890
25 декабря 2015 в 17:34
Тыа хаһаайыстыбатын сокуонун барыла – бастакы ааҕыыга
(Салгыыта. Иннин 49 нүөмэргэ ааҕыҥ). СӨ Бырабыыталыстыбатын бэрэссэдээтэлин бастакы солбуйааччы Петр Алексеев “Саха өрөспүүбүлүкэтигэр тыа хаһаайыстыбатын сайдыытын туһунан” сокуон барылын тула өрөспүүбүлүкэ үрдүнэн киэҥ далааһыннаах кэпсэтии, дьүүллэһии тахсыбытын бэлиэтээтэ.
Ол курдук, бу сыл балаҕан ыйын 28 күнүттэн сэтинньи 9 күнүгэр диэри тыа сирин үгүс нэһилиэктэригэр сокуон барылын көхтөөхтүк дьүүллэстилэр, ол иһигэр араас санаа этилиннэ.
Петр Алексеев сокуон барыла 22 ыстатыйалааҕыттан биир сүрүнүнэн 4-с ыстатыйаны ааттаата. Санатар буоллахха, манна Саха сиригэр тыа хаһаайыстыбатынан дьарыктаныы аҕыс уратыта бигэргэтиллэр. Холобура, агроклимат зоналарынан араастаһыы үрдүк таһыма, ирбэт тоҥ усулуобуйаларыгар сири оҥорууга ыарахаттар бааллара, үүнээйи сайдар кэмэ кылгаһа, үгэс курдук сүөһү, сылгы, таба иитиитэ уо.д.а. Ол туһунан этэригэр Петр Алексеев: “Туһааннаах сокуон барыла ылыллар сүрүн сыала-соруга Саха Өрөспүүбүлүкэтин ураты айылҕатын, олоҕун-дьаһаҕын учуоттаан, тыа хаһаайыстыбата сайдарыгар табыгастаах уонна бигэ туруктаах усулуобуйалары олохтооһун буолар”, — диэн быһааран биэрдэ.
5-с ыстатыйаҕа өрөспүүбүлүкэ тыатын хаһаайыстыбатыгар үлэ субъектара уонна объектара ыйыллаллар. Петр Алексеев субъектарга тыа хаһаайыстыбатын табаарын оҥорон таһаарааччылар, соҕотуопкалыыр тэрилтэлэр уонна ас-үөл бородууктатын оҥорон таһаарыыга судаарыстыба сакааһын толорор тэрилтэлэр киирсэллэрин эттэ.
Сокуон барылын 6-с ыстатыйатыгар тыа хаһаайыстыбатын сайыннарыы эйгэтигэр өрөспүүбүлүкэ судаарыстыбаннай былааһын уорганнарын боломуочуйалара ыйыллаллар: Ил Түмэн, Ил Дархан, өрөспүүбүлүкэ Бырабыыталыстыбата уонна тыа хаһаайыстыбатын сайыннарыы эйгэтигэр судаарыстыбаннай бырагыраама эппиэттээх толорооччулара. 7-с ыстатыйаҕа тыа хаһаайыстыбатын сайыннарыы эйгэтигэр олохтоох бэйэни салайыныы уорганнарын боломуочуйалара көрүллэр.
«8-10 ыстатыйалар тыа хаһаайыстыбатын сайдыытын эйгэтигэр судаарыстыба өйөбүлүн көрүү боппуруостарыгар анаммыттар, ол иһигэр, туһааннаах судаарыстыбаннай бырагырааманы олоххо киллэрии. Судаарыстыба үбүнэн өйөбүлэ муҥутуур көдьүүстээхтик туһаныллыахтаах, маныаха үлэлиир субъектар тэҥ эппиэтинэстээх буолуохтаахтар”, — диэтэ дакылаатчыт.
Сокуон барылыгар судаарыстыба өйөбүлүн көрөр дьаһалларга тыа хаһаайыстыбатын табаарын оҥорон таһаарааччылар бородууксуйаны оҥорон таһаарыыга ороскуоттарын сорох чааһын үбүнэн толуйуу, сүрүн средстволары саҥардыы, нолуоктарга уонна хомуурдарга чэпчэтиилэри, судаарыстыба мэктиэлэрин биэрии уо.д.а. ааттаммыттар. Салгыы дакылаатчыт тыа хаһаайыстыбатын уонна булт бородууксуйатын соҕотуопкалааһыны, оҥорон таһаарыыны сүрүннүүр 11-с ыстатыйаҕа тохтоото. Маныаха соҕотуопка систиэмэтин уонна тыа хаһаайыстыбатын бородууксуйатын астааһыны уонна батарыыны бэрээдэктиир сыалтан анал тиэрминнэр киллэриллэллэрин эттэ: холобур, “тыа хаһаайыстыбатын уонна булт бородууксуйатын туттарааччылар”, “соҕотуопкалыыр тэрилтэлэр”, “тыа хаһаайыстыбатын потребительскай батарар кооперативтара” уо.д.а. Ону кытары сокуон барылынан «тыа хаһаайыстыбатын уонна булт бородууксуйатыгар соҕотуопкалыыр сыана» өйдөбүлэ киллэриллэр. Петр Алексеев тыа хаһаайыстыбатын табаарын оҥорон таһаарааччылар бородууксуйаны оҥорууну үрдэтиини технологиялары тутустахтарына эрэ ситиһиэхтэрин сөп диэн санаатын эттэ.
15-с ыстатыйа тыа хаһаайыстыбатын научнай өттүнэн хааччыйыыны көрөр, 16-с ыстатыйа – каадырынан хааччыйыыга ананар. 18-с ыстатыйаҕа коммерческайа суох тэрилтэлэр тыа хаһаайыстыбатын сайыннарыыга кыттыылара этиллэр. Сокуон барылын 19-с ыстатыйата тыа хаһаайыстыбатыгар анаммыт сирдэри көдьүүстээхтик туһаныыны көрөр. 22-с ыстатыйаҕа сурулларынан, сокуон 2017 сыл тохсунньу 1 күнүгэр күүһүгэр киирэр.
Норуот итэҕэллээхтэрэ дакылааты болҕойон истэн баран үгүс ыйытыылары биэрдилэр, дьүүллэһиигэ көхтөөхтүк кытыннылар. Ол курдук, Ил Түмэн депутата Александр Ноговицын биирдиилээн дьоҥҥо (тус кэтэх хаһаайыстыбаларга) судаарыстыба өйөбүлэ көрүллүө дуо диэн интэриэһиргээтэ. Онуоха Петр Алексеев судаарыстыба өйөбүлэ өскөтүн субъект тыа хаһаайыстыбатыгар үлэ реестригэр киирбит эрэ буоллаҕына, көрүллэрин эттэ. Оттон Реестр судаарыстыба өйөбүлүн кэтэх хаһаайыстыбаларга хааччахтаабат.
Парламентарий Гульсум Бейсембаева сокуон барылыгар «көмө хаһаайыстыба – тэрилтэ» диэн өйдөбүл киирбэтэҕин бэлиэтээбитигэр дакылаатчыт парламентарий этиитэ сокуон барыла иккис ааҕыы режимигэр көрүллүөҕэ диэн эрэннэрдэ.
Ил Түмэн депутата Антонина Григорьева сокуон барылыгар Саха сирин уратыларын учуоттаан булчут ыттары иитиини, аквакултуураны уонна түүлээх кыыллары иитиини сайыннарыы тустарынан балаһыанньалары киллэрэр туһунан боппуруоһу көтөхтө. Итини сэргэ тыа хаһаайыстыбатыгар страховкалааһын систиэмэтин сайыннарыы туһунан ыйытта уонна сүөһү иитиитигэр хос салаалары ыйар туһунан этии оҥордо. «Үүнээйи салаатыгар, элитнэй сиэмэнэн дьарыктаныы хайысхата ыйыллыбатах. Ону таһынан “сүөһүнү иитии” диэн өйдөбүлү чопчулаан биэриэххэ сөп – ууһатыыга, эккэ, үүккэ аналлаах», — диэн бэлиэтээтэ. Салгыы Антонина Григорьева сэдэх боруодалар туспа чопчулааһыны ирдииллэрин эбэн эттэ: “Холобур, сылгы иитиитигэр “Мэгэдьэк сылгыта” диэн боруоданы туспа ыйыахха сөп”, — диэтэ.
Парламентарий 15-с, салааны наука өттүнэн өйүүрү сүрүннүүр ыстатыйаҕа “бородууксуйа саҥа көрүҥнэрин оҥорон таһаарыы” диэн өйдөбүлү киллэрэн биэрэргэ эттэ. Ону таһынан Антонина Григорьева “Тыа сирин сайыннарыы” диэн 20-с ыстатыйаҕа агро хайысхалаах оскуолалары уонна орто профессиональнай үөрэхтээһин ситимнэрин сайыннарыыны уонна хаалларыыны бигэргэтэр туһунан этии киллэрдэ.
Норуот депутата Владимир Федоров сокуон барыла федеральнай сокуоҥҥа утарылаһар дуо диэн ыйытыытыгар дакылаатчыт сокуон барылын бэлэмнээччилэр федеральнай сокуон балаһыанньаларын хатылыыр сыалы туруорумматахтарын иһитиннэрдэ.
Парламентарий Василий Тимофеев сокуон барылыгар тыа хаһаайыстыбатын бородууксуйатын соҕотуопкалааһын систиэмэтигэр улахан болҕомто ууруллубутун үрдүнэн, ырыынак сыһыаннаһыыларын сүрүннүүр балаһыанньалар суохтарын ыйда. «Оҥорон таһаарааччы бюджеттан субсидияны, батарыы ырыынага баар уонна логистика көҥүллүүр буоллаҕына, быһаччы ылара наада», — диэтэ Василий Тимофеев. Кини монополист-оҥорон таһаарааччы бородууксуйаны атыылаһан баран, салгыы ырыынак сыанатынан атыылыан сөп диэтэ. Онон, маны учуоттаан, ырыынак үлэлиир механизмнарын толкуйдуурга эттэ. Василий Тимофеев этиилэрин норуот депутата Иван Шамаев өйөөтө. Кини: “Соҕотуопка сыанатын кээмэйин урут Ил Түмэн чуолкайдык бигэргэтэр этэ, оттон саҥа сокуон барылынан, “тыа хаһаайыстыбатын бородууксуйатыгар соҕотуопкаланар сыана кээмэйэ тыа хаһаайыстыбатын сайыннарыы эйгэтигэр судаарыстыбаннай бырагырааманы эппиэттээх толорооччуларынан бигэргэтиллэр”, — диэн долгуйарын биллэрдэ. Ил Түмэн вице-спикерэ Виктор Губарев сокуон барылын оҥорууга Россия атын регионнарын, тас дойдулар уопуттара төһө учуоттаммытын чуолкайдаста. Ону таһынан үс сылынан аан дойдутааҕы эргиэн тэрилтэтин (ВТО) ирдэбиллэрэ уонна стандартара толору үлэлээри туралларын санатта.
Сокуон барылын дьүүллэһиигэ норуот итэҕэллээхтэрэ Александр Уаров, Владимир Прокопьев, Елена Голомарёва, Владимир Фёдоров, Алексей Филиппов, Василий Тимофеев, Леонид Владимиров, Иван Шамаев, Семён Иванов, Пётр Аммосов, Гаврил Парахин, Виктор Губарев уонна Анатолий Добрянцев санааларын эттилэр. Парламентарийдар сүнньүнэн сокуон барылын өйөөтүлэр, ол эрээри докумуон иккис ааҕыыга үчүгэйдик ситэриллэн-хоторуллан биэрэрэ наадалааҕын бэлиэтээтилэр.
Ил Түмэн бэрэссэдээтэлэ Александр Жирков барылга тыа хаһаайыстыбатын сокуонун оҥорууга уонна толорууга эппиэттээх өрөспүүбүлүкэ судаарыстыбаннай былааһын түөрт уоргана ааттаммытын санатта: Ил Түмэн, Ил Дархан, Саха сирин Бырабыыталыстыбата уонна тыа хаһаайыстыбатын сайыннарыы эйгэтигэр судаарыстыбаннай бырагырааманы эппиэттээх толорооччулар. Александр Николаевич ити эппиэттээх толорооччулары ким аныырын, кинилэр туох функциялаахтарын ыйарга, чопчулаан суруйарга диэн этии киллэрдэ.
Дьүүллэһии кэнниттэн өрөспүүбүлүкэ народнай депутаттара сокуон барылын бастакы ааҕыыга ылыннылар.
Туһааннаах сокуон барылыгар эбии киирбит санаалары, этиилэри учуоттаан, уопсай түмүк оҥоһуллан, толору сиппит-хоппут сокуон олоххо киириэҕэ диэн эрэнэбит.
Мария ПАВЛОВА.