Тарбах суолун номнуо оҕо саадыгар устуохтара

Дьиҥэр, оҕо тарбаҕын суолун полиция урут да устар кыахтааҕа – ол эрээри аныаха дылы сокуоҥҥа киһи сааһа чопчуламмат этэ. Онон саҥа төрөөбүт оҕоттон кытта тарбаҕын суолун устар кыаллара. Оттон кырачааннар кинилэртэн тугу эрэйэллэрин, биллэн турар, өйдөөбөттөр, онон сутуруктарын ыга туталлар, ньиэрбинэйдииллэр.

Кэнэҕэс “оҕо тарбаҕын суолун” киһи кимин билэргэ туһанар өрүү кыаллар буолбатах. Саҥа сокуонунан дактилоскопияны ааһарга саамай кыра кирбиинэн 6 саас олохтонно.

Өссө биир көннөрүү дактилоскопия технологията сайдыытын кытта сибээстээх.  Урукку өттүгэр быраабы араҥаччылааччылар үгэс буолбут ньыманы тутталлара – киһи илиитин типография кырааскатынан сотон баран, тарбаҕын кумааҕыга баттаталлара. Кэлин саҥа ньыма баар буолла – киһи ытыһын уонна тарбахтарын ойуутун анал тэрилгэ уһулуу. Бу ньыма сокуоҥҥа кырааската суоҕунан ааттанар, ити көмөтүнэн электроннай дактилоскопическай карта толоруллар.

Россияҕа киһи бэйэтин баҕатынан да, булгуччулаах да дактилоскопия оҥоһуллар. Бэйэтин биометрическай дааннайдарын полицияҕа хаалларарга сөбүлэспит киһи санаата уларыйан, туттарыллыбыт тарбаҕын суолун суох оҥорор баҕалаах буолуон сөп. Маныаха кини уорганнарга суругунан сайабылыанньа киллэрэр – 30 суукканы хойутаппакка эрэ кини “тарбахтарын суолун” сотуохтара.

Полицияҕа киһи бэйэтин дааннайдарын баҕа өттүнэн тоҕо туттарыахтааҕый?

Сокуон саҥа редакциятынан, быраабы харыстааччылар дастабырыанньата суох сылдьар дьон кимин тарбах суолунан базаттан булан ылыахтара.

Манна даҕатан эттэххэ, омук дойдуларын гражданнара эмиэ тарбахтарын суолун туттарыахтарын сөп. Ол эрээри кэккэ түгэннэргэ ити булгуччулаах дактилоскопическай регистрацияны ыытары эрэйэр. Бастатан туран,  криминаллаах түгэннэр, онно холуобунай эбэтэр административнай эппиэтинэс, Россия сиригэр-уотугар сокуону кэһэн туран киирбит омук дойдутун киһитин таһаарыы эбэтэр булан ылыы туһунан этиллэр. Иккиһинэн, бэс ыйын 29 күнүгэр диэри быстах кэмҥэ олорор сир көрдүүр эбэтэр ол дойдуттан тэскилээччи статуһун ылар туһуттан хадаатайыстыбалаах, ону сэргэ быстах кэмҥэ олорууга көҥүлү ылбыт дьон булгуччулаах дактилоскопияны ааһаллара.

Саҥа бэрээдэгинэн, быстах кэмҥэ олорорго көҥүлү ылар баҕалаахтар номнуо докумуону биэрэр кэмҥэ тарбахтарын суолун туттарыах тустаахтар. Омук дьоно биһиги дойдубутугар уһуннук олорорго көҥүлү биэрэр докумуону ылалларыгар ити эмиэ сыһыаннаах. Ону таһынан, саҥа докумуоннары оҥорууга урут туттарбыт тарбахтарын суолун эмиэ туһаныахха сөп. Холобур, омук сирин гражданина үлэ патенын оҥороругар булгуччу дактилоскопияны ааһар. Оттон докумуону саҥалыы оҥороругар кини дааннайдарын базаттан ылыахтара.