09 июня 2017 в 10:01

Доруобуйаны айгыратар кэм ааспыта

— Дьокуускай куораттан суруйабыт. Биһиги элбэх квартиралаах дьиэҕэ олоробут. Бу күннэргэ ыалларбыт дьиэлэрин өрөмүөннэтэллэр. Сороҕор түүн 12 чааска диэри дрель тыаһыыр. Онон биһиги, чугастааҕы ыаллара, хойукка диэри кыайан утуйбаппыт. Кинилэргэ этэн көрөбүт да, истибэттэр. Манна туох эмэ миэрэлэр бааллар дуо?
Анна Петрова.

— Анна, ыйытыыҥ иһин махтанабыт. Чуумпу эйгэ сокуонунан харыстанарын үгүстэр билбэттэр. 2016 сылга 52 №-дээх «Нэһилиэнньэ санитарнай-эпидемиологическай этэҥҥэ буолуутун туһунан» федеральнай сокуоҥҥа чуумпуну харыстааһын туһунан түһүмэҕэр уларыйыылар киирбиттэрэ. Ордук киһи түүҥҥү кэмҥэ тыастан-уустан, айдаантан мэһэйдэтэр.
Тустаах сокуоҥҥа уларыйыы киирбитинэн, тыас-уус киэһэ 7 чаастан 23 чааска диэри 40дБ, оттон 23 чаастан сарсыарда 7 чааска диэри 30 дБ үрдүө суохтаах. Ааҕааччы, ол 30-40 дБ диэн төһө улахан тыаһын-ууһун билиэн баҕарарыҥ биллэн турар. Олорор дьиэ таһыгар турар массыына сигнализациятын тыаһа 80-10 дБ тэҥнэһэр. Итинтэн суоттаан таһаарыаххытын сөп.
Биллэрин курдук, өрөспүүбүлүкэбит административнай быраабы кэһиилэр тустарынан Кодекс ылыммыта. 2016 сыл саас Ил Түмэн ХХII уочараттаах пленарнай мунньаҕар норуот депутаттара Дьокуускай куорат Думатын депутаттара көҕүлээбит «Саха Өрөспүүбүлүкэтин административнай быраабы кэһиилэр тустарынан Кодексын 3.5 ыстатыйатыгар уларытыылары киллэрэр туһунан» сокуон барылын бүтэһиктээх ааҕыыга ылыммыттара. Ити чуумпуну харыстыыр ыстатыйа буоларын ааҕааччыларбар санатабын. Урукку өттүгэр КоАП-ка түүҥҥү кэминэн киэһэ 23.00 чаастан сарсыарда 7.00 чааска диэри бириэмэ ааҕыллара. Кодекска уларыйыы киирэн, ити бирбитин 21 чаастан сарсыарда 8 чааска диэри сыҕарыйбыта. Оттон бырааһынньык күннэригэр, субуотаҕа уонна өрөбүлгэ ити бириэмэ 22 чаастан 10 чааска диэри уларыйан биэрэрин бэлиэтиибин.

Күнүһүн сынньанары, утуйары эрэйэр тэрилтэлэргэ, балыыһаларга, санаторийдарга, оҕо саадтарыгар күнүс 13 чаастан 15 чааска диэри эмиэ чуумпуну харыстыахтааххын. Ити кэмҥэ элбэх квартиралаах олорор дьиэлэргэ өрөмүөн үлэтэ тохтотуллуохтаах. Өрөспүүбүлүкэ административнай быраабы кэһиилэр тустарынан Кодексыгар ити эбии киирэн биэрбитэ.
Чуумпуну аймаабыт дьону 1-5 тыһ. солк., дуоһунастаах сирэйдэри 10-50 тыһ. солк., юридическай сирэйдэри 50 тыһ. солк. 250 тыһ. солк. диэри ыстараап күүтэр.
Полиция кыһаммат түгэнигэр экспертиза ыытылларын туруорсуоххун сөп. Экспертиза оҥорооччу хамыыһыйалар анал тыаһы-ууһу кээмэйдиир тэриллээхтэр. Кинилэр мээрэйдээн бараннар, акт толороллор. Бу элбэх квартиралаах дьиэлэр бастакы мэндиэмэннэригэр эбэтэр чугастарыгар түүҥҥү кулууптар, кафелар уонна рестораннар баар буоллахтарына, ордук экспертиза ыытыллыытыгар наадыйыахтарын сөп. Күөх экранынан маннык түгэннэри үгүстүк көрбүт буолуохтааххыт.
Дьон чуумпутун харыстыыр миэстэлэр ахсааннарыгар олорор дьиэлэр эрэ киирсибэттэр, балыыһалар, диспансердар, санаторийдар, сынньанар дьиэлэр, пансионаттар, интернат-дьиэлэр, оҕо саадтара, гостиницалар, уопсай дьиэлэр, олорор дьиэлэр квартиралара киирсэллэр.
Онон аттынааҕы ыалыҥ эбэтэр дьиэҥ таһыгар массыыналаах дьон, тэрилтэлэр музыканы муҥ кыраайынан холбуулларын, өрөмүөннэнэллэрин тулуйа-тулуйа олорор, доруобуйаны айгыратар кэм ааспытын ааҕааччыларбар санатабын.