Гааһы таҥастыыр биэс бырайыак олоххо киириэҕэ

Ил Дархан уонна СӨ бырабыыталыстыбатын пресс-сулууспата иһитиннэрбитинэн, Саха сиригэр гаас бородууксуйатын оҥорон таһаарыыга биэс бырайыагы былаанныыллар.

Саха сиригэр гаас бородууксуйа­тын оҥорон таһаарыыны инвестициялыыр бырайыактар тустарынан СӨ бырабыыталыстыбатын бэрэс­сэдээтэлэ Владимир Солодов салайыылаах мунньах буолбут. “Оро­буочай бөлөх сүрүн соругунан гааһы таҥастыыры инвестициялыыр бырайыактар түргэнник олоххо киирэллэрин ситиһии буолар. Гаас бородууксуйатын оҥорон таһаарыы өрөспүүбүлүкэ экономикатыгар улахан көдьүүһү аҕалыаҕар уонна социальнай хабааннаах соруктары толорорбутугар көмөлөһүөҕэр эрэнэбит”, — диэн премьер-министр эттэ.
СӨ бырамыысыланнаска уонна геологияҕа миниистир Максим Терещенко этэринэн, Саха сиригэр Алдан, Ленскэй, Бүлүү улуустарыгар, Алараа Бэстээх уонна Жатай бөһүөлэктэригэр барыта биэс бырайыагы олоххо киллэрэллэрэ былааннанар. “Көҕүлэммит бырайыактар интэриэһинэйдэр, оттук сыанатын үрдүгүн кыһалҕатын быһаарарга туһаайыллыбыттар. Бу бырайыактарынан өрөспүүбүлүкэҕэ тыһыынчаттан тахса оробуочай миэстэ тахсыаҕа” — диэн быһаарда.
Санатар буоллахха, кулун тутар 22 күнүгэр РФ Бырабыыталыстыбатын бэрэссэдээтэлин солбуйааччы – Уһук Илиҥҥэ Президент боломуочуйалаах бэрэстэбиитэлэ Юрий Трутнев уонна СӨ баһылыга Айсен Николаев мунньаҕар гаас бородууксуйатын оҥорон таһаарыыга биэс бырайыагы киллэрбиттэр, бырайыактар инвестицияларын уопсай кээмэйэ 220 млрд солк. тэҥнэспит.