698
31 июля 2017 в 11:16
Инспекция суолу харабыллааһына күүһүрдэ
Өрөспүүбүлүкэ суолларыгар саахал ахсаана улааппытынан сибээстээн, ГИБДД (Суолунан айан куттала суох буолуутугар судаарыстыбаннай инспекция) салаалара от ыйын 25 күнүттэн атырдьах ыйын 3 күнүгэр диэри күүһүрдүллүбүт режиминэн үлэлииллэр, диэн биэдэмистибэттэн иһитиннэрдилэр.
«Өрөспүүбүлүкэ суолларыгар балаһыанньа уустук. Сыл саҕаланыаҕыттан ГИБДД үлэһиттэрэ 112 тыһыынчаттан тахса суолунан айан быраабылаларын кэһиини булбуттара. Итирик туруктаах 4 тыһыынчаттан тахса суоппар тутуллан, массыынаны ыытартан туоратыллыбыта», – диэн быһаардылар инспекцияҕа.
От ыйын 1 күнүттэн Саха сиригэр 89 суол-тырааныспар саахала бэлиэтэммит, онно 10 киһи олоҕо быстыбыт уонна 113 киһи эчэйбит. Соҕотох от ыйын 13-19 күннэригэр өрөспүүбүлүкэ сиригэр-уотугар 38 суол саахала таҕыста, онно 7 киһи тыына быһынна уонна 48 киһи эчэйиини ылла. Тырааныспар-суол саахалын ахсаана ордук Алдан, Мииринэй, Ленскэй, Нерюнгри, Хаҥалас, Таатта, Чурапчы оройуоннарыгар уонна Дьокуускайга улааппыта бэлиэтэннэ.
