Ойууру кэрдээччилэр маһы олордуохтара

Бырабыыталыстыба туһааннаах сокуонун барыла Госдума айылҕа ресурсаларыгар, бас билиигэ уонна сир сыһыаннаһыыларыгар кэмитиэтин мунньаҕар дьүүллэһиигэ туруоҕа диэн РФ ФМ «Парламенын хаһыата» иһитиннэрдэ.
Көҕүлээһин ааптардара бэлиэтииллэринэн, Ойуур кодексыгар көннөрүүлэр кэрдиллибит, эмсэҕэлээбит, кэхтибит ойуурдары булгуччулаахтык чөлүгэр түһэриигэ, кинилэр туһалаах дьайыыларын уонна араас көрүҥнээх харамайдарын харыстааһыҥҥа туһуланаллар. Бу нуорма ойуур учаастактарын түүлэспит, ону сэргэ уһун болдьоххо эбэтэр босхо туһаныыга ылбыт дьону таарыйыаҕа. Кинилэр РФ туһааннаах субъегын сирин-уотун чэрчитинэн ойуур фондатын сирдэригэр эбэтэр атын көрүҥнээх сирдэргэ, ойуур мастара кэрдиллибит иэннэригэр тэҥнээх сир иэнигэр ойууру чөлүгэр түһэриини уонна маһы олордууну ыытыах тустаахтар.
Итини таһынан, учаастагы туһанааччы ойуур фондатын сирдэриттэн атын категорияҕа көһөрүүнү туруорсар буоллаҕына, сыл устатыгар кини ойуур фондатыттан таһаарбыт учаастагын иэнигэр сөп түбэһэр иэннээх сиргэ мас олордор эбээһинэстээх буолуоҕа.
Бу иннинэ Госдума айылҕа ресурсаларыгар, бас билиигэ уонна сир сыһыаннаһыыларыгар кэмитиэтин бэрэссэдээтэлэ Николай Николаев иһитиннэрбитинэн, сыллата Россияҕа чөлүгэр түһэриллэринээҕэр балтараа төгүл элбэх ойуур маһа суох буолар.
«Кэрдиллибит, өрт барбыт сирдэригэр туох үүнэригэр биһиэхэ хонтуруол суоҕунан, үгүс өттүгэр мастар сыаналаах боруодаларын олус сыаналаммат мастар боруодаларынан солбуйуу барар, онон ойуур хаачыстыбата сүнньүнэн мөлтүүр. Ойууру чөлүгэр түһэрии, ол иһигэр бизнескэ эмиэ барыстаах буоларын туһугар анал моделы оҥоруохха наада. Мин көрүүбэр, ити аччыгый бизнес үлэлииригэр бэртээхэй эйгэ», — диэн ааҕар депутат.