607
11 декабря 2017 в 14:07
2020 сылга диэри 10 тыһыынча киһи үлэ булуон сөп
СИА иһитиннэрбитинэн, Саха сирин Ил Дарханын салалтатынан өрөспүүбүлүкэ сиригэр кадрдары бэлэмнээһин уонна бастайааннай олорор гражданнары үлэҕэ көһөрүү суотугар бастакы суолталаах бырайыак олоххо киириэҕэ. Номнуо кэлэр сылтан норуот хаһаайыстыбатын сүрүн салааларыгар омук дойдуларыттан үлэһит күүһү тардыыга бобууну олохтуур былаан баар.
«Өрөспүүбүлүкэҕэ 2020 сылга диэри бастакы суолталаах бырайыак бигэргэтилиннэ, ол быһыытынан бырамыысыланнас тэрилтэлэригэр 10 тыһыынчаттан аҕыйаҕа суох Саха сирин дьонун үлэҕэ ылыахтара: тыа сириттэн – 1 тыһыынчаттан аҕыйаҕа суох дьону, 30-гар диэри саастаах эдэр дьону – 5 тыһыынчаттан аҕыйаҕа суох», — диэн Нэһилиэнньэ дьарыктаах буолуутугар судаарыстыбаннай кэмитиэт бэрэссэдээтэлин солбуйааччы Гаврил Харлампьев коллегия мунньаҕар иһитиннэрдэ.
Биэдэмистибэ бэрэстэбиитэлэ санаппытынан, үлэ национальнай ырыынагын көмүскүүр, үлэтэ суох буолууну намтатар сыалтан 2017 с. кулун тутарыгар Саха сирин баһылыгын ыйааҕынан экономическай үлэ сорох көрүҥнэригэр патент төрүтүгэр үлэлиир омук дойдуларын гражданнарын үлэ биэрээччилэр тардаллара бобуллубута. Быйыл эмиэ патеннарга төлөбүр муҥутуур улахан суумата ыйга 8762 солк. олохтоммута.
«Билигин Судаарыстыбаннай кэмитиэт 2018 сылга тутуу, сир туһалаах баайын хостооһун, тырааныспар, тыа хаһаайыстыбатын уонна доруобуйа харыстабылын эйгэлэригэр омук сирин гражданнарын тардары бобор туһунан ыйаах барылын бэлэмнээн, сөбүлэһиннэриигэ ыытта», — диэн эттэ Харлампьев.
Кини тылыгар сигэннэххэ, алтынньы 1 к. туругунан өрөспүүбүлүкэҕэ 16,5 тыһ. атын дойдулар гражданнара үлэлииллэрэ, сүнньүнэн Таджикистан, Кыргызстан, Узбекистан уонна Армения гражданнара. Кинилэртэн 8,8 тыһыынчата көҥүллүүр докумуона суох үлэлээбиттэр. Оттон ити кэмҥэ тохсунньуттан сэтинньигэ диэри өрөспүүбүлүкэ дьарыктаах буолуу сулууспаларыгар 35 тыһыынча Саха сирин олохтооҕо кэлэн үлэ көрдөөбүт, кинилэртэн 59% үлэҕэ олохтоммут.
