Эмчиттэргэ аккредитация киирэр

Саҥа быраабыланан

«РФ-ҕа гражданнар доруобуйаларын харыстааһын төрүттэрин туһунан» сокуонунан 2016 сылтан медицинскэй үлэһиттэргэ булгуччулаах аккредитация көрүллэр. Номнуо быйыл ити процедураны стоматологическай уонна фармацевтическай факультеттары бүтэрээччилэр барыахтара, диэн РФ Доруобуйа харыстабылыгар министиэристибэтин медицинскэй үөрэхтээһиҥҥэ уонна кадр политикатыгар департаменын баһылыга Татьяна Семёнова санатта. Атын идэни баһылаабыт эдэр специалистар кинилэргэ 2017 сылтан холбоһуохтара. «Аккредитация үс таһымнаах процедурата наадалаах билиитэ-көрүүтэ уонна үөрүйэҕэ суох дьону идэлэриттэн сыыйар кыаҕы биэриэҕэ. Инники таһымы туттарбатахтар аныгыскыга киллэриллиэхтэрэ суоҕа», – диэн быһаарда кини.
Эксперт этэринэн, эдэр специалистар бастаан тест сорудахтарын туттарыахтара, олор толору испииһэктэрэ — биир идэҕэ 3,5 тыһ. ордук уонна атын идэҕэ – 3 тыһ. кэриҥэ – номнуо министиэристибэ сайтыгар таһаарылынна. Иккис таһым — бу ОСКЭ (объективный структурированный клинический экзамен). «Бу сүһүөххэ практическай үөрүйэхтэри көрдөрүү буолар», – диэтэ Татьяна Семёнова. Үһүс таһым «клиническэй кейстэр» дэнэр. Ол хаамыытыгар хамыыһыйалар кэнэҕэски специалист «олохсуйбут клиническэй өйүн-санаатын» сыаналыахтара. Хамыыһыйалар састааптарыгар профессиональнай уонна үөрэтэр эйгэлэр бэрэстэбиитэллэрэ, үлэ биэрээччилэр киирэллэрэ сабаҕаланар.
Үлэлиир быраастарга аккредитация атын көрүҥнээх — үс таһымнаах буолбатах, кинилэр идэлэринэн үлэлэрин ырытыыга туһаайыллар.

Эмчити уонна иитээччини көҕүлээһин

Быраастары идэлэригэр көҥүллээһин тиһигин уларытыынан эрэ дойдуга медицинскэй көмө хаачыстыбатын үрдэтэр кыаллыбат, диэн экспердэр этэллэр. Манна медицинскэй вузтарга педагогтары бэлэмнээһин таһыма эмиэ суолталаах. «Медицинскэй вуз преподавателин үлэтэ мэлдьи ымсыылаах этэ, — диэн санатта Федерация Сэбиэтин социальнай политикаҕа кэмитиэтин бэрэссэдээтэлин солбуйааччы Людмила Козлова. — Кини үлэлиир быраастааҕар да ордук хамнастааҕа. Ону таһынан преподавателлэр олорор дьиэни ылар кыахтаахтара».
Сенатор санаатынан, вузка клиническэй база баара улахан суолтаны ылар. «Ханнык да оҥорон көрүү база ыарыһах оронун аттыгар үлэни уонна клиническэй өй-санаа сайдыытын солбуйбат», – диэн бэлиэтээтэ сенатор. Ол эрэн, кини дааннайдарынан, бүгүн 46 вузтан 24-гэр эрэ клиническэй базалаахтар.
Үөрэх уонна наука министиэристибэтигэр эмиэ идэ суолтатын үрдэтиигэ охсуһууну саҕалаатылар. Биэдэмистибэ баһылыгын солбуйааччы Александр Климов билигин профессордар-преподавателлэр састааптарын хамнаһын үрдэтиигэ балайда кытаанах ирдэбиллэр олохтоннулар диир. «Туһааннаах суол карталара (былааннар) бааллар. Биһиги олору толорууну кытаанахтык хонтуруоллуубут. Ону толорбот уонна үлэһиттэрин хамнаһын үрдэтиэхтэрин баҕарбат ректордарга сыһыаннаан административнай миэрэлэр ылыллаллар», — диэтэ кини.
Үлэлиир эмчиттэр олохторун уйгутун туһунан эмиэ судаарыстыба умнуо суохтаах диэн экспердэр бэлиэтээтилэр. «Байыан­найдарга дьиэ бэриллэрин курдук, кинилэргэ эмиэ олорор дьиэ сертификатын биэрэр туһунан толкуйдуурбут тоҕоостоох буолуоҕа, — диэтэ Людмила Козлова. — 20 сыл үлэлээтэҕинэ, квартира ылыахтааҕын туһунан быраас билиэхтээх».