852
03 февраля 2017 в 12:49
Сокуон барыла – урутаан сайдар сирдэргэ
Госдума тохсунньу 27 к. пленарнай мунньаҕар «Россия Федерациятын Нолуогун кодексын 169 уонна 251 ыстатыйаларыгар уларытыылары киллэрэр туһунан» сокуон барыла көрүллүбүтэ. Дьүүллэһиигэ хос дакылааты бюджекка уонна нолуокка кэмитиэт чилиэнэ, Саха сириттэн депутат Галина Данчикова оҥорбута.
Бу РФ Бырабыыталыстыбата киллэрбит сокуонун барылыгар Нолуок кодексын НДС уонна тэрилтэлэр барыстарыгар нолуок чаастарыгар уларытыылары киллэрии көрүллэр.
Нолуок кодексын «Нолуок базатын быһаарыыга учуоттаммат дохуоттар» диэн 251 ыстатыйатын тэрилтэлэр барыстарыгар нолуок туһунан чааһыгар уларытыы социальнай-экономическай өттүнэн урутаан сайдар сирдэргэ сыһыаннаах уонна кинилэр үлэлэрин көдьүүһүн үрдэтиигэ туһаайыллар.
Көрүллэр сокуон барылыгар урутаан сайдар сири-уоту салайар хампаанньаны баай-дуол быһыытынан ылбыт дохуоттарыттан нолуогу төлүүртэн босхолуурга этиллэр. Госдума депутаттара сокуон барылын бастакы ааҕыыга ылыммыттара.
Саха Јрөспүүбүлүкэтигэр «Хаҥалас» Индустриальнай паарка» урутаан сайдыы сиригэр-уотугар сокуон барылын кэрэхсии ылыннылар.
Соторутааҕыта Госдума депутата Галина Данчикова уонна «Хаҥалас» Индустриальнай паарка» ХЭТ генеральнай директора Дмитрий Борисов көрүллэр сокуон барылын сиһилии дьүүллэстилэр.
Саха сиригэр аан бастакынан тэриллибит «Хаҥалас» Индустриальнай паарка» урутаан сайдыы сирэ-уота үтүө кэскиллээҕинэн ааҕыллар. Россия Федерациятын Бэрэссэдээтэлин солбуйааччыта – Уһук Илин федеральнай уокуругар Россия Президенин Боломуочунай бэрэстэбиитэлэ Юрий Трутнев ити объекка сылдьар кэмигэр маннык сыанабылы биэрбитэ. Ааспыт сыл сэтинньитигэр боломуочуйалаах бэрэстэбиитэл объектартан биирдэстэригэр – «Хаҥалас» ТОР резиденэ «Саюри» хампаанньа сылы эргиччи үлэлиир теплицатын комплексыгар сылдьыбыта. Юрий Трутнев урутаан сайдыы сирин-уотун тутуу хаамыытын үчүгэйинэн сыаналаабыта итиэннэ аччыгый уонна орто бизнеһи өйөөһүн көдьүүстээх ньыматын быһыытынан «Хаҥалаһы» ыаллыы регионнар салайааччыларыгар көрдөрөргө этии киллэрбитэ.
Галина Данчикованы кытта кэпсэтиигэ Дмитрий Борисов паарка резиденнэрэ 350 саҥа үрдүк оҥорон таһаарыылаах үлэ миэстэтин аһыахтаахтарын, өрөспүүбүлүкэ олохтоохторо наадыйар бородууксуйаларын оҥоруу саҕаланыахтааҕын ураты тутан бэлиэтээтэ. Онон, кини санаатынан, урутаан социальнай-экономическай сайдыы сирин-уотун салайыы үлэтигэр туһаайыллар сокуон базата кэмигэр тупсарыллара улахан суолталаах.
