Хаҥалас улууһугар — тырахтарыыстар куонкурустара

Хаҥалас улууһун Булгунньахтаах сэлиэнньэтигэр ааспыт өрөбүллэргэ тырахтарыыстар “Тимир көлө” диэн ааттаах идэлэригэр маастарыстыбаларын көрдөрөр кэрэхсэбиллээх куонкурустара буолан ааста.

Күрэстэһии биэс түһүмэҕинэн ыытылынна – тыраахтар ис тутулугар уонна куттал суох буолуутун техникатын быраабылаларыгар тест, тыраахтар тиэйэр-көтөҕөр массыынаны кытта үлэтэ, бэрэбинэлэри чууркаларга ууруу, тыраахтары тоҥуу хаарынан ыытыы уо.д.а.
Бары түһүмэхтэр түмүктэринэн бастыҥ тырахтарыыһынан Булгунньахтаах сэлиэнньэтиттэн бааһынай хаһаайыстыбатын баһылыга Валерий Гаврильев буолан, сүрүн бирииһи — 50 тыһ. солк. ылла. Иккис миэстэҕэ – Тиит-Эбэттэн Владимир Кириллин, үһүскэ – Булгунньахтаахтан Леонид Наумов таҕыстылар. Кинилэр туһааннааҕынан 20 уонна 10 тыһ. солк. туттулар.

Оройуон тыа хаһаайыс­тыбатыгар управлениетын салайааччыта Вячеслав Владимиров бэлиэтээбитинэн, бу куонкурус Хаҥалас улууһугар 2017-2019 сс. үлэ уонна нэһилиэнньэ дьарыктаах буолуутун Үс сылын чэрчитинэн ыытылынна. Тэрээһин сүрүн сыала – оробуочай идэлэр суолталарын үрдэтии, ыччаты оҥорон таһаарар эйгэҕэ тардыы, ону сэргэ тырахтарыыс чэпчэкитэ суох үлэтигэр сыһыарыы. “Кыттыылаахтар уонна көрөөччүлэр куонкуруһу олус сөбүлээтилэр, онон тэрээһин түмүктэринэн биһиги тырахтарыыстар бырааһынньыктарын сыллата ыытарга итиэннэ өссө элбэх дьону хабарга быһаардыбыт”, — диэн тэрийээччилэр бэлиэтээтилэр.

СӨ Тыа хаһаайыстыбатыгар министиэристибэтин
пресс-сулууспатын
матырыйаалларынан