Сокуон барылыгар 15 көннөрүү

Ил Түмэн доруобуйа харыстабылыгар, социальнай политикаҕа, үлэҕэ уонна дьарыктаах буолууга сис кэмитиэтин бэрэссэдээтэлэ Александр Корякин ыыппыт мунньаҕар өрөспүүбүлүкэ народнай депутаттара Юрий Николаев, Пётр Аммосов, Юрий Григорьев, үлэ уонна социальнай сайдыы миниистирин бастакы солбуйааччыта Татьяна Степанова, үп миниистирин солбуйааччыта Октябрина Никонова, о.д.а. кытыннылар.
Көннөрүүлэри өрөспүүбүлүкэ народнай депутаттара Ольга Балабкина, Юрий Николаев, Александр Корякин, Марфа Филиппова, Василий Власов, Михаил Габышев, Юрий Григорьев, Жанна Егорова, Сергей Ларионов, Николай Румянцев, Василий Тимофеев, Петр Юмшанов, ону сэргэ РФКП регионнааҕы отделениетыттан киллэрбиттэрэ.
Кинилэр этиилэрэ сокуон барылын аатыгар уларытыыны киллэриигэ, бу категорияҕа киирсэр гражданнары, кинилэр статустарын быһаарыыга сыһыаннаахтар. Бастакы ааҕыыга ылыллыбыт сокуон барылын быһыытынан, Саха сиригэр бастайааннай олорор, 1945 сыл балаҕан ыйын 3 к. туругунан 18 саастарын туолбатах Российскай Федерация гражданнарыгар, өскөтүн кинилэр «төрөппүттэриттэн биирдэстэрэ Аҕа дойду Улуу сэриитин кыттыылааҕынан буолар уонна 1941 сыл бэс ыйын 22 күнүттэн 1945 сыл балаҕан ыйын 2 к. диэри Аҕа дойдутун көмүскүү сылдьан өлбүт, эбэтэр сураҕа суох сүппүт, эбэтэр бу ыйыллар кэмҥэ эмсэҕэлээн, бааһыран, контузияланан, байыаннай сулууспа эбээһинэстэрин толоро сылдьан ыалдьан, эмтэнэ киирэн баран, медицинскэй тэрилтэҕэ өлбүт буоллаҕына», ити сокуон дьайыыта тарҕанар.
Итини таһынан, социальнай өйөбүл миэрэлэрин кэрискэтигэр көннөрүүлэр киирдилэр. Көрүллэр сокуон барылын быһыытынан, үөһэ ыйыллыбыт гражданнар категориялара социальнай өйөбүл маннык миэрэлэригэр бырааптаах буолуоҕа: ый аайы харчынан төлөбүр – 886 солк.; сыллата диспансеризацияны барыы; кырдьаҕас уонна инбэлиит гражданнары социальнай хааччыйыы тэрилтэлэригэр уочараты таһынан көрүү-харайыы; Саха Өрөспүүбүлүкэтин сиригэр-уотугар санаторийга-куруорка эмтэниигэ путевка сыанатын 50% кээмэйинэн харчынан толуйууга эбэтэр 3 сылга биирдэ, киһи бэйэтэ таларынан, сыанатын аҥаарын төлөөн туран, СӨ сиригэр-уотугар санаторийга-куруорка эмтэниигэ путевканы ыларыгар быраап.
Ону сэргэ сокуон барылынан олохтоммут социальнай өйөбүл миэрэлэригэр ороскуоттары үбүлээһин туһунан көннөрүүлэр көрүлүннүлэр.
Оробуочай бөлөх мунньаҕын түмүктэрин таһааран, Александр Корякин бэлиэтээбитинэн, «1941-1945 сс. Аҕа дойду Улуу сэриитин кэмигэр төрөппүттэриттэн биирдэстэрин сүтэрбит гражданнарга социальнай өйөбүл миэрэлэрин туһунан» сокуон барылыгар киллэриллибит көннөрүүлэри туһааннаах кэмитиэт, Парламент көрүөхтэрин иннинэ оробуочай бөлөх олунньу 2 к. анаммыт мунньаҕар хаттаан дьүүллэһиэҕэ.

Атын регионнарга
Билигин федеральнай таһымҥа сэрии оҕолоругар аналлаах сокуон суох. Оттон туһааннаах нормативнай правовой аакталар баар регионнарыгар сэрии оҕолоро маннык чэпчэтиилэри ылаллар:
 ый аайы пенсияҕа эбии төлөбүр;
 куорат тырааныспарыгар уонна электричкаҕа босхо айан;
 коммунальнай өҥөлөрү төлөөһүҥҥэ, тиис протеһын оҥорторууга чэпчэтиилэр;
 эми атыылаһыыга чэпчэтиилэр;
 дьиэҕэ төлөпүөнү босхо туруортарыы;
 ритуальнай өҥөлөрү толуйуу.
Өссө 2013 сылга Госдумаҕа РФКП фракцията «Сэрии оҕолорун туһунан» федеральнай сокуон барылын киллэрбитэ. Бу докумуон быһыытынан, маннык чэпчэтиилэр олохтонуохтаах этилэр:
 дьиэтээҕи төлөпүөнү уочарата суох туруоруу;
 ый аайы харчынан төлөбүр – 1 000 солк. (сыллата индексацияланар);
 сыллата диспансеризацияны барыы;
 куорат тырааныспарыгар босхо айан;
 кырдьаҕастар интернат-дьиэлэригэр уочарата суох киирии;
 олорор дьиэ, даача, о.д.а. кооперативтарыгар бастакынан киириилэрэ.
Гражданин чэпчэтиини ыларга бырааптаах хас да категорияҕа киирсэр буоллаҕына, бэйэтэ талыытынан, бииригэр эрэ чэпчэтии бэриллэр. Чэпчэтиини ыларга киһи сайабылыанньа биэриэхтээх, докумуоннарыттан пааспара эрэ ирдэнэр.
Бу барылы парламентарийдар 2014 сылга ылымматахтара. Ол эрээри коммунистар эрэли сүтэрбэттэр – кинилэр сокуон барылын ситэри оҥорон, Дума көрүүтүгэр хаттаан киллэрбиттэрэ.

Ил Түмэн пресс-сулууспата.