Икки ый иһигэр — «Мир» картаҕа көһүү

Егор Борисов санап­пытынан, соторутааҕыта Россия президенэ Владимир Путин бюджет үлэһиттэрин уонна пенсионердары «Мир» төлүүр карталарга түһүмэхтэринэн көһөрөр туһунан сокуоҥҥа илии баттаата. Ити тас политическай уонна экономическай сабы­дыал­лартан тутулуга суох буолууну хааччыйыыны кыт­та сибээстээх. Онон 2017 с. от ыйын 1 к. диэри бааннар бэйэ­лэрин ааҕар-суоттуур тэрил­лэригэр, ол иһигэр бан­ко­маттары киллэрэн ту­ран, национальнай төлүүр инструменнары ылыыны тэрийэр эбээһинэстэннилэр.
Бастакы вице-премьер – регион экономикаҕа ми­ниистирэ Алексей Стручков бүгүҥҥү күҥҥэ 5 мөл. тахса карта таһаарыллыбытын бэлиэ­тээтэ. Бырагыраама кыт­тыылааҕынан 356 баан буолар, ол иһигэр 75 «Мир» картаны таһаарар, 180-тан ордуга – олору бэйэлэрин тэриллэригэр ылаллар.
Саха сиригэр са­ҥа тө­лүүр карталары «Сбер­баан», «Газпромбаан», «ВТБ 24», «Россельхозбаан», «Росбаан» уонна «Алмаасэргиэнбаан» таһаа­раллар уонна олору кытта үлэлииллэр.
Итини таһынан, «Мир» системаҕа «Почта Банк» кытты­һар. Быйыл Саха сиригэр 24 оройуон киинигэр баар почта сибээһин 37 салаатыгар баан түннүктэрин арыйарга былаанныыллар. Бу бырайыагы олоххо киллэрииттэн нэһи­лиэнньэ, ордук Уһук Хоту сир олохтоохторо, баан өҥөлөрүнэн почта сибээһин салааларыгар туһанар кыахтаныахтара.
Мунньаҕы түмүктүүрүгэр Ил Дархан миниистирдэр каби­неттара «Мир» нацио­нальнай төлүүр картаны киллэриигэ үлэ былаанын бэлэмнииригэр сорудахтаата. Кини саҥа картаҕа көһүү наадалааҕын туһунан нэһилиэнньэ ортотугар быһаа­рар үлэни ыытыы суолталааҕын, бу арҕааҥҥы дойдулартан тутулуга суох буолар туһугар оҥоһулларын дьон өйдүөх тустааҕын бэлиэ­тээтэ.
«Мир» төлүүр карталарга бюджет үлэһиттэрин уонна пенсионердары түґүмэхтэринэн көһөрүү туһунан сокуону олоххо киллэриигэ Саха сиригэр оробуочай бөлөх тэриллиэҕэ.