1174
14 августа 2015 в 09:52
Ольга Епифанова: “Арассыыйа нэһилиэнньэтин үгүс өттө судаарыстыба көрөр социальнай өйөбүл миэрэлэрин туһунан билбэт”
Госдума дьиэ кэргэн, дьахтар уонна оҕо боппуруостарыгар кэмитиэтин салайааччытын солбуйааччы Ольга Епифанова федеральнай доруобуйа харыстабылын министиэристибэтэ үс сааһыгар диэри оҕолорго босхо эмп-том көрүллэрин кыһалҕалаах дьоҥҥо иһитиннэрэригэр регионнары эбээһинэстиир туһунан көрдөһөр. О.Епифанова поликлиникаларга уонна оҕо быраастарын кэбиниэттэригэр ол туһунан иһитиннэриилэри анал истиэндэҕэ ыйыахха сөп диэн холобурдуур.
Доруобуйа харыстабылын миниистирэ Вероника Скворцова аатыгар Епифанова ыыппыт ыйытыгар (Сурук “РИА Новости” баар), дойдуга буола турар уустук экономическай балаһыанньанан сибээстээн, киниэхэ оскуола иннинээҕи саастаах оҕолор төрөппүттэрин бырааптарын, босхо эми-тому хайдах ылар туһунан үгүс ыйытыылар киирэллэрин туһунан суруйар. “Арассыыйа нэһилиэнньэтин үгүс өттө судаарыстыба көрөр социальнай өйөбүл миэрэлэрин туһунан билбэт”, — диэн депутат бэлиэтиир.
Депутат, гражданнар доруобуйаларын харыстааһыҥҥа туһуланар сокуон чэрчитинэн, нэһилиэнньэ чэпчэтиинэн туһанар араҥатыгар, ол иһигэр үһүгэр диэри саастаах оҕолор уонна элбэх оҕолоох дьиэ кэргэн алта сааһыгар диэри оҕолоро ханнык эми-тому босхо ылалларын регион бэйэтэ быһаарыахтаах. Федеральнай бырабыыталыстыба 890 №-дээх уурааҕын сыһыарыытыгар үс сааһын туола илик оҕолорго эмп-том бары көрүҥэ босхо бэриллиэхтээҕин туһунан ыйылла сылдьар диэн парламентарий санатар.
“Ол эрээри, кыһалҕалаах дьон этэллэринэн, медицинскэй тэрилтэлэргэ оҕо быраастара төрөппүттэр бырааптарын туһунан уонна босхо ырыссыабынан ханнык эми-тому ылыахтарын сөбүн туһунан тугу да иһитиннэрбэттэр”, — диэн суруйар Ольга Епифанова.
http://ria.ru/ саайтан.
