Биир дойдулаахтарынан киэн тутта

Баай историялаах, өрөспүүбүлүкэҕэ үтүө үлэлэринэн биллэр үгүс дьону көччөх гынан көтүппүт нэһилиэк туһунан киинэни норуот депутата Иван Данилов уонна Дьабыыл нэһилиэгин баһылыга Сергей Сергучев көҕүлээһиннэринэн уһуллулар.

Киинэҕэ олохтоохтор кинилэр кыра нэһилиэктэриттэн тахсыбыт дьон төрөөбүт дойдуларын туһугар үлэлээбиттэрин кэпсииллэр. Ол курдук, Нуораҕана диэн кыра сэлиэнньэттэн кимнээх төрүттээх эбиттэрий?
Нарком Н.В.Петров, суруйааччы Г.В.Баишев — Алтан Сарын, Социалистическай Үлэ Геройа М.А.Федотов, бастыҥ үлэһиттэр, сэрии ветераннара А.И.Борисов – Улахан Бачылла, А.Р.Баишев – Аччыгый Бачылла, САССР үтүөлээх учуутала Т.С.Иванов, РФ үтүөлээх юриһа, Мэҥэ Хаҥалас бочуоттаах мецената, суруйааччы Н.Ф.Борисов – Ньукулай Уус, “Уран уус” бырагыраама автора, маастар-педагог С.В.Байаҕантаайап, “Үрүҥ Уолан” бырагыраама автора, учууталлар учууталлара Т.С.Тимофеев, бастакы идэтийбит хормейстер, РСФСР үтүөлээх артыыската Ф.А.Баишева, биллиилээх балерина, РСФСР, САССР үтүөлээх артыыската К.А.Иванова, дойду, өрөспүүбүлүкэ үтүөлээх артыыстара К.Д.Борисов, Р.И. Березкин, А.М.Борисова, авиация сайдыытыгар үтүөлээх Сергеев Ф.С., Березкин И.И., САССР үтүөлээх геолога В.И.Березкин уонна да атыттар.

Киинэни “Саха” көрдөрөр-иһитиннэрэр хампаанньа редактора Гаврил Захаров режиссердаан устубут. “Биһиги нэһилиэкпит баай историятынан, улуу дьоннорунан уратылаах. Быыкаа нэһилиэктэн бу курдук элбэх талааннаах, киэҥ билиилээх, үлэһит дьон үүнэн-сайдан тахсыбыттара үгүһү этэр. Дьабыыл нэһилиэгэ чөл олох сиэрин тарҕатар нэһилиэгинэн буолар. Биһиги биир дойдулаахтарбыт биллэр спортсменнар буолбуттара. Көҥүл тустууга ССРС спордун маастардара Егор уонна Василий Борисовтар, Петр Березкин, Никита Сергеев, Петр Свешников, марафонец Степан Федорович Лыткин. Ол да иһин Спорт албан аатын музейа аан бастаан биһиги нэһилиэкпитигэр арыллыбыта. Киинэни уһуларга олохтоохтор бары көмөлөспүттэрэ, ол эмиэ үгүһү этэр. Сомоҕолоһуу сылыгар уопсастыбаннас, үбүнэн көмөлөһөөччүлэр уонна нэһилиэнньэ буолан биир киһи курдук үлэлээтибит”, — диэн “Дойду ситимэ” уопсастыбаннай тэрилтэ чилиэнэ Анна Пермякова кэпсиир.
Дьоҕус, ол эрэн ураты күүстээх тыыннаах нэһилиэк туһунан документальнай киинэ киһи төрөөбүт дойдутун дьиҥнээх патриота буоларыгар, ыччаты иитиигэ суолталаах буолара саарбахтаммат.

Сардаана КУЗЬМИНА