Судаарыстыба ипотеканы сабыыга көмөлөһүөҕэ

2019 сыл тохсунньу 1 күнүттэн үһүс уонна онтон салгыы оҕо төрөөбүт дьиэ кэргэттэр федеральнай бюджеттан 450 тыһ. солк. олорор дьиэҕэ ылбыт кредиттэрин сабыыга туһанар кыахтаныахтара. Ити өйөбүл дьаһалын көрөр сокуон барыла Госдумаҕа ыам ыйын 6 күнүгэр киллэрилиннэ.

Судаарыстыба элбэх оҕо­лоох ыалларга ипотеканы төлүүллэригэр көмөлөһүөҕүн туһунан Россия Президенэ Владимир Путин быйыл олунньуга Федеральнай Мунньахха анал этиитигэр иһитиннэрбитэ. Бу дойдуга туруга суох макроэкономическай быһыыны-майгыны учуоттаан оҥоһулларын бэлиэтээбитэ.

Сокуон суһаллык ылыллыаҕа

Судаарыстыба баһы­лыгын сорудаҕын олоххо киллэрэр со­куон барылын Федерация Сэбиэтин бэрэссэдээтэлэ Валентина Матвиенко уонна Госдума спикерэ Вячеслав Володин баһылыктаах сенатордар уонна депутаттар бөлөхтөрө оҥорбута.

Федерация Сэбиэтин бюджекка уонна үп ырыынактарыгар кэмитиэтин бэрэссэдээтэлин солбуйааччы Николай Журавлёв этэринэн, бу докумуон маннык төлөбүрдэр дьайар болдьохторун уонна бэрээдэктэрин бырабыыталыстыба быһаарарыгар быраабы биэриэҕэ. Сенатор бэлиэтээбитинэн, кинилэргэ нолуок түһэриллиэ суохтаах. Кини эбэн эппитинэн, элбэх оҕолоох дьиэ кэргэттэри өйөөһүн бырагырааматын олоххо киллэриигэ агенынан олох-дьаһах эйгэтигэр сайдыы институтун —  «ДОМ.РФ» АУо аныырга былаанныыллар.

«Сокуон төттөрү күүстээх буолуоҕа итиэннэ 2019 сыл тохсунньу 1 күнүттэн үлэлиирэ суолталаах. Онон быйыл үһүс уонна онтон салгыы оҕолоро төрөөбүт дьиэ кэргэттэр толуйууну ылыах­тара», — диэн бэлиэтээтэ Вячеслав Володин.

Итини сэргэ кини бу сыалга наадалаах үп-харчы баарын эттэ. Муус устар 30 к. миниис­тирдэр кабинеттара таһаарбыт уурааҕынан, ити сыалга Бырабыыталыстыба Резервэтин фондатыттан 15 млрд солк. диэри харчы ананара сабаҕаланар.

450 тыһ. солк. — бу ордук ийэ хапытаалын 453 тыһ. солк. харчытын кытта холбоотоххо балайда ыйааһыннаах суума, диэтэ Федерация Сэбиэтин социальнай политикаҕа кэмитиэтин баһылыга Валерий Рязанскай. «Дойду араас регионнарыгар олорор дьиэ кэргэттэргэ үгүстэригэр бу улахан көмөнөн буоларыгар эрэнэбин», — диэн санаалаах кини. Сенатор ыйбытынан, билигин ийэ хапытаала 95 бырыһыан түгэҥҥэ чуолаан олорор дьиэҕэ кредити сабыыга уонна тутууга ороскуоттанар.

Вячеслав Володин эрдэ иһитиннэрбитинэн, элбэх оҕолоох дьиэ кэргэттэри өйөө­һүнү таарыйар президент сорудахтара Госдума сокуону оҥорор үлэтигэр бастакы суолта­лааҕынан буолаллар. Ном­нуо ыам ыйын 13 к. үөһэ этиллэр көҕүлээһин Дума Сэбиэтигэр, ол кэннэ палаата пленарнай мунньаҕар бастакынан көрүллүөҕэ.

«Биһиги ити сору­даҕы хаста да дьүүл­лэстибит. Мин санаабар, сокуон барылын биһиги олус түргэнник ылыныахпыт. Номнуо сайын сокуон баар буолуон сөп», — диэн быһаарда «Парламент хаһыатыгар» Госдума дьиэ кэргэн, дьахталлар уонна оҕолор боппуруостарыгар Кэмитиэтин баһылыга Тамара Плетнёва.

Элбэх оҕолоохторго эбии ханнык чэпчэтиилэр баалларый?

Федеральнай Мунньахха Анал этиитин кэмигэр Владимир Путин иһитиннэрбит биир сорудаҕа элбэх оҕолоох ыалларга “алта суотайга нолуогу” суох оҥорууну таарыйар. Туһааннаах сокуон муус устар 15 к. күүһүгэр киирдэ: кинилэр билигин сир нолуогар нолуок базатын быһаа­рыыга алта суотай сири көҕүрэтиигэ бырааптаахтар.

Ааспыт сыл алтынньыга президент илии баттаабыт сокуонунан, 12 саастарыгар диэ­ри 3 уонна онтон элбэх оҕону төрөппүт дьиэ кэргэттэр сыллата бэйэлэригэр табыгастаах кэмҥэ төлөнөр уоппусканы ылар кыахтаннылар.

Санатар буоллахха

Федерация Сэбиэтигэр палаата бэрэссэдээтэлэ Валентина Матвиенко сорудаҕынан элбэх оҕолоох дьиэ кэргэттэр тустарынан сокуоҥҥа үлэ барар, ол докумуоҥҥа Россия дьонун бу категориятыгар бары мэктиэлэр бигэргэтиллиэхтэрэ. «Онто суох элбэх оҕолоох дьиэ кэргэттэр ахсааннара үүнэригэр суоттанар сатаммат», — диэн бэлиэтээбитэ спикер.

Элбэх оҕолоох ыалларга бэриллэр чэпчэтиилэр ортолоругар итини сэргэ маннык өйөбүл көрүллэр:

◆ ДьУоКХ өҥөлөрүгэр 30 быры­һыаннаах чэпчэтии;

◆ оҕо лааҕырдарыгар босхо путевкалар, санаторийга-куруорка эмтэнэр миэстэҕэ айанныылларыгар 50 бырыһыаннаах чэпчэтии;

◆ музыкальнай оскуолаҕа, искусство оскуолатыгар уонна атын эбии үөрэхтээһин коммерческайа суох тэрилтэлэригэр үөрэнэллэригэр 50 бырыһыаннаах чэпчэтии;

◆  поликлиникаларга уочараты таһынан оҕолору көрүү;

◆ 6-гар диэри саастаах ыарыһах оҕолорго босхо эмп;

◆ элбэх оҕолоох дьиэ кэргэттэр оскуолаҕа үөрэнэр оҕолоро куорат тырааныспарыгар босхо айанныыр, оскуолаҕа аһыыр итиэннэ оскуолаҕа кэтэр таҥаһы босхо ылар кыахтаахтар;

◆ элбэх оҕолоох дьиэ кэргэттэргэ саадка, оҕуруокка эбэтэр дьиэ тутуутугар учаастактар ананаллар.

РФ Федеральнай Мунньаҕын «Парламент хаһыатын»

матырыйаалларынан