780
10 ноября 2017 в 11:55
Федерация Сэбиэтигэр көрсүһүүгэ бэлэмнэнэн
Ил Түмэн пресс-сулууспата иһитиннэрбитинэн, СӨ Судаарыстыбаннай Мунньаҕын Бэрэссэдээтэлэ Александр Жирков 2017 с. ахсынньы 13-15 күннэригэр Москваҕа Федерация Сэбиэтигэр буолуохтаах Саха Өрөспүүбүлүкэтин Күннэрин ыытыыга бэлэмнэнии боппуруостарыгар сүбэ мунньаҕы салайан ыытта.
Бу тэрээһиҥҥэ Ил Түмэн Бэрэссэдээтэлин бастакы солбуйааччы Анатолий Добрянцев, сис кэмитиэттэр бэрэссэдээтэллэрэ Алексей Еремеев, Юрий Николаев, Владимир Прокопьев, Антонина Григорьева, Елена Голомарева, Виктор Федоров, Ил Түмэн аппараатын салалтата кытыннылар.
Мунньахха норуот депутаттара бу иннинэ оҥорбут этиилэринэн, Федерация Сэбиэтигэр көрүүгэ киллэриллэр боппуруостары бэлэмнээһиҥҥэ үлэ хаамыытын дьүүллэстилэр.
Ол курдук, Федерация Сэбиэтин “Субъект чааһын” көрүҥүнэн ыытыллар пленарнай мунньаҕар сүрүн дакылааттары СӨ Ил Дархана Егор Борисов, Ил Түмэн Бэрэссэдээтэлэ Александр Жирков оҥоруохтара. Егор Борисов өрөспүүбүлүкэ социальнай-экономическай сайдыытыгар баар проблемаларга уонна кэскиллээх боппуруостарга тохтуоҕа. Ил Түмэн спикерэ Александр Жирков Саха сирин социальнай-экономическай сайдыытын сокуонунан хааччыйыыга бастакы суолталаах боппуруостары көтөҕүөҕэ.
Федерация Сэбиэтин бастайааннай кэмитиэттэрин киэҥ ыҥырыылаах мунньахтарыгар Саха Өрөспүүбүлүкэтин социальнай-экономическай сайдыытын бары сүрүн туһаайыыларыгар тутаах проблемалар дьүүллэһиллиэхтэрэ.
Норуот депутаттара бэлиэтээбиттэринэн, бу иннинэ кинилэр Федеральнай Мунньахха кэмитиэттэр уонна хамыыһыйалар мунньахтарыгар, парламент истиилэригэр, дойду регионнарын сокуону оҥорооччуларын кыттыытынан атын тэрээһиннэргэ көтөхпүт тутаах боппуруостарын тирэҕэр этиилэр бэлэмнэммиттэр.
Санаттахха, Ил Түмэн Бэрэссэдээтэлэ Александр Жирков баһылыктаах норуот депутаттара быйыл сэтинньи 3-4 күннэригэр Москваҕа Саха сирин Күннэригэр кыттыыларын чэрчитинэн Федерация Сэбиэтигэр бастайааннай кэмитиэттэр бэрэссэдээтэллэрин, сенатордары кытта “Саха Өрөспүүбүлүкэтин социальнай-экономическай сайдыытыгар судаарыстыба өйөбүлүн туһунан” Федерация Сэбиэтин Уурааҕын бэлэмнээһин, Федерация Сэбиэтин бастайааннай кэмитиэттэрин киэҥ ыҥырыылаах мунньахтарын тэрийии боппуруостарыгар кэккэ оробуочай көрсүһүүлэри ыыттылар. Чуолаан, Федерация Сэбиэтин туһааннаах кэмитиэттэрин быһаарыыларыгар барыллары, Федерация Сэбиэтин Уурааҕын барылын бэлэмнээһиҥҥэ кыттыгас үлэ саҕаланна.
Спикер Александр Жирков Саха Өрөспүүбүлүкэтин социальнай-экономическай сайдыытын туһунан Федерация Сэбиэтин тэнитиллибит Уурааҕар киллэриигэ анаан өрөспүүбүлүкэ Бырабыыталыстыбатын кытта сөбүлэһиллибит этиилэри оҥорууга олохтоохтук үлэлииргэ мунньах кыттыылаахтарын болҕомтотун туһаайда.
Өрөспүүбүлүкэҕэ бастакы суолталаах боппуруостары быһаарыыга СӨ Ил Түмэнин кэлим, утумнаах үлэтэ РФ Федеральнай Мунньаҕар салҕанар.
