Дьиэ кэргэн кодексын балаһыанньалара хаттаан көрүллүөхтэрэ

Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова кулун тутар 29 к. РФ Дьиэ кэргэн кодексын балаһыанньаларын тупсарыыга анаммыт парламент истиилэригэр кытынна.

«Олоҕор эбэтэр доруобуйатыгар быһаччы куттал суоһаатаҕына оҕоҕо судаарыстыба көмүскэлин чааһыгар дьиэ кэргэҥҥэ аналлаах сокуоннар ба­лаһыан­ньаларын тупсарыы” диэн темаҕа парламент истиилэрин Фе­дерация Сэбиэтин конституционнай сокуону оҥорууга уонна судаарыстыбаннай тутууга Кэмитиэтин бэрэссэдээтэлин сол­буйааччы, ФС Быстах кэмнээх хамыыһыйатын баһылыга Елена Мизулина салайан ыытта.

Манна олоҕор уонна доруобуйатыгар быһаччы куттал суоһаатаҕына, оҕону судаарыстыба өттүттэн көмүскээһин туһунан кэпсэттилэр.
Алена Атласова: «Хас биирдии оҕо төрөөбүт дьиэ кэргэнигэр иитиллэригэр дьулуһар наадалаах. Кутталлаах бөлөххө киирэр дьиэ кэргэттэр быһыыны-майгыны бэйэлэрэ быһааралларыгар көмөлөһөр туһугар судаарыстыба сүрүн болҕомтону сэрэтэр үлэҕэ туһаайыахтаах. Эппиэкэ уорганнарын өттүттэн орооһуу уһук дьаһалынан буолуохтаах, маннык дьайыылары сүрүннээһин сокуоҥҥа чуолкайдык суруллуох тустаах», — диир.

Парламент истиилэрин түмүгэр сүбэлээһиннэр ылыллыбыттар. Ол чэрчитинэн Федерация Сэбиэтигэр РФ Дьиэ кэргэн кодексын тупсарыыга этиилэри бэлэмниир анал хамыыһыйа тэриллибит. Бу дойдуга дьиэ кэргэн сыһыаннаһыыларын нуормалыыр сүрүн докумуон балаһыанньаларын, дьиэ кэргэн үгэскэ киирбит сыаннастарын сөргүтүүнү учуоттаан, хаттаан көрүү боппуруоһа дьүүллэһиллиэҕэ.