страховой пенсия буолуоҕа. Ити пенсия көрүҥүн ылааччылар ахсааннара 40 мөлүйүөҥҥэ тэҥнэһиэҕэ. Оттон судаарыстыбаннай пенсиянан туһанааччылар ахсааннара 4 мөлүйүөҥҥэ тиийиэҕэ.

Мунньуллар пенсия

Урукку өттүгэр үлэ пенсията базовай, страховой уонна мунньуллар чаастартан турара. Билигин ити страховой пенсия дэниллэр. Оттон мунньуллар пенсия пенсионнай хааччыллыы туспа көрүҥүнэн буолла.
Мунньуллар пенсияҕа усунуос тілііґүн 1967 сыллаахха төрөөбүт дьонтон саҕаланар. Биллэрин курдук, 2002 сылтан саҕалаан пенсия мунньуллар чааһыгар үппүтүн-харчыбытын угар буолбуппут.
Киһи мунньуллар пенсиятын биэс сылга биирдэ уларытан, атын страховщикка угуон сөптөөх. Ол курдук, угуллубут суума инвестицияланарыгар кыах бэриллэр.
Биллэрин курдук, мунньуллар пенсияны таҥыы мораторийа 2017 сылга диэри уһаан биэрбитэ. Ааҕааччыларга ити мораторийы «мунньуллар пенсияны тоҥоруу» диэн сыыһа өйдөөбөккөтүгэр көрдөһөбүт. Ол курдук, билигин мунньуллар пенсияҕа ыытыллыахтаах страховой усунуос 6% страховой пенсия ааҕыллыытыгар барар. Онон үлэ биэрээччи төлүүр страховой усунуоһа үлэһит пенсиятын толору кээмэйинэн ааҕыллыытыгар син биир учуоттанарын бэлиэтиибин.

Ийэ хапытаала

Үүммүт сылга Ийэ хапытаалын кээмэйэ уруккутунан хаалыаҕа. Ол курдук, ааҕааччыларга ити хапытаал 453 тыһ. солк. тэҥнэһэрин санатабын.
Ийэ хапыытаалын бырагырааматыгар киирсэргэ Россия дьонугар өссө икки сыл баар. Оҕо 2018 сыл ахсынньы 31 күнүгэр диэри күн сирин көрбүт эбэтэр иитиэххэ ылыллыбыт буоллаҕына, ити суумаҕа сертификат ылар бырааптанар.
Биллэрин курдук, Ийэ хапытаалын олорор усулуобуйаны тупсарыыга, оҕо үөрэҕин төлөбүрүгэр, ийэ инники пенсиятын таҥыыга уонна инбэлиит оҕолор социальнай адаптацияны баралларыгар өҥөлөр иһин төлөбүрдэргэ туһаныахтарын сөп.