Суррогатнай ийэлэргэ сокуон суруллуоҕа

Суррогатнай ийэ буолуу рекламата сокуонунан хааччахтанара суолталаах

Оччоҕуна суррогатнай ийэ уонна оҕо биологическай төрөппүттэрэ бэйэ-бэйэлэрин иннилэригэр эбээһинэстэрин кытаанахтык сүрүннүөхтэрэ, оттон кинилэр түһэрсибит дуогабардарыгар үһүс өрүт – хат буолбут дьахтары көрөр-истэр медицинскэй тэрилтэ баар буолуоҕа. Госдума доруобуйа харыстабылыгар кэмитиэтин бэрэссэдээтэлэ Дмитрий Морозов бу эйгэҕэ баар итэҕэстэри сабар сокуон барылын оҥорууну түмүктээн эрэр. Сыл бүтүөр диэри докумуон парламеҥҥа киирэрэ сабаҕаланар.

Оҕоҕо  ким бырааптааҕый?

“15 сыллааҕыта суррогатнай ийэ буолуу биһиги дойдубутугар олус сэдэх көстүүнэн ааҕыллара, билигин Волгоград биир соҕотох перинатальнай киинигэр (мин Госдумаҕа Волгоград уобалаһын бэрэстэбиитэлинэн буолабын) сыллата итинник 10-12 хат дьахтар баар буолар”, – диэн кэпсээтэ Госдума доруобуйа харыстабылыгар кэмитиэтин чилиэнэ Татьяна Цыбизова.

“Билигин сокуон итиннэ сыһыаннааҕы бэрт дуона суоҕу этэр, ол курдук оҕону иһигэр бүөбэйдээбит дьахтар кинини биологическай төрөппүттэригэр биэрэр эбээһинэһэ да суруллубат (оҕо төрөөбүтүн туһунан сибидиэтэлистибэҕэ генетическэй ийэтин, аҕатын суруйалларыгар оҕону төрөппүт дьахтар суругунан сөбүлэҥэ ирдэнэр). “Суррогатнай ийэ саҥа төрөөбүт оҕоттон аккаастаныан баҕарбат буоллаҕына, бу түгэҥҥэ үөскүүр боппуруос биһиэхэ билиҥҥэ диэри аһаҕас, оттон атын дойдуларга сокуоннар оҕоҕо ким бырааптааҕын чуолкайдык быһаараллар, — диэтэ Татьяна Цыбизова. – Салгыы атын түгэн: дьахтар бэйэтин бюджетын толорор туһугар суррогатнай ийэ буолар, ол кэннэ хат буоларын тухары оҕо доруобуйатыгар кэһиилээҕин туһунан биологическай төрөппүттэригэр эппэт”. Дьиҥэр, ити туһунан хат дьахтары көрөр медиктэр иһитиннэриэхтээхтэр, ол эрээри кинилэр суррогатнай ийэ уонна генетическэй төрөппүттэр икки ардыларыгар дуогабарга олох да суохтар, онон ити “саҥата суох хаалыыга” ханнык да эппиэтинэһи сүкпэттэр. Депутат бэлиэтииринэн, суррогатнай ийэ буолуу туһунан дуогабар икки өрүттээх буолуо суохтаах, итиннэ ону таһынан медицинскэй тэрилтэ эбээһинэстэрэ, эппиэтинэһэ булгуччу суруллуох тустаахтар.

Оҕону төрөтүүгэ өҥө төһө  сыаналааҕый?

Суррогатнай ийэ уонна генетическэй төрөппүттэр икки ардыларыгар дуогабар ханнык региоҥҥа түһэрсиллэриттэн өҥө сыаната тутулуктаах.

Регионнар үгүстэригэр оҕону төрөтүүгэ өҥө сыаната    1,5-тан 2 мөлүйүөҥҥэ диэри.

Уустук түгэннэргэ ити өҥө суумата     3-4 мөлүйүөн солкуобай  буолуон сөп.

Депутат Татьяна Касаева генетическэй төрөппүттэр уонна суррогатнай ийэлэр бырааптара, эбээһинэстэрэ сокуоҥҥа быһаарыллыбатахтарын, дуогабарга эрэ ахтыллалларын эттэ. “Ити ситэтэ суох. Хас биирдии өрүт араас мөлтөх содуллартан страховкаланыахтаах”, – диэн ааҕар кини. Оттон маннык сокуонунан быһаарыллыбатах балаһыанньаҕа оҕо генетическэй төрөппүттэринээҕэр суррогатнай ийэ оҕоҕо юридическай өттүнэн ордук бырааптаах, ити да иһин суррогатнай ийэ барыһы баһан ылар туһугар соруйан “оҕону биэрэр бириэмэтин тардыан” сөп.

Кырачаан оҕо атын түгэҥҥэ эмиэ сиэртибэ быһыытынан буолуон сөп. “Эмбрион ханнык төрөппүт киэнэ буоларын эрдэттэн быһаарар наадалаах, – диэтэ Татьяна Касаева. – Маннык балаһыанньаны өйгө оҥорон көрүҥ – суррогатнай ийэ хат буолбут, оттон эр киһи уонна дьахтар арахсан эрэллэр. Оҕо кимиэхэ тиксэрий?”

Итини таһынан, кини этэринэн, суррогатнай ийэ оҕону биэрэртэн аккаастаныытын түмүгэр үөскүүр түгэннэр сокуоҥҥа ончу көрүллүбэттэр. “Дьахтар оҕону бэйэтигэр хаалларарга быһаарар, маныаха оҕо биологическай аҕата биллэр. Оттон биһиги дойдуга аҕа буолуу – бу оҕону иитиигэ, улаатыннарыыга эбээһинэстэр”, – диэн санатта Татьяна Касаева. Онон дуогабар усулуобуйатын толорортон аккаастанар дьахтар ити эбээһинэстэри эр киһиттэн ирдиир бырааптаах.

Ыспыраапка

Бүгүҥҥү күҥҥэ суррогатнай ийэҕэ туруоруллар ирдэбиллэр:
– ийэ буолар дьахтар сааһа 20-35;
– дьахтар бэйэтин доруобай оҕотун төрөппүт буолуохтаах;
– дьахтар доруобуйата медицинскэй экспертизанан бигэргэтиллэрэ наадалаах;
– дьахтар кэргэннээх буол­лаҕына, бэйэтин уонна кэргэнин сөбүлэҥэ ирдэнэр.

 

Суррогатнай  ийэҕэ сыһыан  тосту уларыйыахтаах

Госдума доруобуйа харыстабылыгар кэмитиэтигэр бэлэмнэммит сокуон барыла ыйыллыбыт итэҕэстэри сокуоҥҥа сабар аналлаах. Итини сэргэ парламентарийдар суррогатнай ийэҕэ уопсастыба өттүттэн соччото суох сыһыан баарыттан дьиксинэллэр. “Оннооҕор аата бэйэтэ – суррогатнай – мөлтөх өйдөбүлү биэрэр: холобур, арыгы суррогатыттан дьон тыыннара быстар, – диэн бэлиэтээтэ Татьяна Цыбизова. – Биһиги санаабытыгар, сокуоҥҥа маны атыннык ааттыахтаахпыт. Холобур, донор ийэ диэн, ол эбэтэр бу донордааһынтан атын буолбатах. Маныаха ити донордааһын түгэннэрин 99,9 бырыһыаныгар донор этигэр-хааныгар ханнык да хоромньу оҥоһуллубат”.

Уопсастыбаннай тэрилтэлэр бэйэлэрин өттүлэриттэн суррогатнай ийэ буолууну бизнескэ кубулутууну таһаарбат туһугар, ымпыктаан-чымпыктаан толкуйдуурга көрдөһөллөр. “Бу процесс индустрия буоларын уонна олохторун ханнык эрэ кэрдииһигэр харчыга наадыйар дьахталларбытын, ордук омук дойдуларын дьонугар “инкубаторга” кубулута сатыыр клиникалар үөскүүллэрин таһаарыа суохтаахпыт”, – диэн бэлиэтээтэ элбэх оҕолоох дьиэ кэргэттэр Ассоциацияларын президенэ Елена Фоминых.

Эксперт санаатынан, бу процесс аһаҕас буолуутун хаач­чахтааһыны толкуйдуур наадалаах. “Холобур, сорох дойдуларга бэйэни суррогатнай ийэ быһыытынан эбэтэр суррогатнай ийэни көрдүүр туһунан аһаҕастык  биллэрии бобуллар”, — диэн быһаарда кини. Ону таһынан, Елена Фоминых ааҕарынан, суррогатнай ийэ буолуу рекламата сокуонунан хааччахтанара суолталаах.

Интернет матырыйаалларыгар олоҕуран Елена БАИШЕВА бэлэмнээтэ.