Хаҥаластар суоллара тупсар

«Саха сирэ – 2011 сылтан федеральнай бырагыраамаларынан тыа сирин суолларын тутар Уһук Илин соҕотох региона буолар. Быйыл биһиги оройуоннарга 31,6 км уопсай уһуннаах трассалары үлэҕэ киллэрэр былааннаахпыт», — диэн СИА-гар өрөспүүбүлүкэ тырааныспарын уонна суолун хаһаайыстыбатын миниистирин солбуйааччы Сергей Владимиров иһитиннэрдэ.
Кини бэлиэтээбитинэн, федеральнай бырагыраамаҕа төһө кыалларынан элбэх муниципалитет кыттарыгар биэдэмистибэ интэриэстээх. Бу хайысхаҕа бырайыактары көмүскээһиҥҥэ туйгун түмүктэри Хаҥалас улууһун дьаһалтата көрдөрөр.

«Ааспыт сылга Ой, Күөрдэм, Тиит-Арыы сэлиэнньэлэригэр хаачыстыбалаах айан суолларын үлэҕэ киллэрии туоһуларынан буолбуппут. Олохтоохтор Дьокуускай уонна Покровскай куораттары кытта тырааныспарынан эрэллээх сибээстэммиттэрэ», — диэн эбэн эттэ салайааччы.
Оройуон сиригэр-уотугар 4,1 км уһуннаах уочараттаах объект үөрүүлээхтик аһыллыытыгар “Саха сирин суоллара” САУо исписэлиистэрин хаачыстыбалаах үлэтэ төһүү буолла.
Бэлиэтиир буоллахха, 2011-2016 сс. Саха сиригэр федеральнай, регионнааҕы уонна муниципальнай үбүлээһин суотугар 48,5 килэмиэтир тыа сирин суоллара тутулуннулар, маныаха 22 нэһилиэнньэлээх пуун өрөспүүбүлүкэтээҕи уонна федеральнай суолталаах уопсай туһаныллар суол ситимин кытта сылы эргиччи сибээстэһэр массыына трассатынан хааччылынна. Бу хайысхаҕа үлэ салҕанар.
Быйыл олохтоох суолталаах массыына суолларын тутууга 458 мөл. солк. көрүллүбүтэ, ол иһигэр федеральнай бюджеттан — 223,5 мөл. солк., Саха сирин Суолун фондатыттан – 220,6 мөл. солк., олохтоох бюджеттартан — 14,1 мөл. солк. Уопсайа 31,6 км уһуннаах 4 объект үлэҕэ киириитин хааччыйыы былааҥҥа баар.

Аркадий ВАСИЛЬЕВ,
СИА.