752
12 мая 2017 в 11:36
Кутаа оттууга – мөлүйүөн солкуобай ыстараап?
Быйыл Иркутскай уобаласка, Забайкальеҕа тахсыбыт ойуур умайыытын бары көрбүт-истибит буолуохтаахтар. Ойуур баһаарын үгүс өттө икки атахтаах дьалаҕайыттан уонна эппиэтинэһэ суоҕуттан тахсар.
Россия парламенын хаһыата суруйбутунан (04.05.2017), сыллата Россияҕа сааскы-сайыҥҥы кэмҥэ 35 тыһыынчаҕа тиийэ ойуур умайыыта тахсар, онуоха хоромньу 20 млрд солк. аһарар. Дьокутааттар кутааны оттуу иһин ыстарааптары үрдэтэргэ итиэннэ баһаары сэрэтиигэ мөлтөх үлэлээх чунуобунньуктары накаастыырга этии оҥороллор.
Ойуур хаһаайыстыбатын саҥардыы үлэтэ тоҕунна
Соторутааҕыта Уһук Илиҥҥэ ойуур баһаарын иэнэ 6 төгүл улаатан, 2,1 тыһыынча гектарга тэҥнэспитэ. Москваҕа, кэккэ атын регионнарга куттал таһыма улааппыта бэлиэтэммитэ. Ааспыт ыйга ойуур баһаарын сиэртибэлэринэн 20-тэн тахса киһи буолла, оттон 5 тыһыынча киһи олорор дьиэтэ суох, сир-халлаан икки ардыгар туран хаалла.
Ойуур умайыытыгар сүрүн төрүөттэртэн биирдэстэрэ — кутааны оттуу, өртөөһүн, уоту кытта сэрэҕэ суох сыһыан. Кэһээччилэри эккирэтэ сылдьан кэтиир табыллыбат. 2000 сылларга саҕаламмыт ойуур хаһаайыстыбатын уларыта тутуу түмүгэр Ойуур хаһаайыстыбатын федеральнай сулууспата уонна лесниктэр институттара суох буоллулар. Ол оннугар билигин туһааннаах сиргэ-уокка ойуур инспектордара үлэлииллэр эрээри, бэрт аҕыйах ахсааннаахтар.
Россияҕа лесничество үлэһиттэрин ахсаана кэнники сылларга 5 төгүл сарбыллыбыт – уруккута 160 тыһыынчаттан 32 тыһ. киһиэхэ диэри. Ити түмүгэр биир лесничэйгэ 55 тыһ. гектар ойуур тиксэр. «Ойуур билиҥҥи туруга – бу административнай реформа содула. Ити сылларга туох хоромньулаах буолуоҕа итиэннэ экономика балаһыанньата учуоттаммакка, барыта кэриэтэ сыыһа оҥоһуллубута, – диэтэ «Парламент хаһыатыгар» Федерация Сэбиэтин аграрнай, ас-үөл политикатыгар уонна айылҕаны туһаныыга Кэмитиэтин бэрэссэдээтэлин бастакы солбуйааччы Сергей Лисовскай. — Реформа сыала-соруга биир этэ — федеральнай бюджет ороскуоттарын аҕыйатыы уонна барытын регионнар уонна ойууру түүлэһээччилэр санныларыгар сүктэрии».
Федеральнай субсидиялар ирдэнэллэр
Регионнар баһаары сэрэтиигэ уонна ол содулларын суох оҥорууга үптэрэ тиийбэт. Онон бырабыыталыстыба ити хайысхаҕа үбүлээһини улаатыннарыах тустаах – Федерация Сэбиэтигэр кулун тутарга буолбут мунньахха сенатордар итинник түмүккэ кэлбиттэрэ. Быйылгы сылга регионнар бюджеттарыгар субвенциялар икки төгүл кэриҥэ сарбылыннылар. Субъектар өссө ааспыт сылга баһаары умуруорууга үлэлээбит тэрилтэлэр иннилэригэр иэстэрэ улаата турар. Федерация Сэбиэтин аграрнай-ас-үөл политикатыгар уонна айылҕаны туһаныыга Кэмитиэтин бэрэссэдээтэлэ Михаил Щетинин этэринэн, ити иэһи сабыыга 273 мөл. солк. ирдэниллэр.
Ойуур баһаардарын кытта охсуһууга дьаһаллары үбүлээһиҥҥэ анаан Бырабыыталыстыба Резервэ фондатын туһанарыгар Федерация Сэбиэтэ дьаныһан туруорсар. «Бүгүҥҥү күҥҥэ баһаары умуруорууга боломуочуйалар регионнарга бэриллэн тураллар. Оттон биһиги билэрбитинэн, регионнар кыахтара араас, баһаардар кыраныыссаны аахсыбаттар», — диэтэ Федерация Сэбиэтин бэрэссэдээтэлэ Валентина Матвиенко. Спикер санаатынан, сүрүн сорук – умайыыны туоратыыны таһынан, ол содулларын кытта сибээстээх боппуруостары муҥутуур түргэнник быһаарыы: эмсэҕэлээбиттэргэ хоромньуларын толуйуу, саҥа олорор дьиэлэри тутуу.
Баһаардары кытта охсуһууга анаан эрдэттэн сэрэтэр дьаһаллары үбүлээһини улаатыннарар туһунан сенатордар Бырабыыталыстыбаҕа туруорсууларын бэлэмнээбиттэрэ, ол эрээри “харчы итиннэ суох, резервэ фондатын үбэ баһаары сэрэтиигэ туһаныллыа суоҕа” диэн харда кэлбитэ. Лисовскай лаппыйан этэринэн, баһаары умуруорардааҕар сэрэтиинэн дьарыктанар ордук суолталаах. Бүгүн үбү тыырыы систематын уларыта туттахха, бюджет харчытын кэмчилиир кыаллыаҕа. Ол эбэтэр умайыы содулларын туоратар оннугар, сэрэтии быдан чэпчэки ороскуоттаах буолуоҕа.
Шашлыгы таптааччылар 3-5 тыһыынчалаах ыстараапка кумаардаабаттар
Баһаары утары куттал суох буолуутун кэһэн туран, кутааны уматыы иһин гражданнар билигин 1500-3000 солк. ыстараабы төлүөхтэрин сөп, дуоһунастаах дьон – 10000-20000 солк. Маннык кэһии иһин юридическай сирэйдэр 50000-200000 солк. ыстараабы төлүүргэ күһэллиэхтэрэ. Сокуону тутуспаттарын түмүгэр, умайыы тахсыбыт түгэнигэр гражданнарга 5000 солк., дуоһунастаах дьоҥҥо — 50 000 солк., юридическай сирэйдэргэ — 500000-1000 000 солк. суумалаах ыстараап түһэриллэр.
Федерация Сэбиэтин конституционнай сокуону оҥорууга уонна судаарыстыбаннай тутууга Кэмитиэтин бэрэссэдээтэлин бастакы солбуйааччы Алексей Александров билигин баар санкциялар ситэтэ суохтарын бэлиэтиир. Кини ааҕарынан, баһаартан куттал суох буолуутун кэһэн туран өртөөһүн, кутааны оттуу иһин биирдиилээн дьоҥҥо ыстарааптар улаатыах тустаахтар — 1-3 мөлүйүөн солк. диэри.
«Бу боппуруоска кытаатан биэрэр наадалаах. – Госдума дьокутаата эрдэхпинэ, улахан ыстарааптары туруорсар кэммэр: “Тоҕо маннык улахан суума буолуохтааҕый, дьон тугунан төлүөҕэй?” – диэн миэхэ этэллэрэ. Ол эрээри маннык улахан ыстарааптар тустарынан этэрбэр атын сыалы-соругу тутуһабын», — диэн быһаарар сенатор. Кини санаатынан, дьон сокуону кэһэртэн куттанарын курдук, ыстарааптар онно туһуланаллар, оттон билиҥҥи суумалартан ким да куттаммат.
Икки сыл анараа өттүгэр ойуурга баһаартан куттал суох буолуутун кэһии иһин ыстарааптары улаатыннарар туһунан сокуон барылын сенатордар номнуо киллэрбиттэрэ, ол эрээри ити көҕүлээһин парламеҥҥа көрүллүбэтэҕэ даҕаны. Сокуон барылын ааптардарыттан биирдэстэрэ, Федерация Сэбиэтин конституционнай сокуону оҥорууга уонна судаарыстыбаннай тутууга Кэмитиэтин чилиэнэ Елена Афанасьева баһаар сүрүн төрүөтүнэн дьон сынньанарыгар эппиэтинэһэ суоҕун ааттаата.
“Сиэрдээх Россия” фракциятын салайааччыны солбуйааччы Олег Нилов накаастабылы биирдиилээн дьоҥҥо буолбакка, ойууру түүлэһээччилэргэ улаатыннарар тоҕоостооҕун этэр. Баһаар тахсыбыт буоллаҕына, ол аата кинилэр бэйэлэрин учаастактарын сөптөөхтүк көр—бөттөр-истибэттэр. «Мөлүйүөнүнэн гектар ойуур чааһынай илиигэ баар, онон ити хаһаайыннартан ирдиэххэ наада», — диэн санаатын тиэртэ Нилов. Кини арендалааччылар баһаары бэйэлэрэ оҥоруохтарын сөбүн этэр, ол курдук, баһаар кэнниттэн ойуурга чөлүгэр түһэрэр үлэ ыытыллар, онно эмиэ судаарыстыбаттан субсидия ыытыллар. Дьокутаат ойууру судаарыстыба бас билиитигэр төннөрөргө итиэннэ баһаар тахсыытын иһин чунуобунньуктарга тус эппиэтинэһи олохтуурга – көҥүллэрин быһарга тиийэ этиилээх.
«Уон сыл анараа өттүгэр ойуурдар федеральнай дьаһайыыттан регионнар таһымнарыгар бэриллибиттэрэ, онон билигин ити реформа түмүктэрин көрөбүт, – диэн ааҕар Олег Нилов. — Регионнар ойууру арендатордарга биэрбиттэрэ, оттон олоруҥ сыаллара-соруктара биир – хармааннарын хаҥатыы. Ити иһин дьиҥнээх хаһаайын, хонтуруол, эппиэтинэс суохтар. Оттон Бырабыыталыстыба бюджет, ойуур ресурсаларын сүүнэ ороскуоттарын, дьоҥҥо оҥоһуллубут хоромньуну “өйдөөн көрбөт”.