Ийэ хапытаалын 30% улаатыннарыахтара

/ Уһук Илин олохтоохторугар /

РФ үлэҕэ уонна социальнай сайдыыга миниистирэ Максим Топилин иһитиннэрбитинэн, Уһук Илиҥҥи федеральнай уокурук олохтоохторо ийэ хапытаалыгар 30% кээмэйинэн эбии төлөбүрү ылыахтара. Кулун тутар 18 к. РФ бырабыыталыстыбата Уһук Илиҥҥэ оҕо төрөөһүнүн өйөөһүҥҥэ кэккэ дьаһаллары ылынарга сөбүлэспитин туһунан СИА иһитиннэрдэ.

Максим Топилин эппитинэн, иккис оҕо төрөөтөҕүнэ, ийэ хапытаалыгар уһук илиҥҥи эбии төлөбүр 135-140 тыһ. кэриҥэ буолуоҕа. Ону таһынан, хас биирдии региоҥҥа оҕоҕо айах ииттэн олоруу алын кээмэйин икки төгүлүнэн биир кэмнээх эбии төлөбүр көрүллэр. Олохтоммут айах ииттэн олоруу алын кээмэйиттэн тутулуктанан ол 30 тыһ. солк. буолуоҕа. «Бу дьиэ кэргэттэри улаханык өйүөҕэ диэн ааҕабыт», — диэн быһаарда Топилин.
Итини сэргэ үһүс оҕоҕо көмө харчыны төлөөһүҥҥэ Уһук Илиҥҥи федеральнай уокурукка оҕо төрөөһүнүн түмүллүбүт коэффициенын туттууну тохтотор туһунан РФ президенин ыйааҕа бэлэмнэннэ. Ол аата, быйылгы сыл тохсунньу 1 күнүттэн Уһук Илиҥҥи федеральнай уокурук бары субъектарыгар үһүс оҕоломмут дьиэ кэргэттэргэ оҕо айах ииттэн олоруутун алын кээмэйинэн босуобуйа төлөнүөҕэ.
Топилин иһитиннэрбитинэн, эбии дьаһаллары киллэриигэ 3,1 млрд солк. кээмэйдээх эбии субсидия ирдэнэр. Ити харчы РФ бырабыыталыстыбатын резервнэй фондатыттан ыытыллыаҕа. Үлэ министиэристибэтэ бүтэһиктээх докумуоннары бырабыыталыстыбаҕа муус устар 1 күнүгэр диэри киллэрэр соруктаах. Төлөбүрдэр 2019 с. тохсунньу 1 күнүттэн оҥоһуллуохтара.
Санаттахха, судаарыстыба баһылыга Владимир Путин балаҕан ыйыгар Владивостокка буолбут Судаарыстыбаннай Сэбиэт мунньаҕын түмүктэринэн УИФУо оҕо төрөөһүнүн өйөөһүҥҥэ дьаһаллары оҥорор туһунан сорудах биэрбитэ.