13 июля 2018 в 12:20

Үс сылга диэри төлөбүрү уһатыахтарын сөп

Оҕону 1,5 сааһыгар диэри көрүүгэ-истиигэ ый аайы бэриллэр көмө харчы төлөнөр болдьоҕун икки төгүлүнэн – оҕо үс сааһыгар диэри уһатыахтарын сөп. Оччоҕуна кырачааннара 3 сааһын туолуор диэри кинилэри көрөр-истэр ийэлэр уоппускаларын кэмигэр эбии харчыланар кыахтаахтар. Ол эрээри оҕо саадыгар тэриллибит дьааһыла бөлөҕөр оҕоҕо миэстэ тиксибэтэх буоллаҕына эрэ ити харчыны ылыахтара.

Госдума сокуон барылын бастакы ааҕыыга көрүөн иннинэ дьиэ кэргэн, дьахталлар уонна оҕолор боппуруостарыгар кэмитиэккэ көрөргө былааннаммыта.

Докумуону Госдумаҕа Сергей Вострецов уонна Сергей Катасонов баһылыктаах депутаттар бөлөхтөрө киллэрбитэ. Көҕүлээһин ааптардара бэлиэтииллэринэн, кыра саастаах оҕолору дьааһыла бөлөхтөрүгэр миэстэнэн хааччыйыыга сытыы кыһалҕалар бааллар.

Итиннэ ыарахаттар көстөллөрүнэн, элбэх ийэ оҕото 3 сааһын туолуор диэри уоппускаҕа олорорго күһэллэр. Оттон ый аайы бэриллэр көмө харчыны оҕо 1,5 сааһын туолуор диэри эрэ төлүүллэр.

Манан сибээстээн оҕо 1,5 сааһыгар диэри төлөнөр ыйдааҕы көмө харчы төлөнөр болдьоҕун оҕо 3 сааһыгар диэри уһатарга итиэннэ оскуола иннинээҕи судаарыстыбаннай эбэтэр муниципальнай үөрэх тэрилтэтигэр миэстэ бэриллибэтэх буоллаҕына, 3-тэн 7 сылга диэри уһатарга этиллэр. Туһааннаах үөрэх тэрилтэтигэр миэстэни биэрэр кыах суоҕун туһунан бигэргэтэр докумуон баар буоллаҕына эрэ итинник босуобуйа төлөнүөхтээх.