Керамограниты оҥорор собуот тутуллуоҕа

Бырайыак быһыытынан, Саха сиригэр керамическай плитканы уонна керамограниты оҥорон таһаарар бастакы собуокка 400 үлэ миэстэтэ тахсыаҕа, сылга 3 мөл. кв. м бородууксуйаны таһаарар буолуоҕа диэн, инвестицияны тардыыга уонна өрөспүүбүлүкэҕэ экспоры өйөөһүҥҥэ Агентство ый аайы тахсар иһитиннэрэр бүлүтүөнүгэр сигэнэн, СИА тиэрдэр.

«ЯкутКерама» хампаанньа бырайыагын быһыы­тынан, үбүлээһин кээмэйэ 1,5 млрд солк. буолуоҕа. Хаҥалас улууһун Мохсоҕоллоох бө­һүөлэгэр олохтоох сырьеттан үрдүк хаачыстыбалаах керамическай плитканы уонна керамограниты оҥорон таһаарар собуот 180-тан 400-кэ тиийэ үлэ миэстэтин тэрийэр кыаҕы биэриэҕэ, оттон орто хамнас 45 тыһ. солк. тэҥнэһиэҕэ.
Бырайыагы көҕүлээччи 2 мөл. кв. м керамограниты уонна 1 мөл. глазурованнай керамическай плитканы оҥорор былааннаах. Бородууксуйатын 50% кини тутуу хампаанньаларыгар, 20% — нэһилиэнньэҕэ, 30% — регионнарга, чуолаан, Уһук Илиҥҥэ, Уралга уон­на Сибииргэ батарар санаалаах. Бу тэрилтэ региоҥҥа соҕотох буолуоҕа. Оҥорон таһаарыыга наадалаах сырье барыта Саха сиригэр баар. Оттон итинник атын собуоттар сырьелара бэйэлэрин сирдэригэр суох эбит.
Бырайыакка бэлиэтэнэринэн, Мох­соҕоллоох бөһүөлэгэр тутууга анаан талыллыбыт былаһааккаҕа толору цикллаах үрдүк технологиялаах керамиканы оҥорон таһаарыыга бары кыахтар бааллар. Тутууга анаммыт сир уопсай иэнэ 12 гектарга тэҥ.
Бизнес-былаан уонна финансовай модель быһыытынан, 1,8 млрд солк. кээмэйдээх үп эргиирэ, 1,1 млрд солк. ыраас барыс уонна бюджекка 550 мөл. солк. киириитэ сабаҕаланаллар. Объект 2020 сыл бүтүөр диэри үлэҕэ киирэрэ былааннанар.
Бырайыагы Саха сирин предпри­нимательствоҕа министиэристибэтэ, инвестициялары тардыыга уонна өрөспүүбүлүкэҕэ экспоры өйөөһүҥҥэ агентство, Мохсоҕоллоох администрацията уонна олохтоох нэһилиэнньэ өйөөтүлэр. Кулун тутар 4 к. агентство бииргэ үлэлиэн сөптөөх өрүттэри билиһиннэрэр уонна бииргэ үлэлээһин боппуруостарын дьүүллэһэр сыалтан «ЯкутКерама» хампаанньа Кытай Чжунькунь Цзюйлинь научнай-техническэй корпорациятын кытта көрсүһүүтүн тэрийдэ. Агентство бырайыагы олоххо киллэриигэ салгыы көмөлөһөр сорук­таах.

Григорий Фоменко, СИА