Эдэр быраастары судаарыстыбаннай поликлиникаларга «сыһыарыахтара»

Эдэр быраастар судаарыстыбаннай балыыһаларга уонна поликлиникаларга булгуччу үлэлээбэтэх түгэннэригэр, кинилэр коммерческай тэрилтэлэргэ үлэҕэ киириилэрин чугастааҕы кэмҥэ бобуохтарын сөп. Туһааннаах нуормалыыр аактаны Россия Доруобуйа харыстабылын министиэристибэтигэр бэлэмнииллэрин туһунан биэдэмистибэ баһылыга Вероника Скворцова иһитиннэрдэ.

Быраас судаарыстыбаннай балыыһаҕа хас сыл үлэлиэхтээҕий?

Дьыала соторунан быһаарыллар бадахтаах. Миниистир этэринэн, бүгүҥҥү күҥҥэ үлэлэрин саҥа саҕалыыр медиктэр судаарыстыбаннай медицинскэй тэрилтэлэргэ булгуччу үлэлиэхтээх бириэмэлэрин кэрчигин интэриэстээх структуралар дьүүллэһэллэр. «Эдэр быраастар туһааннаах кэмҥэ судаарыстыбаҕа үлэлээбиттэрин эрэ кэннэ коммерческай доруобуйа харыстабылыгар барар кыахтаналларын көҥүллүүр туһунан нормативнай аакта барылын биһиги бэлэмнээтибит. Холобур, Великобританияҕа ити болдьох биэс сылга тэҥ», – диэн санатта Вероника Скворцова. Кини санаатынан, Россияҕа да итинник болдьох биэс сылтан элбэҕэ суох буолуохтаах.
Минздрав эдэр специалистар үлэҕэ киириилэрин сүрүннээһиҥҥэ күһэллиитин төрүөттэрэ өйдөнөллөр: официальнай статистика быһыытынан, доруобуйа харыстабылын тиһигэр 40 тыһыынча быраас уонна 270 тыһыынча медицинскэй сиэстэрэ тиийбэт. Оттон чааһынай клиника ахсаана (судаарыстыбаннайга тэҥнээтэххэ) эрэллээхтик улаата турар: бүгүн кинилэр судаарыстыбаннайдартан номнуо икки төгүл элбэхтэр, уонна, экспердэр дааннайдарынан, чугастааҕы сылларга бу сектор үүнүүтүн тэтимэ 12-15% буолуоҕа.

[b]Госдума депутата: Эдэр быраастар чааһынай клиникаларга үлэлииллэрин бобуу сиэрдээх

Итини үрдүнэн биэдэмистибэ көҕүлээһинэ кэккэ ыйытыылары үөскэтэр. «Мин көрүүбэр, маннык сүрүннээһин медицинскэй вузтарга бюджет үбүн суотугар үөрэммит «тус сыаллаахтарга» эрэ туһаныллыан сөп, – диэтэ Госдума доруобуйа харыстабылыгар кэмитиэтин чилиэнэ Разиет Натхо. — Бу түгэҥҥэ Минздрав быһаарыыта сөптөөх курдук көстөр: ону ааһан, судаарыстыба ханнык специалистары бастакынан бэлэмниирин арыый кичэйэн былаанныырыгар кыах биэриэҕэ». Ол да буоллар, депутат санаатынан, бэйэлэрин хармааннарыттан үөрэхтэрин төлөөбүт дьоҥҥо ханнык эрэ хааччахтааһыннары киллэрэ сатааһын соччо өйдөммөт.

Кымньыынан уонна бирээнньигинэн

Эдэр специалистар чааһынай клиникаларга үлэлииллэрин бобон эрэ кадр тиийбэтин суох оҥорор кыаллыбат, диэн Федерация Сэбиэтин социальнай политикаҕа кэмитиэтин чилиэнэ, Россия үтүөлээх бырааһа Владимир Круглай эрэллээхтик этэр. «Судаарыстыбаннай эмтиир тэрилтэлэргэ кадр тиийбэт балаһыанньатын бу быһаарыы күттүөннээхтик уларытыа диэн санаабаппын, – диэтэ сенатор парламент хаһыатын корреспонденын кытта кэпсэтиигэ. — Практика көрдөрөрүнэн, биһиги дойдубутугар чааһынай балыыһаларга уонна поликлиникаларга эдэр специалистары үлэҕэ ыла сатаабаттар». Парламентарий бигэргэтэринэн, бу ордук Россия регионнарыгар көстөр. «Коммерческай структуралар кинилэргэ уопуттаах, ыстаастаах, истиэпэннээх, бэйэлэрин үчүгэйдик көрдөрбүт быраастар үлэлииллэригэр интэриэстээхтэр. Чуолаан маннык специалистарга ыарыһахтар муҥутуур ахсааннара суруйтарар, онон барыс ыларга туһаайыылаах чааһынай клиникалар медвуз кэнниттэн кэлбит эдэр бырааһы буолбакка, чуолаан итинник специалистары ылаллара ордук», – диэн быһаарда Владимир Круглай.
Судаарыстыбаннай доруобуйа харыстабылыгар специалистары тардыыга араас ньымалары киллэриигэ министиэристибэ бэлэм. «Бүгүҥҥү күҥҥэ кадр тиийбэт кыһалҕатын быһаарыыга регионнар оскуола оҕолорун ортотугар медицинскэй туһаайыыга үлэни күүһүрдүөхтээхтэр. Биһиги ыччаты үөрэххэ туһаайан ыытыыга бары сайаапкалары толоруохпут», – диэтэ Вероника Скворцова.
Кини тылыгар сигэннэххэ, 2016 сылга медицинскэй вузтарга уонна интернатураларга бюджет миэстэтэ 50 % аһарбыт. 2015 сыллааҕы статистика көрдөрбүтүнэн, медицинскэй идэлэргэ үөрэммит дьон 85-тэн тахса бырыһыана кинилэри үөрэххэ ыыппыт тэрилтэлэригэр төннүбүт.

Бэлэмнээтэ Елена БАИШЕВА.