Холобур буолар ытык кырдьаҕас

Көрсүһүүгэ биллиилээх судаарыстыбаннай уонна уопсастыбаннай деятель Алексей Томтосов кыттыыны ылла.
Семен Гаврильевич Жирков Кэбээйи улууһун Мукучу нэһилиэгэр төрөөбүтэ. Өр сылларга колхоз бэрэссэдээтэлинэн, ол кэннэ Таатта улууһун Петр Алексеев аатынан совхоз салайааччытынан, агрофирма Сүбэтин бэрэссэдээтэлинэн үлэлээбитэ.
Партия райкомун бюротун чилиэнинэн, райсовет депутатынан, Саха АССР Үрдүкү Сүбэтин VI ыҥырыытын депутатынан талылла сылдьыбыта. Саха АССР Үрдүкү Сүбэтин Бэрэссэдээтэлин солбуйааччытынан үлэлээбитэ. ССКП XXIII съеһин депутата. Семен Гаврильевич – «Ленин», «Октябрьскай өрөбөлүүссүйэ», «Үлэ Кыһыл Знамята», «Бочуот Знага» уонна «Хотугу сулус» уордьаннар кавалердара,  РСФСР тыатын хаһаайыстыбатын үтүөлээх үлэһитэ, РСФСР норуотун үөрэҕириитин туйгуна, Саха АССР үтүөлээх агронома, Кэбээйи уонна Таатта улуустарын бочуоттаах олохтооҕо.
Ааспыт сылга кини 95 сааһын туолбутун өрөспүүбүлүкэ уопсастыбаннаһа бэлиэтээбитэ.
Александр Николаевич Семен Гаврильевичтыын сэһэргэһиилэригэр өрөспүүбүлүкэ бүгүҥҥү туругун кэпсэттилэр. Кини Тааттаҕа Петр Алексеев аатынан сопхуоска дириэктэрдии олорон, саха норуодунай суруйааччыта Дмитрий Сивцев-Суорун Омоллоон Чөркөөхтөөҕү музейын тэрийэригэр күүс-көмө, тирэх буолбутун ахтан-санаан аастылар.
Кыргыттара, уола төрөппүттэрэ кинилэри бэйэлэринэн холобур буолан улаатыннарбыттарын, ол үтүө үгэс салҕанарын, күн бүгүн сиэннэр, хос сиэннэр, хос-хос сиэннэр этэҥҥэ улааталларын кэпсээтилэр.
Ил Түмэн спикерэ Александр Жирков Ытык киһиэхэ чэгиэн доруобуйаны, уҕараабат эрчими баҕарда.