Ирбэт тоҥ сөпкө туһаныллыахтаах

Мунньаҕы кэмитиэт бэрэссэдээтэлэ Владимир Прокопьев салайан ыытта. Былаас бэрэстэбиитэллэрин сэргэ манна учуонайдар кыттыыны ыллылар. Федеральнай докумуон ирбэт тоҥу харыстааһын эйгэтигэр судаарыстыба политикатын правовой төрүттэрин быһаарыаҕа, оттон регионнааҕы – бу боппуруоска өрөспүүбүлүкэ судаарыстыбаннай былааһын уорганнарын, олохтоох салайыныы уорганнарын, тэрилтэлэр уонна биирдиилээн дьон сыһыаннаһыыларын сүрүннүөҕэ.
Хамыыһыйа үлэ бэрээдэгинэн бырабыыталыстыба, прокурор бэрэбиэркэлэрин түмүгүн, Юстиция управлениетын, о.д.а. ырытыыларын көрдө. Ол түмүгэр регионнааҕы сокуон барылыгар кэккэ көннөрүүлэр бааллара билиннэ. Олортон сүрүннэрэ – чуолкай терминнэр суохтара.
«Сыыһа өйдөөһүн тахсыбатын туһугар бары профессиональнай терминнэри чуолкайдык ааттааһын ирдэнэр», — диэн бэлиэтээтэ Владимир Прокопьев. Кини мунньах кыттыылаахтарын ити боппуруоска үлэлииллэригэр сорудахтаата.

Бүгүҥҥү күҥҥэ Россияҕа ирбэт тоҥу харыстааһыҥҥа уонна туһаныыга нуормалыыр-правовой аактар суохтар, ол оннугар СНИПтэр эрэ бааллар. Олорго ирбэт тоҥу харыстааһын боппуруостара сүбэлиир майгылаахтар итиэннэ глобальнай сылыйыы эбэтэр климат уларыйыытын содуллара учуоттамматтар

Парламентарийдар федеральнай уонна регионнааҕы сокуон барылларын ааттарыгар эмиэ көннөрүүнү киллэрэргэ этиилээхтэр. Ол курдук, ирбэт тоҥ айылҕа көстүүтүн быһыытынан харыстанарын ааһан, сөптөөхтүк туһаныллыах тустаах.
Бүгүҥҥү күҥҥэ регион сиригэр-уотугар ирбэт тоҥҥо идэтийэн мониторины ыытыы суох. Билигин бары үлэлэри исписэлиистэр бэйэлэрин көҕүлээһиннэринэн ыыталлар, онон инникитин мониторины регионнааҕы научнай-чинчийэр станциялар төрүттэригэр ыытарга, оттон бүгүн – ити үлэлэр барыллааһын сыаналарын ааҕарга этиилэр киирдилэр.
Мунньаҕы түмүктүүрүгэр Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев икки сыл устатыгар “Ирбэт тоҥу харыстааһын туһунан” сокуон барыла элбэхтик дьүүллэһиллибитин, барылга үлэни бастакынан саҕалаабыттарын бэлиэтээтэ. Ол эбэтэр бүгүҥҥү күҥҥэ Россияҕа ирбэт тоҥу харыстааһыҥҥа уонна туһаныыга нуормалыыр-правовой аактар суохтар, ол оннугар СНИПтэр эрэ бааллар. Олорго ирбэт тоҥу харыстааһын боппуруостара сүбэлиир майгылаахтар итиэннэ глобальнай сылыйыы эбэтэр климат уларыйыытын содуллара учуоттамматтар.
«Бары сүрүн итэҕэстэр туоратылыннылар. Бүгүн биһиги иннибитигэр “Ирбэт тоҥу харыстааһын туһунан” СӨ сокуонун барылын иккис ааҕыыга ылыныыга бэлэмниир сорук турар», — диэн түмүктээтэ кини.