Ростислав Гольдштейн: Уһук Илин сайдыытын босхо гектар көҕүлүөҕэ

«Бу сокуон барылын туһунан этэр буоллахха, биһиги уһуну-киэҥи толкуйдаан туран, инникибитин көрүнүөхпүтүн наада. Ол курдук, бүгүҥҥү күҥҥэ Российскай Федерация бэйэтин сайдыытыгар илиҥҥи хайысхаҕа сүрүн болҕомтону уурар. Россия Европаҕа эрэ хайыспакка, илиҥҥи дойдулары кытта алтыһан, сайдар кыаҕа улаханын үгүс дьон өйдүүр. Мин санаабар, Европа аан дойдуга оруола намтаан турар. Аан дойду экономикатын киинэ бастаан АХШ көспүтэ, оттон кэнники кэмҥэ Азия-Чуумпу акыйаан регионун дойдуларын тула түмүллэр. Ол курдук, Владивостокка ыытыллыбыт АТЭС мунньаҕар Владимир Владимирович Путин Соҕуруулуу-Илиҥҥи Азия дойдуларын кытта бииргэ үлэлэһиигэ ааны арыйбыта. Биһиги Уһук Илиммит Кытай, Япония, Соҕуруулуу-Илиҥҥи Азия дойдуларын кытта алтыһан, глобальнай экономикаҕа кыттыһар кыахтаах.
Уһук Илин регионнарыгар үлэһит илии тиийбэт. Бэйэтин кэмигэр дойду президенэ инновационнай хайысхалаах тэрилтэлэргэ 25 мөл. үлэ миэстэтин олохтуурга этии киллэрбитэ. Онон Уһук Илин үлэ миэстэтин таһаарарга сүрүн киин буолуохтаах. Мин санаабар, босхо гектары биэрии программата, урутаан сайдар сир-уот, Владивостокка улахан порт тутуута барыта Россия глобальнай политикатын кытта сибээстээх. Ону тэҥэ, ити сыалга сөп түбэһиннэрэн, Уһук Илиҥҥи федеральнай университет тэриллибитэ. Университет регион сайдыытыгар үрдүк таһымнаах үлэһиттэри бэлэмнииргэ төһүү күүс буолар.
Москва куоракка, мин санаабар, эдэр киһи карьера оҥосторо уустук. Дойдубут кииниттэн 1000 км иһинэн 60 мөл. киһи олорор. Оттон Владивостоктан 1000 км иһинэн – 460 мөл киһи. Онон Уһук Илиҥҥэ тиийэн үлэлээн, олохсуйан, үлэһит быһыытынан сайдар, үүнэр, дойду кэскилин түстүүр кыах баар.
Россия политиката Уһук Илиҥҥэ баар нэһилиэнньэни тутан хаалларарга буолбакка, улаатыннарарга туһуланыахтаах. Өскөтүн урукку өттүгэр регион олохтоохторо Москваҕа, Санкт-Петербурга, Калининградка барар эбит буоллахтарына, билигин тас дойдуларга, сүрүннээн Азия хайысхатынан, көһөн барыы үрдүк.
Ааспыт өттүгэр Кытайга, Азия атын дойдуларыгар олоҕу соччо сэҥээрбэт сыһыан баар эбит буоллаҕына, билигин Кытай уонна Соҕуруулуу-Илиҥҥи Азия олоххо, сайдыыга холобурунан буолан эрэллэр, Мин көрүүбэр, итинник буолара табыллыбат. Сайдыы хайысхатынан Россия Уһук Илинэ буолуох тустаах», – диир Ростислав Гольдштейн.
Р.Гольдштейн сабаҕалыырынан, дьон-сэргэ сүрүннээн Амурскай уобаласка, Еврейскэй автономнай уобаласка, Хабаровскай кыраай соҕуруу оройуоннарыгар, Приморскай кыраайга, баҕар, Сахалин соҕуруу өттүгэр көһүөхтэрэ. «Биллэн турар, төрүт норуоттар сирдэригэр, Саха сирин улуустарыгар Россия кииниттэн барыахтара суоҕа. Чукоткаҕа да, Магадаҥҥа да эмиэ бараллара биллибэт – ити сирдэр, бастатан туран, бу тыйыс регионнар бэйэлэрин нэһилиэнньэлэригэр тардыылаах буолуохтара, оттон «Босхо гектар» программа кинилэргэ үлэһиттэри хаттаан тарҕатыы ньыматынан буолуон сөп», – диэн ааҕар кини. – Уһук Илин федеральнай уокурук соҕуруу өттүгэр 140 мөл. кэриҥэ га иэннээх туһаныллыбакка сытар сирдээх, ол аата Россия хас биирдии олохтооҕор биирдии гектар тиксэр. Билигин Москваҕа, Петербурга, о.д.а. регионнарга олорор уруккута Уһук Илин олохтоохторо бэйэлэрин төрөөбүт түөлбэлэрин саатар биир төрүөттэн сылтаан ахталлар – Уһук Илиҥҥэ сыл 300-тэн тахса хонугар күн көрөр».

РФ ФС официальнай сайтыттан.