07 марта 2019 в 16:42

«Амма түмсүү» 25 сылын үөрэ-көтө бэлиэтээтэ

Дьокуускайга олорор аммалар Сомоҕолоһуу сылыгар түмсүүлэрэ тэриллибитэ үйэ чиэппэрдээх үбүлүөйүн үөрүүлээхтик бэлиэтээтилэр. Бу күн дойдуларын амтаннаах аһа, уран тарбахтаахтар оҥоһуктара, араас атыы-тутуу хото тардыллан, кэлбит эрэ киһи хайаатар да илии тутуурдаах барда.

Дьоро күҥҥэ аҥардас ырыа-тойук эрэ буолбакка, киэҥ кэпсэтиилээх «төгүрүк остуол» ыытылынна. Кэпсэтиини «Амма түмсүү» салайааччыта Ньургуйаана Илларионова салайан ыытта. Аны сайын Аммаҕа Саха сирин норуоттарын 7-с спортивнай оонньуулара ыытыллалларынан бу тула санаа атастаһыыта буолла.

Ил Түмэн дьокутаата Руслан Федотов, улуус баһылыга Николай Архипов, «Чороон 21-с үйэ» директора Софья Попова, Марфа уонна Сергей Расторгуевтар ааттарынан СӨ судаарыстыбаннай циркэтин директора уонна уус-уран салайааччыта Сергей Расторгуев, Амма улууһун дьокутааттарын Сэбиэтин бэрэссэдээтэлэ Софья Александрова, «Чолбон» бассейн директора Аркадий Прокопьев, СӨ култуураҕа уонна духуобунай сайдыыга министиэристибэтин кылаабынай исписэлииһэ Вера Моисеева, Амма нэһилиэгин баһылыга Михаил Артемьев уонна да атыттар Оонньууга бэлэмнэнии хаамыытын, өссө туох-ханнык быһаарылла илик боппуруостар баалларын, ханна болҕомто ууруллуон наадатын туһунан иһитиннэриилэри оҥордулар. «Төгүрүк остуол» түмүгүнэн резолюция ылылынна. Манна сүрүн болҕомто «Амма түмсүү» оонньууларга ыалдьыт курдук тахсыбакка, улууска көмө-тирэх буоларыгар уурулунна.

Үбүлүөйдээх тэрээһин Дьокуускайга олорор талааннаах аммалар эҕэрдэ кэнсиэрдэринэн түмүктэннэ. Үөрүүлээх чааска урукку сылларга үлэлээн ааспыт, түмсүү тэриллиитин сылларыгар үлэлэспит салайааччыларга Махтал бэлиэлэрэ — Амма символа — Сардаана сибэккилээх бэлиэ туттарылынна. Амматтан «ВИА-80» тахсан тыыннаах доҕуһуолунан үҥкүү тэрийдэ. Өрөспүүбүлүкэҕэ биллэриллибит Сомоҕолоһуу сылыгар бу күн «Аммалар бары — биирбит!» диэн өрө күүрүүлээх айхал тылларынан түмсүү тэриллибитэ 25 сыллаах үбүлүөйүн түмүктээтилэр.

Ирина Ханды