Албыннааһын иһин накаастабыл кытаатыаҕа

Биэдэмистибэ правовой управлениетын начальнига Наталья Андрияшина быһаарбытынан, административнай буруйу оҥоруу туһунан Кодекска уларытыы быһыытынан албын ас-үөл бородууксуйатын оҥорон таһаарыы уонна дойду сиригэр-уотугар киллэрии иһин ыстараабы олохтуурга этиллэр: 10-15 тыһ. солк. – дуоһунастаах сирэйдэргэ, 30-50 тыһ. солк. – биирдиилээн предпринимателлэргэ, 50-100 тыһ. солк. – юридическай сирэйдэргэ. Ураты бөдөҥ кээмэйдээх албын бородууксуйа уонна эрдэттэн сүбэлэһэн бөлөх дьон буруйу оҥорууларын иһин холуобунай эппиэтинэһи олохтуурга этэллэр – сыл аҥаарыгар диэри хаайыы.
Ити көҕүлээһини Монополияны утары федеральнай сулууспаҕа, Россельхознадзорга эмиэ өйүүллэр. Россия Монополияны утары федеральнай сулууспатын судаарыстыба сакааһын таһаарыыны хонтуруоллуур Управлениетын начальнигын солбуйааччы Роман Семенов этэринэн, оҥорон таһаарааччылар бородууксуйаларын батарыыны тэрийиигэ болҕомтону күүһүрдүөхтэрэ – билигин баар накаастабыл бэйэлэрин өҥөлөрүн хаачыстыбатыгар кыһаналларыгар предпринимателлэри көҕүлээбэт. Экспердэр дааннайдарынан, үгүс өттүгэр үүт оҥоһуктарга – арыыга, творогка, сүөгэйгэ албыннааһын көстөр.
Хаачыстыбата суох аһылыктан сылтаан Люберецкайдааҕы кадеттар оскуолаларыгар сыстыганнаах ис ыарыытыттан 65 киһи балыыһаҕа киирбитэ. Манан сибээстээн Роспотребнадзор хос бэдэрээтчиттэри оҕо тэрилтэлэригэр аһылыгы батарыыттан туоратарга этии оҥордо.
Оскуола директора да, оҕо саадын сэбиэдиссэйэ да аһылык хаачыстыбатын сөптөөхтүк бэрэбиэркэлиир кыаҕа суох – манна дьиҥнээх профессионаллар наадалар диэн ааҕар “За Честные Продукты!” федеральнай бырайыак сүрүннээччитэ Александр Бражко. «Тэрилтэлэр салайааччыларыгар чинчийиини оҥорорго квалификациялара үрдүк лабораториялар исписэлиистэрэ көмөлөһүөхтэрин сөп», — диэн бэлиэтээтэ эксперт.

Госдума хонтуруолга уонна регламеҥҥа кэмитиэтин бэрэссэдээтэлин бастакы солбуйааччыта Олег Нилов санаатынан, албын бородууксуйа иһин тус эппиэтинэһи киллэрэр наадалаах. «Олоххо суоһааһын иһин оҥорон таһаарааччы куттаныах тустаах. Онуоха эбии Россия дьонун олоҕун хаачыстыбата уонна үйэтин уһуна судаарыстыба бастакы суолталаах соругунан буоллулар», — диэтэ депутат. Онон оҕо аһылыгын хаачыстыбата парламент хонтуруолугар хаалыаҕа – Федерация Сэбиэтин аграрнай-ас-үөл политикатыгар уонна айылҕаны туһаныыга Кэмитиэтигэр оҕо аһылыгар анаан ас-үөл бородууксуйатын оҥорон таһаарыы, онон эргинии эйгэтигэр сыһыаннары сүрүннүүр сокуон барылын оҥорууга үлэлиир бөлөх номнуо тэрилиннэ.