Икки күҥҥэ 74 киһи хараҕын эпэрээссийэлэттэ

Доруобуйа харыстабыла 

«Дьокуускайдааҕы өрөспүүбүлүкэ офтальмологическай клиническай балыыһата» – бу өрөспүүбүлүкэҕэ харах ыарыыларын эмтиир соҕотох идэтийбит балыыһа.

Олунньу 28 – кулун тутар 3 кк. хирург быраастар Дьячковскай Максим Николаевич уонна Белолюбскай Иннокентий Николаевич, медсестралар Ермолаева Лена Анатольевна уонна Стручкова Екатерина Ивановна састааптаах уопуттаах исписэлиистэр биригээдэлэрэ Таатта, Томпо оройуоннарыгар уустук эпэрээссийэлэри оҥордо.
Таатта оройуонугар күҥҥэ 33 киһи эпэрээссийэлэннэ. Кинилэр онтон салгыы Томпо оройуонугар тиийдилэр. Оройуоннааҕы офтальмолог 55 ыарыһаҕы бэлэмнээбититтэн эпэрээссийэҕэ 41 киһи талылынна. Онтон хаалбыттар атын ыарыылаахтарынан, соҕотох харахтарыгар уустук эпэрээссийэ ирдэнэринэн, Дьокуускайга киирэн эмтэнэллэригэр этилиннэ. Биир күн устатыгар талыллыбыт дьон бары ситиһиилээхтик эпэрээссийэни ааһан, нөҥүө күнүгэр балыыһаттан таҕыстылар.

Эпэрээссийэлэр босхо оҥоһулуннулар, наадалаах бары эмтэри уонна медицинскэй тэриллэри эмчиттэр бэйэлэрин кытта илдьэ кэлбиттэр.
Маннык көһө сылдьан эмтээһин бары өттүнэн барыстаах, саамай сүрүнэ — саастарынан уонна доруобуйаларын туругунан Дьокуускайга эмтэнэ барар кыахтара суохтарга ордук табыгастаах.
Эмтэммит дьон бары бэйэлэрин дьыалаларын билэр маастардарга, хирурдарга муҥура суох махтаналлар.