Киин куоракка быһыы-майгы туруктааҕынан ааҕыллар

Кулун тутар 20 к. СИА-тыгар СӨ ИДьМ иһитиннэрбитинэн, ааспыт сууккаҕа киин куоракка уонна өрөспүүбүлүкэ оройуоннарыгар миграннарга сыһыаннаан алдьатыы-кээһэтии эбэтэр сокуону утары дьайыы түгэннэрэ бэлиэтэммэтилэр, бүгүҥҥү күҥҥэ быһыы-майгы туруктаах. «Ааспыт күннэргэ миграннарга сыһыаннаан биирдиилээн кырыктаныы түгэннэрэ тахсыбыттара. Онуоха буруйдаахтар билиннилэр уонна накаастаннылар», — диэн биэдэмистибэҕэ чопчулаатылар.

Дьуһуурунай полицейскайдар тиэрдибиттэринэн, билигин куоракка быһыы-майгы туруктаах.
Саха сиригэр киргизтэр «Манас» диаспораларын салайааччыта Данияр Байгутуев эппитинэн, бастакы күннэргэ кини биир дойдулаахтара бэйэлэрин аадырыстарыгар тахсыан сөптөөх дьайыылартан чахчы сэрэхэдийбиттэрэ. «Аймалҕан уонна алдьатыы-кээһэтии суоҕа. Хас да эйэлэспэт санаалаах дьон, ыччат бааллара, ол эрээри уопсай күүһүнэн барыта оннугар түстэ, күүһү туттуу түгэннэрэ суохтара», — диэн кэпсээтэ кини.
Кини эбэн эппитинэн, билигин диаспора өрөспүүбүлүкэҕэ баар биир дойдулаахтарын кытта күүскэ үлэлиир. Ким да балыыһаҕа киирбэтэҕэ итиэннэ саба түһүү туһунан полицияҕа сайабылыанньа биэрбэтэҕэ.
«Адгезия» ААУо үлэһитэ Джанибек Кочкорбаев эппитинэн, кини уонна биригээдэтин үлэһиттэрэ көннөрү режиминэн үлэлээбиттэр. Бастакы күннэргэ миграннары утары саҥа-иҥэ элбээбитинэн, кини сорох биир дойдулаахтара быһыы-майгы оннугар түһүөр диэри үлэҕэ тахсартан туттуммуттарын бигэргэттэ. «Билигин барыта бэрээдэктэннэ, биһиги уруккубут курдук бары үлэлиибит», — диэтэ кини.