01 марта 2019 в 18:18

Дьокуускайга Федерация Сэбиэтин мунньаҕа ыытыллыаҕа

Быйыл муус устарга өрөспүүбүлүкэ киин куоратыгар Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар Кэмитиэтин көһө сылдьар киэҥ ыҥырыылаах мунньаҕын ыытар туһунан сөбүлэһии Саха сирин Баһылыга Айсен Николаев олунньу 26 к. Москваҕа Россия парламенын үөһээҥҥи палаататын спикерэ Валентина Матвиенконы кытта көрсүһүүтүн түмүгэр ситиһилиннэ. Ити туһунан СӨ Ил Дарханын уонна Бырабыыталыстыбатын пресс-сулууспата иһитиннэрдэ.

Федерация Сэбиэтин туһааннаах кэмитиэтин мунньаҕын бэбиэскэтигэр РФ Арктикатааҕы зонатын сайдыытын сокуонунан хааччыйыы, Хотугу муора суолун сайдыытын, Арктиканы уонна кини олохтоохторун өйөөһүн, сайдыытын боппуруостара киллэриллиэхтэрэ.
Санаттахха, СӨ Судаарыстыбаннай Мунньаҕын (Ил Түмэн) бэрэссэдээтэлэ Петр Гоголев олунньу ый ортотугар Москваҕа Саха сирин парламенын 25 сылыгар анаммыт тэрээһиннэри бэлэмнээһин чэрчитинэн көрсүһүүлэри ыыппыта.

«Биһиги ити түгэҥҥэ аналлаах кэккэ тэрээһиннэри муус устарга ыытар былааннаахпыт. Бу тэрээһиннэр үлэ быһыытыгар-майгытыгар буолуохтара, кинилэр булгуччу өрөгөйдөөх буолуо суохтаахтар, үйэ чиэппэрдээх датаны, биһиги көрүүбүтүгэр, бүгүн суолталаах үгүс боппуруостары быһаарыыга туһанар наадалаах», — диэтэ кини.
Чуолаан, Ил Түмэн спикерэ Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтин бэрэссэдээтэлэ Олег Мельниченконы кытары көрсүбүтэ, ол кэмҥэ өрүттэр икки тэрээһини былааннаабыттара.
«Ол Саха Өрөспүүбүлүкэтин Судаарыстыбаннай Мунньаҕын (Ил Түмэн), Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтин, Федерация Сэбиэтин иһинэн Арктикаҕа уонна Антарктикаҕа Сэбиэт кыттыгас мунньахтара буолуоҕа, ол аата үс уорган бииргэ түмсүөҕэ. Биһиги Россия Федерациятын Арктикатааҕы зонатын сайдыытын стратегиятын сокуонунан хааччыйыы уонна 2020 сылга диэри РФ-ҕа национальнай куттал суох буолуутун хааччыйыы боппуруостарын дьүүллэһиэхпит», — диэн иһитиннэрдэ Петр Гоголев.
Ил Түмэн Бэрэссэдээтэлэ итини сэргэ өссө биир тэрээһин — Федерация Сэбиэтин кэмитиэтин итиэннэ Арктикаҕа уонна Антарктикаҕа Сэбиэтин кыттыгас мунньаҕа былааннаммытын эттэ. Бу Дьокуускайга буолуохтаах мунньахха Саха Өрөспүүбүлүкэтин социальнай-экономическай сайдыытын өйөөһүҥҥэ Федерация Сэбиэтин 2017 с. ахсынньы 26 к. уурааҕын толоруу хаамыыта көрүллүөҕэ.
«Россия Федерациятын Бырабыыталыстыбатыгар, РФ судаарыстыбаннай былааһын уорганнарыгар, Саха Өрөспүүбүлүкэтин Судаарыстыбаннай Мунньаҕар (Ил Түмэҥҥэ) сорудахтар тиэрдиллибиттэрэ. Биһиги тэрээһин чэрчитинэн ити сорудахтар хайдах толоруллалларын көрүөхтээхпит», — диэтэ Петр Гоголев. Кини салгыы бэлиэтээбитинэн, ити боппуруос Федерация Сэбиэтин көрүүтүгэр сааскы сессияҕа киллэриллиэҕэ.