100 саастаах эмчити эҕэрдэлээтилэр

Үйэ саас 

Соторутааҕыта Доруобуйа харыстабылын министиэристибэтин үлэһиттэрэ 100 сааһын туолбут Романова Матрена Петровнаны бэлиэ түгэнинэн эҕэрдэлээтилэр.

Романова Матрена Петровна 1919 с. кулун тутар 15 күнүгэр Мэҥэ-Хаҥалас улууһун Тараҕай нэһилиэгэр төрөөбүт.
1939 сылга Дьокуускайдааҕы медицинскэй училищеҕа үөрэнэ киирбит, ону бүтэрэн “акушер” идэтин ылбыт.
1942 сыл кулун тутарыгар Бүлүү оройуонугар үлэҕэ ыытыллыбыт. Матрена Петровна олоҕун ааспыт сылларыгар доруобуйа харыстабылын эйгэтигэр араас дуоһунастарга, сиэстэрэттэн, акушертан саҕалаан акушер пуунун сэбиэдиссэйигэр тиийэ үлэлээбит.
Билигин Матрена Петровна икки оҕолоох, 12 сиэннээх, 15 хос сиэннээх.
Министиэристибэ судаарыстыбаннай сулууспаҕа отделын салайааччыта Вера Аржакова: “Маннык үбүлүөй — олус суолталаах түгэн, маннык бочуоттаах сааска диэри тиийэр киһи ахсааннаах. Биһиги уһун үйэлээх киһибитигэр өрүү чэгиэн-чэбдик сылдьарыгар, олоҕу таптыыра хаһан да уостубатыгар, оттон чугас дьоно киниэхэ кыһамньылаах сыһыаннарынан үөрдэ туралларыгар баҕарабыт. Хас биирдии күн киниэхэ үөрүүнү уонна үтүөнү бэлэхтээтин”, — диэн эҕэрдэтин эттэ.