766
04 ноября 2016 в 15:11
Ил Түмэн этиилэрин — саҥа састаап билиитигэр
Сэтинньи 1 к. РФ УҺук Илин сайдыытыгар миниистирин солбуйааччы Сергей Качаев кыттыылаах Госдума регион политикатыгар уонна Хоту сир, УҺук Илин проблемаларыгар кэмитиэтин мунньаҕар «уҺук илиҥҥи гектар» туҺунан 119 №-дээх Федеральнай сокуоҥҥа уларытыылары киллэрэр туҺунан» Федерация Сэбиэтэ уонна Саха сирин Судаарыстыбаннай Мунньаҕа (Ил Түмэн) киллэрбит сокуоннарын барыллара көрүлүннүлэр. Мунньаҕы кэмитиэт бэрэссэдээтэлэ Николай Харитонов ыытта. Ити туҺунан парламент пресс-сулууспата иҺитиннэрдэ.
Госдума кэмитиэтин мунньаҕар өрөспүүбүлүкэ норуотун депутата, Ил Түмэн сир сыҺыаннаҺыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев кытынна. Ил Түмэн туҺааннаах кэмитиэтин бэрэссэдээтэлэ «УҺук Илин федеральнай уокурук састаабыгар киирэр Россия Федерациятын субъектарын сиригэр-уотугар судаарыстыбаннай эбэтэр муниципальнай бас билиигэ баар сир учаастактарын биэрии уратыларын итиэннэ Россия Федерациятын сорох сокуонун аакталарыгар уларытыылары киллэрэр туҺунан» Федеральнай сокуоҥҥа уларытыылары киллэрэр туҺунан» Саха сирин парламена көҕүлээбит 1102943-6 №-дээх Федеральнай сокуонун барылын билиҺиннэрэн дакылаат оҥордо.
Владимир Прокопьев 119 №-дээх Федеральнай сокуоҥҥа көннөрүүлэр тустарынан кэпсээтэ, чуолаан «уҺук илиҥҥи гектар» туҺунан сокуон үҺүс түҺүмэҕин олоххо киллэрии болдьоҕун улаатыннарыыга сыҺыаннаах көннөрүүгэ сиҺилии тохтоото. Билигин үлэлиир сокуонунан, 2017 с. олунньу 1 күнүттэн Россия бары олохтоохторо УҺук Илиҥҥэ гектар сир ылыахтарын сөп. Саха сирин парламентарийдара бу түҺүмэх саҕаланыытын биир сылынан уҺатарга – Россия бары дьонугар 2018 сыл олунньу 1 күнүттэн 1 га сир учаастактарын биэрэргэ этэллэр. ҺҺүс түҺүмэх болдьоҕун уҺатыы сокуон итэҕэстэрин толору көрдөрүөн уонна сокуону олоххо киллэрии дьаҺалларын кэмигэр тупсарыан, ону сэргэ уҺук илиҥҥи субъектар олохтоохторо сир учаастактарын бастакынан ылар бырааптарын хааччыйыан сөп.
Санаттахха, Ил Түмэн алтынньы 26 к. буолбут XXIV (уочараттаах) пленарнай мунньаҕар Саха сиригэр тустаах федеральнай сокуону олоххо киллэрии барыллааҺын түмүктэрэ таҺаарыллыбыттара. Өрөспүүбүлүкэ баайга-дуолга уонна сир сыҺыаннаҺыыларыгар миниистирэ Евгения Григорьева дакылаатыгар бэлиэтэммитинэн, Саха сирин 234 нэҺилиэгэр, ол эбэтэр өрөспүүбүлүкэ нэҺилиэктэрин үс гыммыт биириттэн ордугар гектары ылар туҺунан сайабылыанньаны кумааҕы эрэ көрүҥүнэн биэриэххэ сөп. Ил Түмэн бэрэссэдээтэлин Александр Жирков санаатынан, ити нэҺилиэнньэлээх пууннар олохтоохторо, Федеральнай иҺитиннэрэр тиҺиккэ көҥүл тииҺинэр гражданнарга тэҥнээтэххэ, тэҥэ суох усулуобуйалаахтар. Ону сэргэ пленарнай мунньах кэмигэр хамсаабат баай-дуол судаарыстыбаннай кадастрыгар учуоттамматах, кыраныыссалара быҺаарыллыбатах элбэх ахсааннаах сир учаастактара баалларын туҺунан иҺитиннэриллибитэ. Миниистир дааннайдарынан, нэҺилиэнньэ учаастактары учуокка туруорар. 2016 с. тохсунньу 1 к. итинник 183 634 сир учаастага баар эбит буоллаҕына, алтынньы бүтүүтүн туругунан кинилэр ахсааннара 49 119 сыыппаранан аҕыйаабыт. Федеральнай сокуон үҺүс түҺүмэҕин олоххо киллэрии болдьоҕун уҺатар буоллахха, УҺук Илин регионнарын нэҺилиэнньэтэ бэйэтин учаастактарыгар быраабы ситэ оҥотторуоҕа.
Итини сэргэ Владимир Прокопьев атын көннөрүүлэри билиҺиннэрдэ: «уҺук илиҥҥи гектары» биэриигэ биир боломуочуйалаах уорганы быҺаарар туҺунан; босхо туҺаныыга сир учаастактара бэриллибэт сирдэрин-уоттарын быҺаарар быраабы былаас сокуону оҥорор (бэрэстэбиитэллээх) уорганнарыгар сыҺыарар туҺунан көннөрүү; ойуур фондатын сирдэрин састаабыгар баар сир учаастактарын маҺы бэлэмнээҺиҥҥэ анаан туҺаныы көрүҥнэрин ойууру туҺаныы көрүҥнэрин кэрискэтиттэн таҺаарыы чааҺыгар хааччахтааҺын туҺунан уо.д.а.
Хаартыска Госдума официальнай сайтыттан туҺанылынна.
