1049
21 августа 2015 в 16:57
Сокуон барыла Судаарыстыбаннай Дуумаҕа киирдэ
Судаарыстыбаннай Дуума уопсастыбаннай холбоһуктар уонна религия тэрилтэлэрин дьыалаларыгар кэмитиэтин чилиэнэ Виталий Золочевскай (ЛДПР) кыбартыыраларга баар өлүүлэри суут быһаарыытынан эрэ атыылыырга этии киллэрэр. Туһааннаах дөкүмүөн аллараа палаатаҕа киирдэ. Уларытыы РФ Гражданскай кодексын бастакы чааһыгар киллэриллиэхтээх.
Виталий Золочевскай этэринэн, дойдуга бас билии өлүүтүн атыылаһыыга, атыылааһыҥҥа уонна хос атыылааһыҥҥа араас махинациялары оҥорор аҕыйаҕа суох «хара риелтордар» бааллар. Албыҥҥа түбэспит гражданнары кыбартыыралартан күһэйэн көһөрөн таһаарыыттан көмүскүүр инниттэн, дьокутаат боппуруоһу суут быһаарыытыгар олоҕуран быһаарарга этэр. Бас билии өлүүлээхтэртэн биирдэстэрэ бэйэтин өлүүтүн бэйэтэ дьаһайарыгар быраабын хайдах быһыылаахтык олоххо киллэрэригэр суут быһаарыыта оруоллаах буолуохтаах.
Дьокутаат этэринэн, билигин үлэлии сылдьар сокуонунан, бэйэлэрин өлүүлэрин атыылыы сатаабат гражданнар бэйэтин өлүүтүн атыылыыр киһиттэн атыылаһалларыгар ордук быраабынан туһаналлар. Маныаха сокуон хамсаабат бас билиини атыылаһарга биир ыйдаах, оттон хамныыр бас билиини атыылаһарга 10 күннээх болдьоҕу быһар.
«Бас билии өлүүтүн атыылаһыан баҕалаах атын киһи итинник кылгас болдьох иһигэр наадалаах сууманы була охсоро улахан уустуктардаах. Оттон болдьоҕу аһарыы кинилэр атыылаһарга ордук бырааптарын сотон таһаарар. Ол аата кинилэр ити бырааптара таах фикция буолан тахсарыгар тиийэр», — диир дьокутаат Виталий Золочевскай.
СИА
