641
13 июля 2018 в 12:10
Арыгыны — анал бэлиэлээх бытыылкаларга
Албын испиирдээх утахтары оҥорууну сарбыйар туһугар, парламентарийдар өстүөкүлэ таараны маркировкалыырга этии оҥордулар
28-тан үрдүк кыраадыстаах арыгы бородууксуйатын анал бэлиэлэрдээх өстүөкүлэ бытыылкаларга атыылыахтара. Өстүөкүлэ таараны лицензиялаах эрэ оҥорон таһаарааччылар атыылаһыахтарын сөп. Туһааннаах сокуон барылын Госдума экономическай политикаҕа, бырамыысыланнаска, инновация сайдыытыгар уонна предпринимательствоҕа кэмитиэтэ бу нэдиэлэҕэ көрүөҕэ.
Бытыылка айанын кэтээн көрүөхтэрэ
Сокуон барылын Федерация Сэбиэтин спикерин солбуйааччы Евгений Бушмин, сенатордар Сергей Рябухин, Виталий Шуба, Андрей Кутепов, Андрей Шевченко уонна депутаттар Петр Пимашков, Иван Сухарев оҥорбуттар. Кинилэр бэлиэтээбиттэринэн, 2017 сыл кулун тутар 31 күнүттэн Алкоголь ырыынагын сүрүннээһиҥҥэ федеральнай сулууспа испиири оҥорон таһаарыыга аналлаах оборудованиеҕа учуот ыытар. Ол эрээри алкогольнай бородууксуйаны оҥорууга төһө да суолталааҕын үрдүнэн, өстүөкүлэ таараны оҥорон таһаарыы хонтуруолламмат. Федерация Сэбиэтин бюджекка уонна финансовай ырыынактарга кэмитиэтин баһылыга Сергей Рябухин этэринэн, арыгыны сокуоннайа суох оҥорон таһаарааччыларга өстүөкүлэ таараны атыылааһын иһин санкция көрүллүбэт, онон кинилэр төһө баҕарар кээмэйдээх бытыылканы оҥорон таһаарыыга сакааһы мэһэйэ суох оҥоруохтарын сөп.
«Россияҕа хаачыстыбата суох арыгыттан төһө киһи олоҕо быстарын эһиги билэҕит дуо? — диэтэ «Парламент хаһыатыгар» Госдума гражданскай уопсастыба сайдыытыгар кэмитиэтин бэрэссэдээтэлин бастакы солбуйааччы Иван Сухарев (РЛДП). — Дьон арыгыны атыылаһалларыгар кэмчилии сатыыллар, онон түмүгэр албыны атыылаһаллар». Кини этэринэн, ити сокуон барыла ырыынакка көҥүлэ суох арыгы ахсаанын балайда аҕыйатар кыаҕы биэриэҕэ. «Бытыылка айанын саҕаланыаҕыттан бүтүөр диэри кэтээн көрүөххэ наада, бу — норуоттар икки ардыларынааҕы уопут, — диэтэ депутат. — Оччоҕуна испиирдээх утах хаачыстыбатын хонтуруоллааһын чэпчэки буолуоҕа, оттон көҥүлэ суох оҥорон таһаарааччылары кэтиир уонна накаастыыр чэпчиэҕэ».
Сокуон барыла олохтуурунан, өстүөкүлэ таараны лицензиялаах эрэ оҥорон таһаарааччылар атыылаһыахтарын сөп. Собуоттар кытаанах кыраадыстаах арыгыны кутар бытыылкаларга икки бэлиэни туруоруох тустаахтар. Бастакы бэлиэ өстүөкүлэ собуотун көрдөрөр, оттон иккис – төгүрүк иһигэр “А” буукуба бытыылка 28 кыраадыстан үөһэ алкоголлаах бородууксуйаҕа аналлааҕын көрдөрөр дэгиттэр маркировка.
Маркировката суох өстүөкүлэ таара, ону тэҥэ лицензията суох тэрилтэлэргэ атыыламмыт таара эргииртэн таһаарыллыаҕа. Өстүөкүлэ таараны хаттаан туһаныыны бобуохтара. Оттон сокуон күүһүгэр киирэ илигинэ таһаарыллыбыт бородууксуйа анал бэлиэтэ суох атыыланыан сөп.
Пластик бытыылканы – экспорга?
Үөһэ этиллэр сокуон барылыгар үрдүк кыраадыстаах арыгыны пластик таараҕа таһаарыы бобуллар. «Сокуону кэһэн туран, бородууксуйа атын ханнык эрэ кээмэйдээх иһиккэ оҥорон таһаарылларын уонна батарылларын суох оҥорор сыалтан, полимер хааҕа атыыланара эмиэ бобуллар», — диэн быһаарда Федерация Сэбиэтин бюджекка уонна финансовай ырыынактарга кэмитиэтин бэрэссэдээтэлин солбуйааччы Виталий Шуба. Итинтэн туорааһын быһыытынан экспорга таһаарыллар испиирдээх утах буолуоҕа.
Госдума көрүүтүгэр бу эйгэҕэ кэһиилэр иһин административнай эппиэтинэһи олохтуур сокуон барыла киирбитэ. Докумуон ылылыннаҕына, водканы пластик иһиккэ атыылааһын иһин дуоһунастаах сирэйдэр 100-200 тыһ. солк. ыстараап төлүөхтэрэ, юридическай сирэйдэр — 300-тэн 500 тыһ. солк. диэри.
Билигин Россияҕа арыгы бородууксуйатын оҥорон таһаарар тэрилтэлэр сакаастарынан өстүөкүлэ бытыылканы оҥорор 40 собуот үлэлиир. Өстүөкүлэ таара туһунан сокуон барылыгар бытыылканы уонна арыгы бородууксуйатын оҥорооччулар саҥа ирдэбиллэргэ бэлэмнэнэллэригэр анаан быыһык кэм көрүллэр.
Россия олохтоохторо ханнык арыгы бородууксуйатын ордороллоруй?
(Росстат дааннайдарынан)
Үрдүк кыраадыстаах
арыгы 54,5%
Пиибэ 32%
Вино 13,5%