Сири босхо түҥэтии тула

Санатар эбит буоллахха, тохсунньу ыйга РФ бырабыыталыстыбатын вице-премьера, Дальнай Восток федеральнай уокуругар президент боломуочуйалаах бэрэстэбиитэлэ Юрий Трутнев Россия президенэ Владимир Путинныын көрсүһүүтүгэр Дальнай Востокка көһүөн баҕалаах хас биирдии Россия олохтооҕор 1 га сири босхо биэрии механизмын оҥорорго этии киллэрбитэ.

СӨ баайга-дуолга уонна сир сыһыаннаһыыларыгар миниистирэ Евгения Григорьева мунньах саҕаланыытыгар «Дальнай Восток федеральнай уокуругар сир учаастактарын биэрии уратыларын туһунан» федеральнай сокуон барылын туһунан дакылааты иһитиннэрдэ. “Саха сиригэр босхо гектары ылыы сорох сирдэргэ кыаллыа суоҕа. Ураты харыстанар сир-уот статуһун ылар сирдэр эргиирдэрэ хааччахтанар, онон Дальнай Восток федеральнай уокуругар сир учаастактарын биэрэр сокуон манна тарҕаныа суоҕа. Бүгүҥҥү күҥҥэ маннык сирдэр өрөспүүбүлүкэ сирин-уотун 3,9% ылаллар”, — диэн иһитиннэрдэ миниистир Евгения Григорьева. Федеральнай сокуон барылын оҥорууга эрэгийиэннэр киллэрэр этиилэрэ учуоттаммыттара, ол иһигэр Саха Өрөспүүбүлүкэтэ киллэрбит этиилэрэ эмиэ бааллар. Миниистир этэринэн, Россия олохтоохторугар эргииртэн ылыллыбыт учаастактар, ону сэргэ үһүс сирэйдэр бырааптара докумуоҥҥа киирбит, резервэҕэ баар сирдэр бэриллиэхтэрэ суоҕа. Евгения Григорьева бэлиэтээбитинэн, бу — сокуон барылын сүрүн тезиһэ буолар. Мунньах кыттыылаахтара сокуон барылын сэргэхтик дьүүллэстилэр, бэйэлэрин көрүүлэрин эттилэр.

Бу сокуон барыла толкуйдамматаҕын уонна РФ конституциятын үгүс балаһыанньатыгар утарарын, сокуон ылыллар түгэнигэр Саха сирин нэһилиэнньэтин интэриэстэрэ күөмчүлэниэҕин туһунан Ил Түмэн депутата Иван Шамаев бэлиэтээтэ уонна нэһилиэнньэ бу сокуону утары референдум тэрийэргэ номнуо бэлэм диэтэ. Депутат бу боппуруоска үлэлэһэр анал хамыыһыйа тэриллэрэ наадатын туһунан киллэрбит этиитин мунньах кыттыылаахтара өйөөтүлэр. Владимир Михайлович хамыыһыйа састаабын быһаарарга, уонна Иван Ивановиһы хамыыһыйаҕа булгуччу киллэрэргэ эттэ. Үөһээ Бүлүү улууһун баһылыгын солбуйааччыта Спиридон Борбуев тыа сиригэр дьон хаһыакка сурутуута намыһаҕынан уонна интэриниэт ситимэ мөлтөҕүнэн сибээстээн нэһилиэнньэ бу сокуон барылын туһунан тугу да үчүгэйдик өйдүү илигин уонна мантан сылтаан сокуон ылылыннаҕына дьон букатын да учаастага суох хаалар кутталлааҕын эттэ. Маныаха улуустарга анал хамыыһыйа тахсан бу тиэмэҕэ мунньахтары тэрийэрэ буоллар диэн санааларын үллэһиннилэр.

СӨ Бырабыыталыстыбата, олохтоох бэйэни салайыныы уорганнара, общественнай тэрилтэлэр, гражданнар Ил Түмэҥҥэ сэтинньи 15 күнүгэр диэри «Дальнай Восток федеральнай уокуругар сир учаастактарын биэрии уратыларын туһунан» федеральнай сокуон барылыгар Саха сирин уратыларын учуоттуур этиилэри киллэрэллэригэр сорудахтанна.

Бу боппуруос Ил Түмэн 18-с (уочараттаах) пленарнай мунньаҕар көрүллүөҕэ.
Сокуон барылыгар суруллубутунан, «Дальнай Восток федеральнай уокуругар сир учаастактарын биэрии уратыларын туһунан» федеральнай сокуон 2016 сыл от ыйын 1 күнүттэн күүһүгэр киириэхтээх.

Мария ПАВЛОВА.